YOSWÖ 6 - PIPÏLIA

¹ Kikïkar ortïna kanasyanta Yeriko lasiny akwompö pipö Israel. Melö kimi chi nyo kilïtöy sany anta lïtï ori.

² Atolapay kïlenchï ECHOTYON Yoswö, “Kotönön Yeriko moriku nko pöytoghintenyi nko pikachi cho le nyökon.

³ Owitekwa kanasyante nko pich löwïr cho pö lïk kïnyïl akonga. Agh lenyoni osis mut nko akonga.

⁴ Ipöy nyu tïsï cho le mut nko odeny kontin mut nko odeny cho pö kuyo mökol ompö tawu Santuku Muma,* owitekwa nyu kanasyante kïnyïl mut nko odeny ompö asispa mut nko odeny kïmi tïsï kïkutöy kontin.

⁵ Otini kakut chane kontin kïchöghyö tya, kuteghyö pich ompö kiteghat nyo wow, kïrul nyu nayatu kanasyan lö wanka, kïpa nyu pich kutenar otini kera.”

⁶ Kïlenyona kïkur Yoswö tïsï akïlenchï, “Osïtö Santuku Muma akany kwip tïsï walaka cho le mut nko odeny kontin akuntaghogha Santuku ECHOTYON.”

⁷ Atolapay kïlenchï pïchay, “Atanga tagh awit kanasyante akany kïpa tagh pipö lïk kuntaghogha Santuku Muma ECHOTYON.”

⁸ Kïpa tïsichay le mut nko odeny ipöy kontin ompö tawu ECHOTYON kuntagha akikutöy kontinechoni, kïrïp nyu Santuku Muma kiyomisöto ECHOTYON chane lenyini kimwochï Yoswö pich.

⁹ Kuntaghogha pipö lïk tïsï cho kikutöy kontin, kïrïpï Santukunoni pipö lïk walaka, otini kikutotoy tïsï kontin.

¹⁰ Wölo kimwochï Yoswö pich lö, “Moteghyö anta angalan, amotöp ntökungwïna ngölyon kutïwekwo ntökwitïta otini omwowokwa lö, ‘Oteghyenö,’ oteghyekwa nyu.”

¹¹ Kïlenyona kwip Santuku Muma ECHOTYON kuwit kanasyantanay kïnyïl akonga akïmïlisyö möngot akïruyö kïyech keston.

¹² Atolapay kïnget Yoswö tökwoghö, kïsït tïsï Santuku Muma ECHOTYON.

¹³ Kwip tïsichay le mut nko odeny kontinekwa akuntaghogha Santuku Muma ECHOTYON akïkutotoy kontinechay. Kuntaghogha pïchay pö lïk tïsï, kïrïpï Santukunoni pipö lïk walaka.

¹⁴ Akuwit asispa odeny kanasyantanay kïnyïl akonga akïmïlisyö möngot. Kigh nyu lenyoni ompö osis mut nko akonga.

¹⁵ Kïnget kiwasan asispa mut nko odeny akuwit kanasyantanay lenyaye kïnyïl mut nko odeny. Ki asisoni onkït nyo kiwit chane kanasyan kïnyïl mut nko odeny.

¹⁶ Otini ketomtö kiwitata mut nko odeny akïkut tïsï kontin, kïlenchï Yoswö pïchay, “Oteghyenö! Ompöwölo kikïkonokwa ECHOTYON kanasyantanï.

¹⁷ Kikengot kanasyantanï kïpöyit ECHOTYON nko tïkwïn löwïr cho mito ori atökenyar, kïpoto cheporesyantanay le Raap nko pikökwa löwïr cho mito konyi cho ngötu, ompöwölo kiwïny ghotichay kikïyonta.

¹⁸ Wölo okïr kegh, tömacheng tïkwïn cho kikengot kïpöyit ECHOTYON atökenyar, tömopchï chïpö nko nyarïl möngo Israel.

¹⁹ Wölo kiketïlilchï ECHOTYON ropïyen nko koltin nko kari taghoy nko karïn. Kitöni tïkuchoni kaplawachpa Kö pö ECHOTYON.”

²⁰ Otini kilïm pich chöghöto kontin kuteghyö tya, kïrul nyu nayatunay lö wanka. Kïwö chi anka tïkwïl kutenar kïtopön tawunyi. Kïnam chane kanasyantanay.

²¹ Kïpara chok tïkwïn löwïr cho kimi kanasyantanay mïrön nko kor nko monïng nko poy nko eghin nko kechir nko sïkïröy.

²² Atolapay kïlenchï Yoswö pïchay le odeny kipa kïghotisyö, “Ape olïtö kö pö cheporesyantanay amïtï kungwïn sany nko pikökwa löwïr cho mito nko nyinte kïrïp kegh nko kiwalwalatenkwa.”

²³ Kïpa nyu pïchay kwodeny kö kighotisyö akumïtï Raap nko kwanta nko kame nko werkökwa nko pikökwa löwïr kïpa kïtïpï möngo Israel sany.

²⁴ Kïpel chane kanasyantanay, kïnöghö tïkwïn löwïr cho kimi ori. Kïngötï ropïyen nko koltin nko kari taghoy nko karïn cho kip chane kaplawachpa Kö pö ECHOTYON.

²⁵ Wölo kisörï Yoswö Raap cheporesyantanay nko kwanta nko pikökwa löwïr akïmang Israel nko ye, ompöwölo kiwïny nyinte pïchay kiyonta Yoswö kïghot Yeriko.

²⁶ Kyomchï nyu Yoswö muma atoni lö, “Chïpote chi ompö tawu ECHOTYON nyo teköy kanasyantanï pö Yeriko. Meghöy poretya chi nyo toröy kïteköy kanasyantanï akïmeghöy töwonionto chi nyo teköy kukoti.”

²⁷ Kïlenyona nyu kimi ECHOTYON nko Yoswö akïrumtö köromnyenyi ompö kore kïmïkul.