2 Wakorint̯o 2 - Pokomo

¹ Ndookomu nihuna kutsakudza kwenu mweedha ungine, nitsekudzamungiza tsungu.

² Koro kudza kwangu kwenu kundemungiza tsungu muhupfu! Ndookomu ntakundeewa muntu jwa kuningiza mojo, kwa kwamba nyonse mundeewa muna tsungu.

³ Maana nimworeeyo hihiiḍe ḅaruwa ni kwamba, sikitsaka kudza kwenu huhuuḍe wakati. Koro t̯ambere nidziye huhuuḍe wakati, mundeningiza tsungu muhupfu, na huku ndinywi hawa wantu wa kwamba mundenitsekeza. Na nina hakika kwamba nipfonawa na tsekea, nanywi nyonse munawa na tsekea.

⁴ Hihiiḍe ḅaruwa niimworea na mojo muziho wiwokuwa na tsungu mwinji huku mitsozi ikinibiga ḅagwi. Sikuimworea kumungiza tsungu, ela niimworea mupate kumanya namuna nimutsakiyevyo.

⁵ Hu tsungu ningizijweo, sikuungizwa mimi heket̯u hat̯a, ela hat̯a nanywi; hat̯a ni kwa uchuchu uwanjia na wangine wenu. Sit̯aki kuwa mukali muno kwa huyu muntu.

⁶ Koro hi adhaḅu apfegejweyo ni wenji wenu, imut̯osa.

⁷ D̯ubva ni had̯i mumuyatsiye na mumungize mojo, atsekudzanjijwa ni tsungu hat̯a afwe mojo.

⁸ Ndookomu nyakumuyombani mumuyange kwamba mumutsaka hachi!

⁹ Nimworea hihiiḍe ḅaruwa nipate kumupima nimuone kwamba munanisikia kula nichonamwambia ambu hat̯a.

¹⁰ Mukiyatsia muntu kwa haya ahendeyeyo, nami pia huyo muntu nimuyatsia. Ikiwa kwamba nimuyatsia muntu, kwa tsowa ḍiḍeḍyonse ḍya kwamba ayatsijwe, namuyatsia usoni kwa *Kirist̯o kwa dzambo ḍyenu.

¹¹ Nahenda hivi nipate kumutsovya Shaat̯ani nguvu dzuu yehu, koro malengoye huyamanya.

Kirist̯o ndiye eyenahupfa kushinda

¹² Nipfokwenda Tiroa kusumwiiya *Maagu Mema dzuu ya Kirist̯o, Ḅwana kanifungwiiya njia ya kuhenda kazi hukuhukuḍe.

¹³ Ela mojo udziza kuniingamaa, kwa kwamba hukuhukuḍe ndugu Tito sikumuona. D̯ubva niḍamana na hawa wantu na nigonzowa nyenda Makedonia.

¹⁴ Ela Ḅwana ashad̯we! Swiswi hwiwo hariani mwa Kirist̯o, Muungu kahuweka dza maheka wa Kirist̯o. Kahuhendeza humuuḅe Kirist̯o dza maheka akwakuyangani ushindi wakwe. Muungu kakuhutumiani swiswi kusumwiiya haya maagu dzuu ya Kirist̯o kula pfantu, yakad̯achaa dza manunkanto.

¹⁵ Koro swiswi hwaa dza vumba ḍiḍyonanunka urembo, ḍiyavijweḍyo mvuugiya kwa Muungu ni Kirist̯o. Hi shire ya hiḍi vumba inahandaiya kahi ya hawaḍe weokupfonywani na hawaḍe weokwaarani.

¹⁶ Kwa hawaḍe weokwaarani, hi ni harufu nzuka iyonayaga. Ela kwa hawaḍe weokupfonywani, haya ni manunkanto yeyonayeha maisha yasiyosia. D̯ubva, eyenaiweza kazi dzehii ni ga?

¹⁷ Swiswi ntahukwaa dza wangine wenji na wenji weonahwaa kusumwiiya chuuwo cha Muungu dza kwamba ni bit̯i t̯u ya kudzilachia maisha. Ishinu, swiswi hunasumwiiya na myojo midheru usoni kwa Muungu, kwa kwamba ndiye ahuhumie na hu wahumisi wa Kirist̯o.