YOSWÖ 20 - PIPÏLIA

¹ Atolapay kïlenchï ECHOTYON Yoswö,

² “Lenchinö pipö Israel, ‘Akïla kanastin cho kïryöghchini chay kyomwowokwa kuwerï Musa,

³ atökurïpchï chi anka tïkwïl kapar chi amelö kökwötï, lïku kanastinechï cho oghïpcheghonekwa ompö chi nyo mököy kitakat.

⁴ Muköy chi ntökurïpchï kanasyan akonga ompö kanastinechoni akughyongö kukat akimwochï poyi kanasyantanoni ngalechi. Atökumït chane nyinte kanasyan ori akutö wölo töpo akïmang nko chane.

⁵ Wölo ato töp kitökintö ntökïrïp nyinte, kïmelö kitöni kitökin rïmintononi kïnama morichi, ompöwölo kitïgh pöröryenyi ompö lelyot akitomö kurey kegh ato le tagh.

⁶ Möngöy nyinte kanasyantanoni ntökurwokyï poyï akumpur ntökïma Tïsin nyo Wow* nyo pö osiswechoni. Kïmïla nyu ngat pörintonay kanasyantenyi nyo kiripö nko katanyi.’ ”

⁷ Kïlenyona kengot Kedes ompö Kalilaya nyo mi koro kamas nyo pö Naptali nko Syekem ompö koro kamas nyo pö Epraim nko Kiryatarpa, nyoni kï Epron, nyo mi komos pö koro Yuda.

⁸ Kikïl chane Peser ompö Yordan antakwagh, okumpö kongasispa Yeriko, nyo mi surkwen wölo le rorok, koro Rupen nko Ramot Kiliad koro Kad nko Kolan nyo mi Pasyan koro Manase.

⁹ Kingot chane kanastinechoni kïpöyit pipö Israel löwïr nko cho le ta cho möngöy kwenungwa, atökurïpchï chi anka tïkwïl nyo kapar chi ompö lelyot, atömöpar kitökintö nyinte ntökïtenö kurwokyï poyï.