1 João 2 - Uhokri Gahegbetawni Nukune akak Sawmus

Jesus wawnamnihtenwiy

¹ Nukamkayuvwi, nah awahkis inin kagta yimin kahadbe yis ka taraksa. Heneme kibeyne ku wixwiy kataraksan, wixwiy kadahan wawnamnihtenwiy. Ig Jesus Cristo igi wawnamnihtenwiy. Ignewa waditye. Ig awnamnihwiy git Wigwiy.

² Ignewa umahkiswe udukwenavrikwiy adahan katiwnihpiye utaraksanwiy. Ignewa katiwnih madikte hiyeg gitaraksankis amadgaya inin.

Ku pariye igyewa Uhokriyan igi ihpa ariwn Uhokri gikumadukan

³ Ku wis ihpene ariwn Uhokri gikumadukan, nikwe innewa areketni wot ku wis inyewa gihiyekten Kiyavwiye Uhokri.

⁴ Ku pahavwi awna: “Nah hiyak Kiyavwiye Uhokri kabayntiwa”, heneme ku ig ka ihpa ariwn Uhokri gikumadukan, nikwe ig wasaympiye. Ig yuma hiyakemniki ku pariye inyewatnene ay abet gihiyekemni.

⁵ Igme ku pariye ihpene Kiyavwiye Uhokri giwn, ignewa ku pariye inyewa batekye gikak Kiyavwiye Uhokri. In wihpan Kiyavwiye Uhokri giwn innewa areketni wot ku wis pahavwiwa gikak Jesus Cristo.

⁶ Mmanawa ku pahavwi awna: “Nah pahavwiwa gikak Jesus Cristo”, amawka ku ig wew akak gihiyekemniwa Kiyavwiye Jesus.

Ku pariye igyewa Uhokriyan igi batekye gikakkis hiyeg

⁷ Nukebyuvwi kibeynevwi, nah kinetihwekere yit amin Uhokri gikumadukan. Gikumadukan adahan wis batekak pawtak. Inakni gikumadukan kawki nukunema. Kawki avim ininma in ayma. In kuwis ayivwad ay kuwis. Wixwiy ayipa kuwis timapni minikwak.

⁸ Heneme kuri inakni gikumadukan adahan wixwiy batekak pawtak in ke wotbe in nukunebe wotwiy. Mmanawa kuwis amisnavye mpiye abetitak uhiyekemniwiy. Kuri kabutniki inyewatnene in uguhne uhiyekemniwiy ku avim inin. Igwa Cristo iha inakni Uhokri gikumadukan. Inyewa ig batek ukakwiy. Kuri wixwiyme batekak pawtak hawata ku samah ig batek ukakwiy.

Ku pahavwi batekye gikakkis madikte hiyeg in ke wotbe kabutniki aybe abet gihiyekemni

⁹ Ku pahavwi awna: “Kiyavwiye Uhokri kuwis uguhe nuhiyekemni”, heneme ku ig gidukwenewa ig ka batek gikak pahavwi hiyeg, amun ini nikwe in ke wotbe amisnavye kuviknene aybe abet gihiyekemni.

¹⁰ Heneme ku pahavwi batekye gikakkis madikte hiyeg, amun ini nikwe in ke wotbe kabutnikinen aybe abet gihiyekemni. Ayge nikwe ig ka taraksa gikakkis hiyeg.

¹¹ Igme ner ku pariye kane batek gikak pahavwi, igi ke wotbe he amisnavyenen aybe abet gihiyekemni. Ig ke pahavwibe ku pariye wewne abet amisnavye, ig ka hiyavwa ku kitwiye ig wew. Ik adahan ner taraksa ka aynsima mmanawa ig manan gihiyekemni.

Yaytak kewa bakimnayhbe, kewa takwaviyebe, kewa kiyavwiyegbenbe ay abet yihiyekemni

¹² Yis ku pariye kene bakimnayhbe, nah awahkis inakni inetit yimin mmanawa Kiyavwiye Uhokri kuwis bayahminay ariw yitaraksan awaku ku samah yis Jesus gihiyegavu.

¹³ Yisme ku pariye kene kiyavwiyegbenbe, nah awahkis inakni inetit yimin mmanawa yis hiyak Kiyavwiye Uhokri kabayntiwa yis hiyakni ku ig kuwis ay ku samah yumahte hawkri. Yisme ku pariye kene takwaviyebe, nah awahkis inakni inetit yimin mmanawa yis kuwis matekbete wavitye gihawkan.

¹⁴ Yisme kene bakimnayhbe, nah awahkis inakni inetit yimin mmanawa yis hiyakni kabayntiwa ku ig Kiyavwiye Uhokri ignewa Wigwiy. Yisme kene kiyavwiyegbenbe, nah awahkis inakni inetit yimin mmanawa yis hiyak Kiyavwiye Uhokri kabayntiwa yis hiyakni ku ig kuwis ay ku samah yumahte hawkri. Yisme kene takwaviyebe, nah awahkis inakni inetit yimin mmanawa yis detyevwi. In Kiyavwiye Uhokri giwn misakwa ay abet yihiyekemni. Yis kuwis matekbete wavitye gihawkan.

Ku pariye igyewa Uhokriyan igi ka batek akak batekka amadgaya inin

¹⁵ Ka yi muwaka batek akak ini hiyakemniki mbeyevye ku pariye hiyeg kane Uhokriyanvuma batek nikak. Kawnata yi muwaka batek akak gewkanbetkis. Ku wis batek akak ini hiyakemniki amadgaya inin, amun ini nikwe wis ka batek gikak Wigwiy.

