Psalm 8 - Tjukurpa Palya

Davidalu inma nyangatja walkatjunu Inmaku Mayatjaku inma inkapai tjuṯangku kitangka tjungu inkanytjaku.

¹ Mayatja God, aṉangu manta winkitjangkula nyuntunya kulini nyuntu panyan mayatja witulya puḻka nyinanyi wiṟu mulapa munun ilkaṟingka pitalytji puḻkangku uwankara alatjiṯu irnyaṉi.

² Kaya tjitjingku iṯingku kuḻu nyakula inma inkara nyuntunya mirawaṉipai. Ka nyuntumpa kuraringkupai tjuṯangku nyuntunya puṯu analpai nyuntu witulya puḻkangku markunnyangka.

³ Panya mungangkaṉa ilkaṟi ira-nyakupai nyuntu panya paluntja, panya kinaṟa, kililpi kuḻu nyuntu tjunkunytja.

⁴ Munuṉa nyakula kulilpai, “God, nyuntu panyan puḻka mulapa, ka panya nganaṉa aṉangu tjuṯa minga puṟunypa. Palu nyuntu nganaṉanya ngaḻṯunytjungku kulilpai, Munulanyan aṯunymaṟa kanyilpai.

⁵ Panya nyuntu nganaṉanya tjunu puḻka mulapa nyinanytjaku nyuntula itingka pitalytji puḻkatjara.

⁶ Munu panyan nganaṉanya tjunu nyuntu panya paluntjitja uwankara mayatjarira kanyintjaku.

⁷ Panya nyuntu nganaṉanya tjunu uwankara aṯunymaṟa kanyintjaku tjiipi puluka inuṟa tjuṯa kuḻu,

⁸ munu tjuḻpu ilkaṟingka para-ngaṟapai tjuṯa munu uṟu unngu para-ngaṟapai tjuṯa kuḻu.”

⁹ Mayatja God, aṉangu manta winkitjangkula nyuntunya kulini nyuntu panyan mayatja witulya puḻka nyinanyi wiṟu mulapa.