1 Koríntyus 1 - Uhokri Gahegbetawni Nukune akak Sawmus

Nah Pol awahkis kabayka yimin

¹ Nah Pol awahkis kabayka yimin. Kibeyne, Uhokri kaniyven akak gibetki adahan nah humaw Jesus Cristo giwatni. Nah gikak ukebyi kiyavwiye Sóstenis usuh awahkis kabayka

² yimin yis Uhokri gihiyegavu korintyuyenevwi. Kibeyne, ig Uhokri barewbete yihiyekemni awaku ku samah yis pahavwiwa gikak Cristo Jesus. Ig kaniyvey adahan yis humaw gihiyegavu payak gikakkis madikte hiyeg muwapuw ku pariye amnihswenevwi git Ukivarawiy Jesus Cristo. Ukivarawata ig.

³ Ig Wigwiy Uhokri gikak Kiyavwiye Jesus Cristo gabaykis yikaknek. Igkis kariswehse yiyakninek.

Kibeyne yis igisavye gikak Cristo gannu ay yivit

⁴ Nukebyuvwi, nah kabayha Uhokri yidahan avanenekwa. Nah kabayhig awaku ig ike ka aynsima kabayka yivitit awaku ku samah yis pahavwiwa gikak Cristo Jesus.

⁵ Kibeyne, yis igisavye akak madikte gannu ay yivit awaku ku samah yis pahavwiwa gikak Cristo. Yis ka yannusima awna iwit ku pariye pes giwntak Uhokri. Yis hawata ka yannusima hiyak hiyakemniki ku pariye pes giwntak Uhokri.

⁶ Yis humaw hene awaku ku samah yis ameve nunetni gimin Cristo, yis wewne nikak.

⁷ Ku samah yis aynete kuri yis wahepnenete Ukivarawiy Jesus Cristo gidawnhan, ig Uhokri kawihkisnene gannu ka aynsima yivitit. Yuma pahatnema gannu ig ka kawihkisnima yivitit.

⁸ Hawata akiw ig ay yikanek adahan yis humaw avigkutavrik ku samah gimawkan kuri aytakihan danuhte amaksemni hawkrinek kahadbe yis yumahwa yitaraksan aynesnima abetnewa ini hawkri ku aysaw Ukivarawiy Jesus Cristo danuhnek.

⁹ Ig Uhokri ka ikiswiyti, mmanawa ignewa ukanyempitniwiy adahan wixwiy pahavwiwa gikak gikamkayh Ukivarawiy Jesus Cristo. Ig ka kaniywiy henentima.

Ka yi muwaka isaksa adahan yihiyekemni ibekhewbet

¹⁰ Nukebyuvwi, nah aya yit giwavrik Ukivarawiy Jesus Cristo adahan yis tuguhkis yihiyekemni pahatwowa hiyakemniki. Ka yi muwaka isaksa yihiyekemni ibekhewbet. Misakwanay akak pahatwowa yihiyekemni hawata akak pahawowa yiyakni.

¹¹ Nukebyuvwi, kiyavuno Kulowe gumunyavu egkis kinetihwa nutuh ku yaytak ayge ka tuguhak gihiyekemnikis pawtak.

¹² Nah kinetni yak ku pahavwi awna han: “Nah gidahan Pol.” Pahavwime awna: “Nah kawa. Nah gidahan kiyavwiye Apolu.” Pahavwime awna: “Nah kawa. Nah gidahan kiyavwiye Pedru.” Pahavwime awna: “Nah kawa. Nahnewa gidahan Cristo.”

¹³ Mmahki yis awna inakni hene? Wixwiy madikte gidahan Cristo. Cristo ka ibekhewbetnema. Mmahki yaytak awna: “Nah gidahan Pol?” Ka nahnema daddahkiswe yidukwenavrik. Ignewa Cristo daddahkiswe yidukwenavrik. Kawki nuwavrikma yis kewvi ahakwat un, heneme giwavrik Cristo.

Ka yi muwaka ikaw nuhiyega

¹⁴ Kibeynekata nah ka kaywa kibitema hiyeg. Nah kaywe ignesnewa kiyavwiye Kirispu gikak kiyavwiye Gayu.

¹⁵ Wake nah kaywa kibite hiyegbe, nikwe yis awnakama ku nah kaywevyi nuwavrikwatkama.

¹⁶ Hawata nah kaywe gimunyavu kiyavwiye Estefanas. Heneme nah ka kiye ba nah kaywa nawenyewatma hiyeg akiw.

Cristo gihiyekemni ku samah ig umahkiswe, innewa kibeyne hiyakemniki

¹⁷ Mmanawa ig Cristo ka awahkisun adahan nah kaywenema hiyeg, heneme ig awahkisun adahan nah ekkene ginetni. Nah ka akki inakni ginetni akakma hiyeg gihiyekemnikis amadagayama inin. Nah ka muwaka hiyeg iveg avitit akebi inakni hiyakemniki. Nah muwaka igkis iveg avititnen Cristo gihiyekemni ku samah ig umahkiswe amin giyakni udukwenavrikwiy. Inakninewa kibeyne hiyakemniki.

¹⁸ Gitkis ignes biyukavye inakni hiyakemniki in he mahayakemnikinen. Wotwiyme wixwiy ku pariye isahptewnevwi inakni Uhokri gidatni.

