YOSWÖ 5 - PIPÏLIA

¹ Nyini kilïm pöytoghi pipö Amori löwïr, cho kimöngöy Yordan antakwagh okumpö ta nko pöytoghi Kanan löwïr cho kilekïto nanampa Kwen lö, kimuryö ECHOTYON pögho Yordan, tökwoghyö pipö Israel, kimeghö mutïnekwa akupot nyakanatengwa akwompö pipö Israel.

Mutat ompö Kilkal

² Ompö atoni, kïlenchï ECHOTYON Yoswö, “Igha rotwöy cho pö senkwet aimut pipö Israel.”

³ Kïlenyona kwigh Yoswö rotwöyi senkwet akïmut pipö Israel ompö Kipea Aralot.

⁴ Kïgh nyo kigh Yoswö kïmutisyö, kwompöwölo, kimeghö pich löwïr nko mïrön cho pö lïk ompö surkwen cho kipkana koro Misri.

⁵ Kïrkegh kimutote pïchoni löwïr kipkana Misri, wölo kitomönye kemut pich löwïr cho kikïyichï or ompö surkwen.

⁶ Ompöwölo kipesta pipö Israel könyis tömönut angwan ompö surkwen, ntökuwonyö löwïr cho kile pipö lïk cho kipkana Misri, ompöwölo kimelö kiter ngala ECHOTYON. Kiyomisyï ECHOTYON chane lö mösïwïyicha kokay koronay kiwolwolchï ECHOTYON papotïnekwa lö okonekwa, kor nyo kinyïghï chö akïwow kumata.

⁷ Kïlenyona nyu kimut Yoswö monekwa, cho kinget ECHOTYON kuker chane, ompöwölo kitomönye kemut ompö or.

⁸ Otini kimuchö mutata pipö Israel, kumpur otengwa ompö möngot ntökïsöpchö.

⁹ Kïlenchï ECHOTYON Yoswö, “Kanateghan arasï koro Misri ompö akwa asisete.” Kïkurö nyu atoni Kilkal nko ye.

¹⁰ Nyini kitek pipö Israel möngotinekwa Kilkal, kwigh Pasaka* nangat ompö asisto taman nko angwan nyo pö arawa, ompö mpöghoghöyi Yeriko.

¹¹ Akwam pagha korononi nko makatin cho puryö mumar nko pagh cho kakïkel asis nyo kirïpöy Pasaka.

¹² Kuwonyö omisyö nyo kïkuro mana asisoni, otini kyam pagha koronini amelö kitökïnyorï pipö Israel mana ngat, wölo kyam akwa cho pö koro Kanan könyinoni.

Yoswö nko chi pö chok

¹³ Nyini kirich Yoswö Yeriko, kïtopöntö akïsïwa chi nyo kighyongö tawunyi nyo kitïng chok. Kïwö Yoswö otini mi nyinte akïlenchï, “Ichinyi nyincha nya anta ichï punyontencha?”

¹⁴ Kïlö chichay, “Ewo, kangwïnan ye alïkwï wowïn pö lïkö ECHOTYON.” Kupïtyï nyu Yoswö ngwïny akïsagh, akïlenchï, “Mwochini ne ye echotyon mötworintenyu?”

¹⁵ Kïlenchï wowïnay pö lïko ECHOTYON Yoswö, “Ngwïsa kweghköku ompöwölo tïlil atoni ighyongonenyi.” Kwigh Yoswö lenyini.