3 Yohana 1 - Pokomo

¹ Mimi muzee, nyakukworeani wewe ḅamu jwangu Gayo nikutsakiyee muno.

² Ḅamu jwangu mutsakwa, nyakukuyombeani ya kwamba mambo yakwendeye urembo na uwe na matsea mwiini. Nimanya ya kwamba kiruhu le nku untu.

³ Ami ninjijwa ni tsekea hii kwipfokudza wangine wa hawa wandugu, wakidza wakisumwiiya namuna ugijiyevyo kusumama hachini, dza nikumanyievyo ya kwamba u muntu wiyenaishi hachini!

⁴ Ntaku kintu chichonanitsekeza dza kusikia ya kwamba, hawa wanangu watsakwa wakuishini hachini.

⁵ Mutsakwa jwangu, kazi wiyokuwahendeani hawa wandugu weonazunguuka na kusumwiiya, ni kazi ya kuhikizika muno, hat̯a ingawa wao ni wantu usiowamanya.

⁶ Hawa hawa wantu waḍisumwiiya hiḍi tsanganiko dzuu ya haya matsakoyo kwao. Ḍinawa dzambo dzema ukiwangiza kwendeleani na charo chao na njia ya kwamba inamutsakiza Muungu.

⁷ Koro wepfonjia charo cha kwenda na kuhenda kazi ya Ḅwana, wadziza kupfokea ugijo uḍewonse kuyawa kwa wantu wasiokuwa wahikiza.

⁸ D̯ubva swiswi hunamala kuwapfa ugijo wa kula namuna hawa wantu, hupate kugijiijana nao kwa hi kazi ya kusumwiiya hi hachi.

Dzit̯unzeni na t̯aḅia dza hizi za Diotirofe

⁹ Niwa nyora ḅaruwa mfufi kwa hiḍi tsanganiko ḍya huko kwenu. Ela Diotirofe, adzihendezeye kitsampizi, kadziza kunisikia.

¹⁰ D̯ubva nidzepfokudza, haya yonse ahendeyeyo nayaḅaa-ḅaa tswee. Kakuhungiziani mambo mazuka mazuka menji na menji. Na dza kwamba hiḍyo hiḍyo ntaḍikut̯osa, kanjia kudzizani kuwapfokea hawa wandugu. Ana hat̯a kuwavingira hawaḍe weonatsaka kuwapfokea, na hat̯a akawayavya tsanganikoni!

¹¹ Mutsakwa, nkudzot̯aḅe myenendo mizuka, t̯aḅa myenendo myema. Kula eyenahenda mema huyo njwa Muungu. Ela kula eyenahenda mazuka nkadzamumanya Muungu.

¹² Wantu wonse wakunenani wema wa Demetirio. Na hat̯a namuna eyonakigija hichi chuuwo cha hachi, vinayanga kwamba ni muntu mwema. Naswi hwakwongezani na ushaahiḍi wehu, nawe mwenye kumanya ya kwamba hwichokunenani swiswi ni ḍugha.

Chuuwo cha mwiso

¹³ Nina menji na menji ya kukwambia, ela si haḍya ya kuyakwambia yonse na ḅaruwa.

¹⁴ Nyakudzikwat̯yani ya kwamba hunaonana si hat̯a kae, na hunanena kanwa na kanwa.

¹⁵ Ikaa naghea. Hawa waḅamuzo wonse weo huku wakukedhya nto. Naswi hukedhyeye waḅamu zehu wonse weo huko huko, mumodza kwa mumodza.