2 Wakorint̯o 4 - Pokomo

Udhaifu wa mwanaad̯amu na nguvu za Muungu

¹ Muungu kahupfa hu huu uhumisi kwa t̯eiye, ndookomu naswi ntahufwe mojo kuuhenda.

² Mambo ya yutswa yeyonahendwa kisiri-siri, swiswi huyadziza. Ntahukwaa wantu wa makulekule wala wantu weonakiperuya chuuwo cha Muungu kinene nsuwe. Swiswi hi hachi ya haya *Maagu Mema, hunainena wekeani tswee na Muungu akiwa shaahiḍi. Hunahenda hivi, hukidzikwat̯ya kwamba kula muntu anaona kwamba haya hwiyokuhendani ni mambo ya sawa.

³ Koro ikiwa kwamba haya Maagu Mema hwiyokusumwiiyani ni momu na ntayaimukike, ḅasi ni momu na ntayaimukike kwa hawaḍe weokwaarani t̯u.

⁴ Wanadziza kuhikiza kwa kwamba, huyu muungu jwa mazuka ya huju huju lumwengu kawafinikiza hizi akili watseimuka. Ntawawezi kuuona hu muyanga wiwokuwayangaiyani. Huu ni hu muyanga wiwonayavigwa ni haya Maagu Mema dzuu ya marembo ya *Kirist̯o eye dza Muungu mwenye.

⁵ Haya hwiyokusumwiiyani si dzuu yehu swiswi, ela hwakusumwiiyani dzuu ya Yesu Kirist̯o kwamba ni Ḅwana, na kwamba swiswi hu wahumisi wenu kwa dzambo ḍya Yesu.

⁶ Huyu Muungu ambiye, “Nakuyangae muyanga humu kizani,” ndiye jeje ahendezeye muyangawe uhuyangaiye myojoni mwehu. Hu muyanga unahupfa kuyamanya haya marembo ya Muungu, yeyonayangaa humu usoni mwa Kirist̯o.

⁷ Swiswi hwaa dza nyungu za haka zizonawekwa nkandi ya kiruhu. Hi inayanga kwamba, hizi nguvu nkuu za hi injili ntaziyawe kwehu, zinayawa kwa Muungu.

⁸ Hunakuntiswa d̯ina na kula njia, ela ntahudhimwe; kajela zinahunjia ela ntahufwe mojo.

⁹ Wantu wanahukuntisa d̯ina, ela Muungu nkanahuyatsa. Myeedha ingine wantu wanahuicha mutsangani, ela ntahufwe.

¹⁰ Kut̯wa hwaa hat̯arini ya kuyagwa dza hiviḍe vya Yesu ayagijwevyo. Hivi huivyo mojo amaale, vyakuyangani kwamba, Yesu amaale kakuishini kuzimuni mwehu.

¹¹ Maishani mwehu mwonse, kut̯wa hwaa hat̯arini ya kuyagwa kwa dzambo ḍya Yesu. Hivi huivyo mojo amaale, vyakuyangani kwamba, Yesu amaale kakuishini kuzimuni mwehu swiswi hwiwo wantu wa kufwa.

¹² Swiswi hwakuuḅwani-uḅwani ni kufwa kwa dzambo ḍya kumusumwiiya nywinywi, ela kwenu nywinywi hiḍi hiḍi ḍinamumpa maisha ya kiruhu.

¹³ Vyoregwa humu matsoroni kwamba, “Ninena kwa dzambo ḍya kwamba nihikiza.” Na kwa kwamba huna iyo aina modza ya faro, naswi hunanena kwa dzambo huhikiza.

¹⁴ Koro humanya ya kwamba, Muungu amufufwiiye Ḅwana Yesu, kadzahufufuya naswi dza evyomufufuya Yesu. Makisa anahuhwaa swiswi pfamodza nanywi, anahuweka usoni kwa Yesu.

¹⁵ Haya haya yonse ni kwa dzambo ḍyenu. Wantu zaid̯i na zaid̯i wakigija kupfonywa kwa t̯ei ya Muungu, wantu wenji wanamuyaviza ḍuḍa Muungu na kumushad̯a zaid̯i na zaid̯i.

Mukirist̯o anaishi kwa faro

¹⁶ Kwa hivyo swiswi ntahufwe mojo. Hat̯a ingawa mii yehu yakusiani mpompowe mpompowe, ela untu wehu wa kiruhu wakumbakwani upfya nsiku ḅaad̯a ya nsiku.

¹⁷ Hizi d̯ina hwizokukuntani si d̯ina za muḍa muyeya, na hukiziinganya na haya yadzeyokudza, si d̯ina nkuu za kwambadze. Koro zinahuyehea marembo makuu ya kuishi na Muungu maishi.

¹⁸ Haya hwiyokuyoweeyani si mambo hwiyonaona na matso, ela ni mambo yasiyoonekana. Haya yeyonaonekana na matso nza muḍa t̯u, ela haya yasiyoonekana na matso yanakaa maishi.