Psalm 61 - Tjukurpa Palya

¹ God, kulinmaṉitju! Kuruntunanta ulara tjapini. Munuṉitju wanyu kuliṟa alpamilanma.

² Ngura nyanga parari-nguṟuṉa nyuntula ulara ma-tjapini alpamilantjaku, panya ngayuluṉatju kuwari kurunpa wawanyarira uparingu. Nyuntu panyan puḻi puḻka puṟunytju angatjuṟa kanyilpai, kaṉi ngayunya wankaṟu anga-kanyinma.

³ Nyuntu panyaṉitjun mukulya wiṟungku mirpaṉtju tjuṯangka-tawara anga-kanyilpai. Panya wall-pa ngurangka para-arintaṟa ngaṟapai kuṉpu alatjiṯu mirpaṉtju tjuṯa tjarpanytjaku-tawara, palu puṟunytjuṉin rawangku anga-kanyilpai.

⁴ Wanyuṉitju tjunama nyuntumpa Tinta Miḻmiḻṯa unngu, kaṉa nyara palula tiṯutjara mulapa rapa nyinaku nyuntu anga-tjutuṟa kanyinnyangka, panya tjuḻpu ngunytjungku nyaḻpingka anga-tjutuṟa kanyilpai aṯunypa nyinanytjaku, palu puṟunytjuṉi aṯunymaṟa kanyinma.

⁵ God, nyuntuṉin kulinu ngayulu nyuntunya kalkunnyangka, munu panyaṉitjun wiṟungku kulintjatjanungku pukuḻmanu. Panya nyuntu aṉangu nyuntunya waḻkulpai uwankara kuliṟa pukuḻmankupai, palu puṟunypaṉin nyuntu ngayunya ngapartji pukuḻmanu.

⁶ God, ngayulu nyuntula tjapini nganampa kinga wanka kanyintjaku, paluṟu wanka rawa nyinanytjaku. Munu palula maḻangka palumpa tjitji maḻatja maḻatja tjuṯa kuḻu kingarinyangka kanyilkatima tiṯutjarangku alatjiṯu.

⁷ Uwa Mayatja God, nganampa kingangka tiṯutjara tjungu ngaṟama paluṟu aṉangu tjuṯa mayatjangku aṯunymaṟa wiṟuṟa kanyintjaku. Munu palunya mukulyangku wankaṟu kanyinma tiṯutjarangku, panya mulapa nyuntu wantinytja wiyangku kanyilpai alatjiṯu.

⁸ Kaṉanta ngayulu tiṯutjarangku nyuntunya inma inkara waḻkuṟa mirawaṉiku. Munuṉanta nyuntunya kalkuntjatjanungku rawangku palyalku, tjiṉṯu kutjupa tjiṉṯu kutjupa.