YOSWÖ 23 - PIPÏLIA

¹ Kiwer osiswö cho chang, otini kökikutö ECHOTYON pipö Israel kalya ompö pungkökwa cho kimang kuwit chane, akï kikïyosit Yoswö nyoman,

² kïkur nyu nyinte pipö Israel löwïr, poyikwa nko kintöghoghikwa nko kirwokotikwa nko wowïntinekwa akïlenchï, “Kayositwan nyoman,

³ kyasïwekwa tïkwïn löwïr cho kighchï ECHOTYON Tororötïnkwa pipö punton akwompö akwa: ki ECHOTYON Tororötïnkwa nyo kiporyewokwa.

⁴ Kyokonokwa kïlïkwï chikwa koroswo puntonichay kingötï nko cho kyarïntan löwïr, kïngata Yordan ntökwit nanampa Kwen mi okumpö ta.

⁵ Yodoy ECHOTYON Tororötïnkwa chane akwompö akwa, akïyon tömosïwïyekwa chane ngat acheng korengwa kïlïkwï nyinkwa lenyini kiyomiswokwa ECHOTYON Tororötïnkwa.

⁶ Kïlenyona orip kegh, akaman agh tïkwïn löwïr cho kirote ompö kitapu Kirurut* pö Musa amamasta kamas nko kamas,

⁷ atömoghömö nko puntonichoni köngötyï kwenunkwa anta okur kaynötut pö tororötinekwa anta awalwal anta opöghisyechï chane anta asagh,

⁸ wölo mopïstö ECHOTYON Tororötïngwo le otini kyaghakwa nko nyete le ye.

⁹ Kikïyon ECHOTYON punton cho echön akwowesöch amöminye chi nyo kirïntakwa nko nyete le ye.

¹⁰ Yonöy chi akong ompö akwa pung 1,000, ompöwölo ECHOTYON Tororötïnkwa nyo poryewokwa, le otini kiyomisokwa nyinte.

¹¹ Orip kegh nyu lasiny, acham ECHOTYON Tororötïngwo.

¹² Wölo ato omïlisyekwa löt aghömö ompö kïgh anka tïkwïl nko puntonichete kidong kwenunkwa apïsï monekwa kwip kegh nko chikwa,

¹³ onkïtï nyu nyoman lö melö tökïyonöy ECHOTYON Tororötïnkwa puntonichoni ompö tawunkwa. Wölo lïku ngöghöp ompö akwa akïkarkegh nko sartï ompö köroswekwa anta kato cho rïtöy konyikwa, ntökïtenö owonyenökwa ompö koronï karam kikonokwa ECHOTYON Tororötïnkwa.

¹⁴ “Akï ye, karich oweghan ngwïnyinï, ankïtökwa ompö mïkuliskökwo nko söponwekwo lö, melö mi kïgh nyo le ompö akonga nyo kirarta ompö tïkwïn löwïr cho karamach cho kiyomiswokwa ECHOTYON Tororötïnkwa. Kikupuntö löwïr, marartanye ompö akong.

^15-16 Kipuntö ECHOTYON Tororötïnkwa tïkwïn löwïr cho karamach cho kiyomiswokwa nyinte. Ato apenyakwa muma* ECHOTYON Tororötïnkwa nyo kyamakwa tïkwïl, apöghisyechï tororötin walaka asagh, kwipkokwa nyu nyinte tïkwïl tïkwïn löwïr cho ghach, ntökïtenö owonyenökwa lömïs ompö koronï karam kikonokwa nyinte.”