1 João 4 - Uhokri Gahegbetawni Nukune akak Sawmus

Ku pariye hiyeg awna ku Jesus ka Uhokrima ihtikekne, igi ka Uhokriyanma

¹ Nukebyuvwi kibeynevwi, ka yi muwaka ihpa giwnkis madiktema hiyeg ku pariye ikawnamahkis ke wotbe giwnkis pes giwntakbe Kiyavwiye Uhokri Gitip. Amawka wixwiy avuriw giwnkis baki in ayta giwntakwatma Kiyavwiye Uhokri. Mmanawa gaytakis hiyeg akka wasaymkanen. Igkis ikaw ke wotbe igkis ekkene Uhokri gihiyekemnibe bawa gihiyekemnikis ka ayta giwntakma Kiyavwiye Uhokri. Akebi neras hiyeg muwapuw amadga hawkri kuwis.

² Nah akkite yit ku samah ahiyaka wot baki pahavwi giwn pes giwntakwatma Kiyavwiye Uhokri Gitip. Ku ig awna yit hiyakemniki ku pariye avigkutavrik ku samah Uhokri gihiyekemni, nikwe ig ekkene hiyakemniki giwntakwa Kiyavwiye Uhokri Gitip. Nikwe ku ig kinetihwa yit ku Jesus Cristo ayta wotwiy giwntak Kiyavwiye Uhokri ig wageswe ihtikekne kewa wixwiybe, nikwe igi ekkene hiyakemniki giwntakwa Kiyavwiye Uhokri Gitip.

³ Heneme ku ig ka kinetihwa hene gimin Kiyavwiye Jesus, nikwe ig ka ekkenema hiyakemniki giwntak Kiyavwiye Uhokri Gitip. Ig ekkene yit gihiyekemni Cristo givetunya. Yis kuwis kinetni gak pahavwi nehmnikuhpiye ku pariye ikawvari ku ignewa Cristo bawa ig Cristo givetunya. Ayipa kuwis hiyeg ay ke ignebe amadga inin.

Ku pariye ekkene kane Uhokriyanvuma gihiyekemnikis, igi ka Uhokriyanma

⁴ Wixwiyme ka henema, nukamkayuvwi. Wixwiy uhiyekemniwiy giwntakwa Kiyavwiye Uhokri. Nikwe wixwiy awaygye gitivutkis neras Cristo givetunyavu. Mmanawa ig ku pariye ay uvitwiy ig awaygte giw ner ku pariye ay givitkis neras hiyeg kane Uhokriyanvuma.

⁵ Gihiyekemnikis amadgaya inin. Igkis ka Uhokriyanvuma. Nikwe igkis kinetihwa amin kane Uhokriyanvuma gihiyekemnikis amadgaya inin. Ignesme kane Uhokriyanvuma igkis amava inakni giwnkis akak madikte gibetkikis.

⁶ Wixwiyme, wixwiy Uhokriyanvu. Nikwe ku pariye Uhokriyan igi amava wownwiy kabayntiwa. Igme ku pariye kane Uhokriyanma igi ka amava wownwiy. Innebaki areketni wotwiy baki pahavwi giwn inyewatma, ba kawk, ba in taraksevye.

Amawka ku wixwiy batekak pawtak

⁷ Nukebyuvwi kibeynevwi, uyay batekak pawtak. Mmanawa ininewa Uhokri gihiyekemni. Ignewa ku pariye keh wixwiy batek gikakkis hiyeg. Ku pahavwi batek gikakkis hiyeg, innebaki arakak ku ig Uhokriyan. Ignewa ku pariye hiyak Uhokri gihiyekemni.

⁸ Pahavwime ku pariye kane batek gikakkis hiyeg, igi ka hiyak Uhokri gihiyekemni. Mmanawa ig Kiyavwiye Uhokri igi batekkatrune gikakkis hiyeg.

⁹ Ig Kiyavwiye Uhokri kuwis akki wotwiy huwewe ku samah ig batek ukakwiy kiyesrad. Mmanawa ig awahkise nernewa gikamkayh atan amadgat inin adahan igme parak abet uhawkanwiy kahadbe wixwiy kadeheten givitimpi adahan avanenekwa.

