YOSWÖ 2 - PIPÏLIA

¹ Atolapay kiyonta Yoswö pich odeny sison cho le ghotï ompö Syitim, kïlenchï, “Ape aghota kore, mïr tya kanasyanta Yeriko.” Kïpa nyu pïchay ntökwit kö pö cheporesyan nyo kïkuro Raap akïruyö atoni.

² Kemwochï pöytoghinto Yeriko lö, “Kapka pipö Israel koronï nangatunete kïghot.”

³ Kïyonta pöytoghinto Yeriko chi kïlenchï Raap, “Mïtuna pïchï körutowunyi ompöwölo kapka tökïghot kore kïmïkul.”

⁴ Wölo kiwïng kokonay pïchay kwodeny akïlö, “Nyoman körutowanïn pich, wölo melö onkïtön wölo kapkana.

⁵ Nyaye kökakagh kamak kekar ortïna kanasyan kïlïtöy kiror, kïmonkïtwanye wölo kapa, arïpa chane lawel, onyorukwa tomönye kwit wölo low.”

⁶ Wölo kulang Raap pïchay pörkö parak, akïwïnchï chane mopö ori cho kikïrat aketïkim ompö pörkö.

⁷ Kipa nyu pïchay kïrïp chane ntökwit adoket nyo oghyot lalwa Yordan. Kikany kïpa pïchay kekar or.

⁸ Otini kitomö kïruyö chane kïpusta kokonay pörkö wölo mi chane,

⁹ akïlenchï, “Onkïtön lö kikïkonokwa ECHOTYON koronï akikemïghyecha ompö akwa. Kimeghö mïkulis piko koronete akwompö akwa.

¹⁰ Ompöwölo kikelïmacha wölo kiyamta ECHOTYON pögho Nanam nyo Pïrir ompö tawunkwa otini kyopkonokwa koro Misri nko wölo kyadekwa pöytoghichay le odeny pö pipö Amori cho kimi Yordan antakwagh, Sion nko Ok cho kyaparakwa.

¹¹ Nyini kikïlïmacha, kïmeghecha mïkulis amelö kingötyï chi anka tïkwïl nyakanat akwompö akwa, ompöwölo ECHOTYON Tororötïnkwa kï nyinte nyo mi yïm parak nko ngwïny.

¹² Ye nyu owolwolwanïn lö le wölini kaghwokwa nyo karam aghwanïn tïkwïl nyo karam nko kato paponyan, akonanïn machey nyo oghönonekwa.

¹³ Osörï paponyan nko yonyan nko werköcha nko tipicha nko pich löwïr cho pö korikwa atomökïpar.”

¹⁴ Kïlenchï pïchay nyinte, “Nya kïparecha Tororöt ato mökiwuchanyi nyo karam, ato menganytechanyi, akï ato konecha ECHOTYON koronï, kewuchanyi nyo karam ompö man.”

Kömïlisyö ghotï

¹⁵ Atolapay kureyteghö Raap chane ompö pörköyö kïlïtöy tïrisya, ompöwölo kimang nyinte kö nyo kikïtek nayatu kanasyan.

¹⁶ Kïlenchï Raap pïchay, “Ape atanga komos atömönyorwok pïchay köyörokwa awïng kegh ompö wöloni osis sömök ntökïtenö kïmïlisyö chane, opechï kegh pantangwo.”

¹⁷ Kïlenchï pïchay nyinte, “Melö omecha kiwalwalatanï keghwechanyi.

¹⁸ Otini kakipokyicha koronï irötyï pörköyo nyo pïrir tïrisyanï kereyteghenechanyi, atolapay ighömïtyï kongu, papongu nko yongu nko werkökwa nko katankwa kïmïkul.

¹⁹ Ato wö chi sany ompö kongu, kwomöy nyinte kisönkachi, melö omecha kïgh, wölo ato kïpar chi anka tïkwïl nyo mito nko nyi kö ori, kwomecha kisönkachi.

²⁰ Wölo ato inganytenyi ngalecha, melö omecha kiwalwalatengu nyï keghwechanyi.”

²¹ Kïlö Raap, “Nya kïlenyoni kamwaghakwa.” Atolapay kïpïstö nyu chane kïpechï kegh, atolapay kïrötyï pörköyö nyo pïrir tïrisyanay.

²² Kinget nyu akïpa kutang komos akïtïpï wölini osis sömök, ntökïmïlisyö pïchay, ompöwölo kirïp pïchay akïkït kelyön wölo mönyorïcha kïgh.

²³ Kimïlisyö ghotichay, ompö komos akïpa wölo mito Yoswö wero Nun akïmwochï tïkwïn löwïr cho kisïwa chane.

²⁴ Akïlenchï, “Nyoman, kikutö ECHOTYON koronini kïmïkul moricha akimeghö mïkulis pö pipö koronini akwompö acha.”