YOSWÖ 3 - PIPÏLIA

¹ Nyini le tökwoghö kïnget Yoswö nko pipö Israel löwïr, ompö Syitim akïpa ntökwit Yordan, wölo kïmang kïtömö kwoghyö antakwagh.

² Otini kiwer osiswö sömökï, kïpa yetïntinö möngot,

³ akïmwochï pich lö, “Otini kasïwekwa tïsï cho le Lawi kïsïtöy Santuku Muma* ECHOTYON Tororötïnkwa angeta wölo komitö arïp,

⁴ atonkïtunö or nyo opetöy, ompöwölo melö kyapekwa aranete asistanka. Wölo marik Santuku Muma akany kïmi pöroyïn kwenunkwa nko nyo teno kilomita akonga.”

⁵ Kïlenchï Yoswö pich, “Otïlilö kegh, ompöwölo ighöy ECHOTYON töngönchin asïyech ompö kwenunkwa.”

⁶ Atolapay kïlenchï Yoswö tïsï, “Osïtö Santuku Muma apa antaghogha pich.” Kïsït nyu chane Santuku Muma akuntagha.

⁷ Kïlenchï ECHOTYON Yoswö, “Oghan kïgh asisete ompö nyi nyo ighöy pipö Israel löwïr kïkonyïtinyi, atökunkïtï chane lö, le ato kyomitan nko Musa, omitan nko nyi tïkwïl.

⁸ Aimwochï tïsï cho sïtöy Santuku Muma lö, ‘Otini katukwa sörömu pögho Yordan, oghyongö ori.’ ”

⁹ Kïlenchï nyu Yoswö pipö Israel, “Apkana yi atera ngala ECHOTYON Tororötïngwo.

¹⁰ Tosöwunö ompö yete lö mito Tororöt nyo satate kwenunkwa akï yonöy akwompö akwa nyo mötïny, pipö Kanan nko pipö Ititi nko pipö Ipiti nko pipö Peris nko pipö Kirkasyi nko pipö Amori nko pipö Yepusi.

¹¹ Nyoghöy kuntöghoghenokwa Santuku Muma nyo pö Echotyonto ngwïny kïmïkul, kïwö Yordan ori.

¹² Ye nyu akïla mïrön taman nko odeny ompö ortïna pipö Israel, chi akonga ompö or anka tïkwïl.

¹³ Akï nyini katyak kelyo tïsï cho sïtöy Santuku Muma ECHOTYONto ngwïny kïmïkul pögho Yordan, kïmuryot pögh cho keyintoy akughyö kutïkimö.”

¹⁴ Kiyintoy Yordan ompö osiswo kasa ntökuwachta. Kingeta pich emenikwa tökwoghyö Yordan, kuntöghoghchini chane tïsï cho ipöy Santuku Muma.

¹⁵ Otini kit tïsï cho kisïtöy Santukï Yordan akïtyak kelyekwa pögh,

¹⁶ kughyö pögh cho kiyinuno wöloto kutïkimö ompö wölnö le kanasyanta Adam nyo mito kamasu Saretan akïteny cho kiyintoy kïröytoy kugheghöy nanampa Arapa, akelentöy nanampa Paryan. Kwoghyö nyu pich, kurosöy Yeriko lö anyinö ate.

¹⁷ Otini kimi pipö Israel löwïr kwoghyot wölo tïyame, kïmi tïsï kughyongöy cho kisïtöy Santuku Muma ECHOTYON ompö kwenu Yordan ntökwoghyö pich löwïr.