1 João 5 - Uhokri Gahegbetawni Nukune akak Sawmus

¹ Kiyavwiye Jesus igi Cristo ig Uhokri gikanyan adahan ukumaduketniwiy. Ku pariye hiyeg iha inakni, ignes Kiyavwiye Uhokri gikamkayuvwi. Nukebyuvwi, ku wis batekye gikak pahavwi, kis adahan wis batekye gikakkis gikamkayuvwi hawata.

² Nikwe ku wixwiy batekye gikak Kiyavwiye Uhokri, ku wixwiy ihpene giwn, ayge nikwe wixwiy batekye gikakkis madikte gikamkayuvwi hawata akiw. Inakni kahayak huwewe wotwiy.

³ Mmanawa ku wixwiy batekye gikak Kiyavwiye Uhokri, nikwe wixwiy iha giwn. In ka mahikonema wotwiy adahan wixwiy ihpene giwn mmanawa wixwiy batekye gikak.

Wixwiy awaygye ativut ku pariye suguhnene Uhokri

⁴ Hawata akiw in ka mahikonema wotwiy adahan wixwiy iha giwn mmanawa ku pariye hiyeg Kiyavwiye Uhokri gikamkayuvwi ignes awaygye ativut madikte amadgaya inin ku pariye suguhnene Kiyavwiye Uhokri. Wixwiy ka madatnivyema mmanawa wixwiy kamaxwenevwi givitit Kiyavwiye Jesus.

⁵ Ig Kiyavwiye Jesus igyewa Kiyavwiye Uhokri gikamkayh. Ku pahavwi iha inakni, igi awaygye ativut madikte amadgaya inin ku pariye suguhnene Kiyavwiye Uhokri.

Ay mpana arakak ku Jesus igyewa Uhokri gikamkayh

⁶ Ig Kiyavwiye Jesus igyewa Kiyavwiye Uhokri gikamkayh hiyapkiska wotwiy. Ku aysaw ig kaywepka ahakwat un, ayipa ig kuwis Uhokri gikamkayh. Ku aysaw ig miyap ig sukase gimig, ig gidukwenewa Kiyavwiye Uhokri gikamkayh. Kawki ig Kiyavwiye Uhokri gikamkayh ininewatma avim ini ku aysaw ig kaywepka. Ig gidukwenewa Kiyavwiye Uhokri gikamkayh avim ini ku aysaw ig miyap ig sukase gimig. Ig keh ka aynsima annut akak Uhokri Gitip gannu ay givit. Ig kinetihwa gitkis hiyeg akak Uhokri Gitip gihiyekemni ay givit. Henewa ig Uhokri Gitip akki wotwiy ku ig Kiyavwiye Jesus igyewa Kiyavwiye Uhokri gikamkayh. Ig Kiyavwiye Uhokri Gitip ig akki ininewa ku pariye hiyakemniki inyewatnene.

⁷ Ayge nikwe wis hiyap mpana arakak ku ig Kiyavwiye Jesus igyewa Kiyavwiye Uhokri gikamkayh.

⁸ Ig Kiyavwiye Uhokri Gitip ignewa ekkene wotwiy hene. Hawata akiw Kiyavwiye Jesus gikewven akki wotwiy hene. Gimiremni akki hawata ku igyewa Kiyavwiye Uhokri. Ini mpana arakak pahatwowa ahiyekemni. In areketni wotwiy ku Kiyavwiye Jesus igyewa Kiyavwiye Uhokri gikamkayh.

⁹ Nukebyuvwi, ku yis hiyap wixwiy iha giwnkis hiyeg amadgayavu inin, inkata Kiyavwiye Uhokri giwn akiw? In Kiyavwiye Uhokri giwn in ka aynsima kabayte ariw giwnkis. Ini mpana arakak in giwntakwa Kiyavwiye Uhokri. Igwa akki wotwiy ku Kiyavyiye Jesus igyewa gikamkayh.

¹⁰ Pahavwi ku pariye kuwis kamaxwa givitit Kiyavwiye Uhokri gikamkayh, ig hiyakni avit giyakni ku inakni inyewa. Heneme ku pahavwi ka iha inakni Kiyavwiye Uhokri gakkan wotwiy, amun ini nikwe ig ikene ke wotbe Kiyavwiye Uhokri wasaympiyebe. Ig wasaymaptihne Kiyavwiye Uhokri mmanawa ig ka iha inakni Kiyavwiye Uhokri gakkan ku Kiyavwiye Jesus igyewa gikamkayh.

