Maikaku 1 - Tjukurpa Palya

Godalu Palumpa Walytja Tjuṯa Ngurkantankunytjikitjangku Kalkuntja

¹ Ngayuluṉa wati ini Maikanya ngura ini Maṟatjatjanya nguraṟa. Ka wati ini nyanganpa Tjatjamanya, Aatjanya munu Itjakayanya tjana manta Judah-ku mayatja puḻka nyinangi wanapari wanapari. Ka nyara paluṟu tjana nyinanytja-aṟangka Mayatja Godalu ngayunya tjukurpa puḻka tjuṯa nintiningi aṉangu Israelnga nguraṟa tjuṯatjara munu Judah-nya nguraṟa tjuṯatjara kuḻu, ka nyanganpa ngayulu kulintjatjanungku walkatjunanyi.

² Kaya kuwari ngayula kulila aṉangu uwankarangku manta winkinguṟu. Panya Godalu Mayatja Puḻkangku nyuranya ilkaṟinguṟu kura palyannyangka nyakula wangkara kuranmananyi.

³ Paluṟu kuwari nguwanpa pitjanyi ngura nyara ilkaṟinguṟu munu paluṟu mayatja puḻkangku puḻi murpu puḻka tjuṯa wiyalku,

⁴ ka puḻi paluṟu tjana uṟuringkuku, panya wax waṟungku kampanyangka uṟuringkupai, palu puṟunypa. Munu puḻi paluṟu tjana uṟuringkula karu puṟunypa wala winki ukalingkuku waṟarangka puṟunypa.

⁵ Palu nyaaku wanyu alatjiriku? Wiya, aṉangu Israelkunu tjuṯangku munu Judah-nya nguraṟa tjuṯangku kuḻu kura tjuṯa rawangku palyannyangka alatjiriku, panya paluṟu tjana Godala rawa tungunpungangi.