¹⁶ Ignes kane Uhokriyanvuma gihiyekemnikis in ka Wigwiyma gihiyekemni ay gimunkis. Ku wixwiy aharit batekka amadgaya inin, in ka Wigwiyma gihiyekemnima. Ku wixwiy aharit ini kabayka amadgaya inin ku pariye wis hiyap akak wowtyak, in kawnata Wigwiyma gihiyekemnima. Ku wixwiy keh uwantiwiy akak wewkanbet amadgaya inin, in kawnata Wigwiyma gihiyekemnima. Akebi ini hiyakemniki ka ayta giwntakma Kiyavwiye Uhokrima. In ayta ariwntak kane Uhokriyanvuma gihiyekemnikis.

¹⁷ Neras ku pariye kane Uhokriyanvuma igkis biyuknek payak akak ini gihiyekemnikis. Igme ku pariye kehne Kiyavwiye Uhokri gibetki igi aymuhwa adahan avanenekwa.

Ku pariye igyewa Uhokriyan igi kawohkigahaw git Jesusnen

¹⁸ Nukamkayuvwi, amaksemni hawkri kennesa kuwis. Yis kuwis kinetni gak pahavwi ku pariye danuhnek amaksemni hawkri ku pariye ikawvari ku ignewa Cristo bawa ig Cristo givetunya. Nukebyuvwi, ayipa ka aynsima hiyeg kewa igbe kuwis danuh gavitkiya. Ini areketni wotwiy ku amaksemni hawkri kennesa nidawnhan.

¹⁹ Igkis neras hiyeg pes ubetitakwiy wixwiy Jesus gihiyegavu bawa igkis ka igkisyewatma Uhokriyanvuma. Wake igkis igkisyewatbe Uhokriyanvube, nikwekam igkis gidukweneswa kawohkigahaw git Kiyavwiye Jesus hawata ke wixwiybe. Heneme igkis kuwis pese ubetitakwiy. Ini areketni huwewe ku igkis ka igkisyewatma Uhokriyanvuma.

²⁰ Wixwiyme ku pariye wixwiyewa Uhokriyanvu ig Kiyavwiye Uhokri Gitip barewvitye kawihwiy adahan uguhne uhiyekemniwiy. Ayge nikwe wixwiy madikte hiyeknekuye Uhokri gihiyekemni kabayntiwa.

²¹ Nah ka ikiyi ku yis ka hiyakma ku pariye hiyakemniki inyewatnene. Ka innema keh nah awahkis inakni inetit yimin. Heneme nah awahkisni yimin awaku nah hiyakni ku yis kuwis hiyakni. Nah he ikene yihiyekemni. Ku pahavwi ka kinetihwa inakni inyewatnene hiyakemniki yit, nikwe ig wasaympiye.

²² Ku pahavwi awna yit ku Kiyavwiye Jesus ka Uhokri gikanyanma adahan ukumaduketniwiy, igi wasaympiye. Igi Cristo givetunya. Ku samah ig tukuhe nernewa Kiyavwiye Uhokri gikamkayh, amun ini nikwe ig tukuhpiwata Wigwiy.

²³ Mmanawa ku pahavwi awna: “Jesus ig ka Uhokrima gikamkayhma”, nikwe ig yumahwa Wigwiy ay givit. Heneme ku pahavwi awna: “Jesus ignewa Kiyavwiye Uhokri gikamkayh”, nikwe ig Wigwiy ay givit.

Ku wis huwithasa uhiyekemni arit Uhokri giwn, wis ka kinikiswa

²⁴ Yisme ka henema, nukebyuvwi. Nikwe misakwanay akak inakni Kiyavwiye Uhokri ginetni inyewatnene ku pariye ekkepka yit minikwak ku aysaw yis pitatye wagese yihiyekemni gidahan Kiyavwiye Uhokri. Ku yis misakwa akak inakni Kiyavwiye Uhokri giwn, amun ini nikwe yis misakwa yidukwenewa pahatwowa yihiyekemni gikak Wigwiy gikak gikamkayh.

²⁵ Mmanawa ignewa ikakse wotwiy adahan wixwiy aymuhwa gimun adahan avanenekwa.

²⁶ Nah ikene inakni yihiyekemni hene amadgatak inin kagta adahan yis ka kinikiswa gitkis neras ku pariye yikinsetnivwi.

Ku wis huwithasa uhiyekemni git Uhokri Gitip, wis ka kinikiswa

²⁷ Wixwiyme ka kema ignesma mmanawa wixwiy kawihkiska Kiyavwiye Uhokri Gitip uvititwiy adahan ig uguhne uhiyekemniwiy. Ig misakwa ay uvitwiy adahan avanenekwa. Inneki keh wixwiy ka muwaka kannuhwa gitkisnen hiyeg amadgayavu inin. Ignewa Kiyavwiye Uhokri Gitip ukannuhtenwiy. Ig kannuhwiy amin madikte. Ig akki wotwiy hiyakemniki ku pariye inyewatnene. Ig ka akki wotwiy ku pariye kane inyewatma. Kuwis ig kannuhwiy adahan ku samah wixwiy misakwa pahavwiwa gikak Jesus Cristo. Nikwe ka ba yi miniw giw. Misakwanabay gikak.

²⁸ Henewa nukamkayuvwi, misakwanabay pahavwiwa gikak Jesus Cristo. Wewnay akak gihiyekemninen. Nikwe aysawnemenek ku aysaw ig hiyapkiswa wotwiy akiw, wixwiy ka marenpima gibohri. Wixwiy kiboka gitivutnek avim ini ku aysaw ig danuh atan.

Ku pariye igyewa Uhokriyan igi keh kabaykanen

²⁹ In huwewe wotwiy ku Kiyavwiye Uhokri keh kabaykanen. Nikwe ku pahavwi keh kabaykanen, igi Uhokriyan.