Jesus ig iki dehetniki uvititwiy

¹¹ Nah akkite yit ku pariye Kiyavwiye Uhokri gakkan wotwiy. Ig akki wotwiy ku ig ike dehetniki uvititwiy adahan avanenekwa givitimpi gikamkayh. Mmanawa ini dehetniki ay givit gikamkayh.

¹² Ku pariye kadahanye Kiyavwiye Uhokri gikamkayh ay givit, igi aymuhwa gimun Kiyavwiye Uhokri adahan avanenekwa. Heneme ku pariye yumahnene gidahan Kiyavwiye Uhokri gikamkayh ay givit, igi ka aymuhwa gimun Kiyavwiye Uhokri.

¹³ Yisme ku pariye kuwis kamaxwenevwi givitit Kiyavwiye Uhokri gikamkayh, nah ikene inakni yinetni amadgatak inin kagta kahadbe yis hiyakni kabayntiwa ku yis kadeheten adahan avanenekwa. Yis ka ivegmina yihiyekemni baki yis inyewatma Uhokriyanvuma.

Ku wis ayap git Uhokri gimawkanavrik, ig iki wot

¹⁴ Ayge nikwe wixwiy ka mara piriyepkaw git Kiyavwiye Uhokri. Ku wixwiy ayap git gimawkanavrik, nikwe in huwewe wotwiy ku ig timap inakni wayapniwiy git.

¹⁵ Ku wixwiy hiyakni ku ig timap ku pariye wayapniwiy git, nikwe wixwiy hiyakni ku ig iki wotwiy.

Ay pahat wayapni git Uhokri ku pariye ka hiya igma iki wot

¹⁶ Ku wis hiyap pahavwi tarakse, amawka ku wis aya git Kiyavwiye Uhokri adahan ig bayahminig ariw ini gitaraksan adahan ig ikene gawaygi git. Ayge nikwe ig Kiyavwiye Uhokri keh ku samah wayapni git. Heneme ay pahat taraksaki ku pariye utipkis wot miyaka. Ini taraksaki adahan ku pahavwi tukuhwe giw Kiyavwiye Uhokri. Yuma pahavwinema hiyeg hiya amaptanka ini taraksaki adahan ini ka utipkis git miyaka. Ku wis hiyap pahavwi tukuhwe giw Kiyavwiye Uhokri, ka hiya wisma aya git Kiyavwiye Uhokri adahan ig bayahminig ariw ini gitaraksan adahan ig ikene gawaygi.

¹⁷ Madikte utaraksan akak Kiyavwiye Uhokri giwn ini patahwaki. Heneme ka madiktema utaraksan utipkis wot miyaka.

Wixwiy Uhokri gikamkayuvwi

¹⁸ Wixwiy hiyakni kabayntiwa ku pahavwi ku ig Kiyavwiye Uhokri gikamkayh, ig ka kehnenema patahwaki mmanawa Kiyavwiye Uhokri gikamkayh Kiyavwiye Jesus igi gavuriwten. Nikwe ig wavityempu gikivarakis ka hiya igma daxgi adahan ig kehkis patahwaki git.

¹⁹ Wixwiy hiyakni kabayntiwa ku wixwiy Kiyavwiye Uhokri gikamkayuvwi. Ignesme ku pariye kane Uhokriyanvuma igkis ay giwanmaku ner wavityempu gikivarakis.

²⁰ Hawata akiw wixwiy hiyakni kabayntiwa ku ig Kiyavwiye Uhokri gikamkayh kuwis danuh atan amadgat inin. Ig kuwis uguhe uhiyekemniwiy kahadbe wixwiy gihiyekten ner ku pariye igyewa Kiyavwiye Uhokri. Kibeyne, wixwiy pahavwiwa gikak Kiyavwiye Uhokri awaku ku samah wixwiy pahavwiwa gikak Jesus Cristo, Kiyavwiye Uhokri gikamkayh. Ig ner igyewa Kiyavwiye Uhokri. Ignewa ku pariye keh wixwiy aymuhwa gimun Kiyavwiye Uhokri adahan avanenekwa.

²¹ Nukamkayuvwi, ka ba yi kawohkigahaw arit ariknawnema ku pariye ka igyewatma Uhokri.