1 João 1 - Uhokri Gahegbetawni Nukune akak Sawmus

Jesus Cristo ignewa keh wixwiy aymuhwa gimun Uhokri

¹ Minikwak avit hawkri humaw ner ku pariye “Uhokri giwn” ayipa ig ay kuwis. Ig kanumka Uhokri giwn mmanawa ignewa ekkene wotwiy ku samah Uhokri gihiyekemni. Ignewa ku pariye keh wixwiy aymuhwa gimun Kiyavwiye Uhokri adahan avanenekwa. Akakwa utaybi usuh timavgi. Akakwa wowtyak usuh hiyavgi. Usuhwa hiyepnenekwa gihivak. Usuh daxgi akakwa uwakuh.

² Ignewa hiyakemniki dehetniye hiyapkiska wotuh. Usuh hiyavgi. Kuri usuh kinetihwene gidahan. Usuh kinetihwene yit gimin. Ignewa keh wixwiy aymuhwa gimun Wigwiy adahan avanenekwa. Ig ay gikak Wigwiy aynte inurik. Heneme kibeyne, ig kuwis hiyapkiswa wotuh ay amadga inin.

³ Usuh kinetihwa yit amin ku pariye usuh hiyap. Usuh kinetihwa yit amin ku pariye usuh timap. Mmanawa umawkan yis darihwak kabayntiwa gikak Wigwiy gikak gikamkayh Jesus Cristo payak ukakuh.

⁴ Inneki keh usuh awahkis inin kagta yimin kahadbe yis ivegbohin, yis batek yinaktin ka aynsima payak ukakuh.

Uhokri gihiyekemni ke wotbe in kabutennebe yuma patahwaki nibet

⁵ Kuri usuh akkite yit inakni inetit ku pariye usuh timap gibiyaptakwa Kiyavwiye Jesus Cristo. Ig awna wotuh: — Uhokri gihiyekemni ke wotbe in kabutennebe. Ku samah kabutniki ka amava amisnavye nibetit ig kawnata amava patahwaki abetit gihiyekemni.

⁶ Ku wis awna: “Nah wewne gikak Kiyavwiye Uhokri”, heneme ku wis amava patahwaki abetit uhiyekemni, nikwe wis udukwenewa ke wotbe wis wewnenebe abet amisnavyebe. Ku wis awna inakni hene, amun ini wis wasaymewne. Wis awna ku wis wewne gikak bawa ka inyewatma. Mmanawa uhiyekemni ka maguyema.

⁷ Heneme ku wis isaksa Kiyavwiye Uhokri uguh uhiyekemni adahan wis hiyap uvathawni, in ke wotbe wis wewnebe abet kabutnikibe, hawata ku samah ig ay abet kabutniki. Amun ini nikwe wis darihwak gikak Kiyavwiye Uhokri. Mmanawa ig Kiyavwiye Uhokri gikamkayh Kiyavwiye Jesus ku samah ig sukase gimig udahanwiy ig barewbetha uhiyekemniwiy ariw madikte uvathawniwiy.

Amawka wixwiy akkamnih utaraksanwiy

⁸ Ku wis awna: “Nah yuma nuvathawni”, amun ini wis kinisne uvitwa. Wis ka hiyak ku pariye inyewatnene ay avit uyakni.

⁹ Igme Kiyavwiye Uhokri ig waditye. Ig kis adahan wis kamaxwa givitit. Ku wis akkamnih utaraksan git, wis hiyakni ku ig bayahminaw ariw ini utaraksan, wis hiyakni ku ig barewvithaw ariw madikte uvathawni.

¹⁰ Heneme ku wis awna: “Nah yuma nutaraksan”, amun ini wis ikene ke wotbe Kiyavwiye Uhokri wasaympiyebe. Mmanawa wis ka ihpa inakni giwn adahan ku samah ig awna ku wis taraksavye hiyeg.