Hiyakemniki amadgaya inin in waditnevyenen git Uhokri

¹⁹ Mmanawa Uhokri gannasan awna: — Ku pariye hiyeg hiyakemniyevwi akak hiyakemniki amadgaya inin, nah pisenwa akak gihiyekemnikisnek madikte. In mpiye madiktenek. Henewatbaki in Uhokri gannasan awna.

²⁰ Nikwe hiyeg gihiyekemnikis amadgaya inin in he waditnevyenen. Kannuhekevutnevwi amin hiyakemniki amadgaya inin giwnkis waditnevyenen. Hiyakemniyevwi amadgayavu inin giwnkis waditnevyenen. Ig Uhokri kahayaksa madiktenek ku in he mahayakemnikinen.

Gitkis hiyeg unetni in mahayakemniki bawa kawa

²¹ Mmanawa ig Uhokri ka gihiyekemnisima. Ig ka isaksa adahan hiyeg utivgi akak gidahankiswa gihiyekemnikis. Heneme ku samah igkis kinetni arak ku samah Cristo amnihpewiy inakni keh igkis utivgi. Gaytakkis hiyeg iki inakni unetni ku in mahayakemniki. Bawa in ka mahayakemnikima. Ku pariye hiyeg kamaxwa givitit Cristo ignes isahptawnek ariw givathawnikis.

²² Avanenekwa ku aysaw usuh kinetihwene gimin Cristo gitkis hiyeg judeyenevwi, igkis awna wotuh: “Ku yis keh annut wowtrik adahan areketni Uhokri gidatni ay yivit, nikwe usuh iha yiwn.” Usuhme timapni hene, usuh ka keh annut. Usuh he ekkenen gitkis ku samah Cristo umahkiswe amin giyakni gidukwenavrikkis. Gitkis gaytakkis judeyenevwi inakni yuma Uhokri gidatni nibet.

²³ Heneme gaytakkis ku pariye Uhokri gikanyanvu adahan ignes humaw gihiyegavu, igkis pukuhpin ku samah Cristo gimiremni in Uhokri gidatni adahan wamnihtenwiy. Mmanawa ini ku pariye ikaka ku in yuma Uhokri gidatni nibet, ini ka aynsima datte ariw hiyeg gidatnikis amadgaya inin.

²⁴ Ignesme hiyeg gresiyenevwi gayapnikis wotuh nawenyewa ariw judeyenevwi gayapnikis. Avanenekwa ku aysaw usuh kinetihwene gimin Cristo gitkis igkis awna wotuh: “Ku yis ekkene kibeyne hiyakemniki wotuh, nikwe usuh iha yiwn.” Usuhme timapni hene, usuh he ekkenen gitkis ku samah ig Cristo umahkiswe amin giyakni gidukwenavrikkis. Gitkis gaytakkis gresiyenevwi inakni mahayakemniki.

²⁵ Heneme gaytakkis ku pariye Uhokri gikanyanvu adahan ignes humaw gihiyegavu igkis pukuhpin ku samah in Cristo gimiremni innewa Uhokri gihiyekemni. Mmanawa ini ku pariye ikaka Uhokri gimahyakemni in hiyakemnite ariw hiyeg gihiyekemnikis amadgaya inin.

Uhokri gihiyegavu ka kibitema ikaka hiyakemniyevwi ay amadga inin

²⁶ Nukebyuvwi, wixwiy ka ariknawnema, heneme kibeyne wixwiy Uhokri gikanyanvu adahan wixwiy humaw gihiyegavu. Ivegminanay ku samah wixwiy. Wixwiy ka kibitema ikaka hiyakemniyevwi gavitkis hiyeg amedgenevwi inin. Ine wixwiy kawnata kibitema igisavye. Ine wixwiy kawnata kibitema ikaka kiyatyevwi.

²⁷ Heneme kibeyne wixwiy Uhokri gikanyanvu adahan wixwiy humaw gihiyegavu. Hiyaksa ig kaniye hiyeg kane hiyak hawkri adahan marekwene hiyeg ikewnevwi hiyakemniyevwi amadga inin. Ig kaniye hiyeg yumanene gannukis adahan marekwene hiyeg kane gannukisima amadga inin.

²⁸ Ig kaniye hiyeg tuwatavyenen yumanene gikiytanikis. Ig kaniye hiyeg ku pariye ka ariknawnema, adahanikwa ig pisenwevye akak hiyeg gikiytanikis amadgaya inin.

Yuma pahavwinema hiyeg hiya igma ikawvari hiyakemniye giwtrik Uhokri

²⁹ Nikwe yuma pahavwinema hiyeg amadgaya inin hiya igma ikawvari hiyakemniye giwtrik Uhokri.

³⁰ Heneme kibeyne ig Uhokri keh wixwiy humaw pahavwiwa gikak Cristo Jesus. Igme Kiyavwiye Jesus ignewa ku pariye uhiyekemniwiy giwntekne Uhokri. Ignewa keh wixwiy ke kibeynevwibe giwtrik Uhokri. Ignewa barewbeta uhiyekemniwiy. Ignewa katiwnih adahan wixwiy isahptaw.

³¹ Giwnamnawa Uhokri gannasan. In awna: — Ku pariye hiyeg kehkere giwanti akak ku ig hiyakemniye hiyeg, wani ig keh giwanti akaknenwa ku pariye Ukivarawiy gikehni udahanwiy. Mmanawa Uhokri ignewa ku pariye hiyakemniye.