2 Yohana 1 - Pokomo

¹ Mimi muzee, nyakukworeani wewe muke utsanijwee ni Muungu. Nyakukworeani wewe na wanao nimutsakiyeo muno. Simi t̯u nimutsakiyee, ela hat̯a na hawaḍe wonse waimanyiyeo hi hachi. Wamutsaka

² kwa dzambo ḍya kwamba hi hachi yaa kuzimuni mwehu na inawa naswi maishi.

³ Muungu Baba, na Yesu *Kirist̯o, Mwana jwa huyu Baba, nawahuvodhye nto, wahufwiye t̯ei na kuhupfa maisha ya naghea. Na wanavihupfa ikiwa kwamba hukaa hachini na matsakoni.

Ishini hachini na mutsakane

⁴ Ami niwa na tsekea hii, nipfokudza nikiwaona wangine wa hawa wanao wakuishini hachini, dza viviḍe vya Baba ahuamuriyevyo!

⁵ D̯ubva wewe muke utsakijwe, nichokukworeani kukuyomba, ni kwamba hutsakane swiswi na swiswi. Hi hii amuri si amuri ngeni hat̯a, ni iiḍe amuri hwiyokuwa nayo hangu ḍabvu.

⁶ Haya matsako niyokunenani ni kwamba, ni had̯i huzigije hizi amuri za Muungu. Na dza musikiiyevyo hangu ḍabvu, hi amuri yakwe ni hii ya kwamba, muishi maisha ya matsako.

⁷ Humu lumwenguni kuhika waalimu wenji na wenji weo na makulekule. Hawa ni wantu weokudzizani kuhikiza ya kwamba Yesu *Kirist̯o kadza dza mwanaad̯amu. Wantu dzao ni wapfinga Kirist̯o na ni wantu weonakulakula.

⁸ D̯ubva dzit̯unzeni, ili kazi zenu muhendeyezo zitsekudzadziaria ḅasi, ela mudzemupate maipfo yenu mazima!

⁹ Yuḍejwonse eyenayawa nze ya mayongweezo ya Kirist̯o, akavuka mimpaka, huyo nka haria na Muungu. Ela yuḍejwonse eyenakaa kuzimuni mwa haya mayongweezo, ana haria na huyu Baba na huyu Mwana.

¹⁰ D̯ubva muntu yuḍejwonse akimudzia, na akitsamudzia na haya haya mayongweezo, namutsemukaraḅisha nyumbani kwenu. Na hat̯a kumukedhya, namutsemukedhya!

¹¹ Koro yuḍejwonse amukaraḅishiye muntu dzae nyumbani mwakwe, kakugijanani nae kuhenda haya mazukaye.

Chuuwo cha mwiso

¹² Nina menji na menji ya kukwambia, ela sikitsaka kuyakworea yonse humu ḅaruwani. Nyakuyoweeyani ya kwamba nakut̯embeeya, ninene nawe kanwa na kanwa, ili hupate kunjijwa ni tsekea t̯ipu.

¹³ Hawa wana wa imbuḍyo atsanijwe ni Muungu, nao wakukedhya nto.