¹⁰ Kibeyne, ig Kiyavwiye Uhokri inyewa batek ukakwiy kiyesrad. Nah akkite yit ku samah. Hiyawa wixwiy minikwak ka batek gikak, heneme igme batek ukakwiy. Inneki keh ig awahkise gikamkayh atan adahan umahkiswevye udukwenavrikwiy adahan katiwnihpiye utaraksanwiy.

¹¹ Nukebyuvwi kibeynevwi, ig Kiyavwiye Uhokri mpinevevye batek ukakwiy. Nikwe amawka ku wixwiyme batekak hawata pawtak.

¹² Wixwiy kote hiyapte Kiyavwiye Uhokri heneme ig ay uvitwiy. Ku wixwiy batekak pawtak, innewa ku pariye areketni wotwiy ku ig ay uvitwiy. Ig ay uvitwiy, ig keh wixwiy batek gikakkis hiyeg avigkutavrik ku samah ig batek gikakkis.

Ay mpana arakak adahan ku wis Uhokriyan

¹³ Nah akkite yit akiw ku samah ahiyaka wotwiy ku wixwiy pahavwiwa gikak Kiyavwiye Uhokri igme pahavwiwa ukakwiy. Ig kawihkis Gitip uvititwiy. Innebaki areketni wotwiy.

¹⁴ Hawata akiw wixwiy pukuhpa ku ig Wigwiy kuwis awahkise gikamkayh atan adahan igme gamnihtenkis madikte hiyeg amedgenevwi inin. Wixwiy kinetihwene gimin gitkis hiyeg. Innebaki pahat arakak akiw ku ig ay uvitwiy.

¹⁵ Mmanawa ku pariye ekkene ku Kiyavwiye Jesus igyewa Kiyavwiye Uhokri gikamkayh, igi pahavwiwa gikak Kiyavwiye Uhokri, igme Kiyavwiye Uhokri pahavwiwa gikak.

¹⁶ Hawata akiw in huwewe wotwiy ku ig Kiyavwiye Uhokri batek ukakwiy. Ig Kiyavwiye Uhokri batekkatrune gikakkis hiyeg. Nikwe ku pahavwi batekye gikakkis hiyeg, innebaki arakak ku ig pahavwiwa gikak Kiyavwiye Uhokri, igme Kiyavwiye Uhokri pahavwiwa gikak.

Ku wis batek gikak pahavwi, nikwe wis ka avis gibohri

¹⁷ Ig Kiyavwiye Uhokri keh wixwiy batek gikakkis hiyeg avigkutavrik ku samah ig batek gikakkis. Kahadbe wixwiy ka marekepma uvitwiy aysawnemenek avim ini ku aysaw wixwiy danuh givetunat. Ayge ig uhivetniwiy baki wixwiy kibeynewatma. Ku wixwiy batek gikakkis hiyeg, nikwe ig hiyap ku wixwiy ikaw hawata ke igbe ay amadga inin ig hiyap wixwiy kibeyne. Nikwe wixwiy ka muwaka avis gibohri.

¹⁸ Ku wis batek gikak pahavwi, nikwe wis ka avis gibohri. Henewa, ku wis inyewa batek gikak pahavwi, nikwe in pekkis aviska madikte avititak uyakni. Mmanawa wis avis gibohri pahavwi ku aysaw wis tarakse gikak, wis avise ku nawenetke ig hiyapkise wot nivatra. Ku wis avis gibohri pahavwi, innebaki arakak ku wis kataraksan gikak wis kote batekte gikak inyewatma avititak uyakni.

Ku pariye batekye gikak Uhokri, igi batekye gikakkis giyakivwi hiyeg hawata

¹⁹ Igkit Kiyavwiye Uhokri batek ukakwiy. Kuri wixwiyme butte batek gikak.

²⁰ Heneme ku pahavwi awna: “Nah batek gikak Kiyavwiye Uhokri”, giyakime hiyeg ig ka batek gikak, nikwe inakni giwn wasaymaka akiw. Ku yis hiyap ig ka batek gikak giyaki hiyeg ku pariye ig hiyapnigwatnene, mmahpaki ik adahan ig batek gikak Kiyavwiye Uhokri ku pariye ig kane hiyavgiwatnene?

²¹ In Uhokri gikumadukan awna wotwiy: “Ku pahavwi batek gikak Kiyavwiye Uhokri, amawka ku ig batek gikak giyaki hiyeg hawata.”