YOSWÖ 15 - PIPÏLIA

¹ Koros cho kinyorï pipö Yuda kïrïp kegh nko korikwa kï: kingata rotyo Edom okumpö tagh akwit surkwen pö Sin söröm okumpö tagh.

² Kïngata rotyengwa nyo pö okumpö tagh sörömu nanampa Paryan, kïngata nanam nyo kitïmï kegh kïparta okumpö tagh

³ akïwö kurel wölo kïpustegho Akrapim okumpö tagh akuwer ntökwit Sin akïpusta Kades Parnea ewu tagh akïmïrtö kuwer Esron akïpusta Adar akuwit kutang Karka,

⁴ atolapay kuwer ntökwit Asmon akïrip champilwa Misri, kïwö sörömunyi ntökwit nanampa Kwen, lïku nyoni sörömunkwa ompö ewu tagh.

⁵ Kingata rotye ompö kongasis nanampa Paryan akutor sörömu lalwa Yordan. Kïngata rotye ompö okumpö löt sörömu nanam otini keryama nko lalwa Yordan,

⁶ kurel rotyononi ntökwit Pet Okla, atolapay kurel Pet Arapa okumpö löt akïnam koghpa Poan wero Rupen.

⁷ Kïlït rotyot Depir kïngata tömko Akor akïwö lenyini kutang Kilkal okumpö löt, nyo kïpustegho kepetöy Adumim nyo mi mpöghogh okumpö tagh, atolapay kïwö rotyonay ntökurel kori pöghoni En Syemes, kïlïkwï sörömunyi Enrokel,

⁸ atolapay kuwer rotyot mpöghoghyo wero Inom akwit ngïnngïnpa Yepusi okumpö tagh (nyoni kï Yerusalem) akukana rotyot kutïng parak nyo lekïto mpöghoghyo Inom okumpö ta sörömu mpöghoghyo Repaim okumpö löt,

⁹ atolapay kungïr rotyot kutïng parak akïröytö kutang kori pöghoni Neptoa akïngata atoni kïlït kanastina kutïng pö Epron akïmïrtö rotyot kuwit ntökwit Paala, nyoni kï Kiryat Yearim

¹⁰ akuwit rotyonay Paala okumpö ta ntökwit kutïng pö Seir, kïsor ngïnngïnpa kutïng pö Yearim okumpö löt (nyoni kï Kesalon) akïröytö Pet Syemes akuwer Timna.

¹¹ Kukana ngïnngïnpa Ekron okumpö löt, atolapay kuwit rotyonay kïlït Syikeron akuwer kutïng pö Paala. Kïlït Yapneel, atolapay kuwonyechï rotyonay nanampa Kwen.

¹² Kïlïkwï sörömuto rotyot Nanamay Wow ompö okumpö ta. Kïlïkwï nyete rotyot nyo pö pipö Yuda, kïkarkegh nko korikwa.

Karïnta Kalep Epron nko Depir

¹³ Kikïmutyï Kalep wero Yepune kareranpa koro pipö Yuda lenyini kimwochï ECHOTYON Yoswö. Kikïmutyï Kiryatarpa, nyoni kï Epron, kanasyanta Arpa papoto Anak.

¹⁴ Kïyon Kalep werpö Anak kï sömök ompö atoni: Syesyay nko Aiman nko Talmay.

¹⁵ Akïweghö atoni akïporyeghö pipö Depir nyo kikïkuro tagh Kiryat Seper.

¹⁶ Atolapay kïlö Kalep, “Chi anka tïkwïl nyo rïntoy kanasyanta Kiryat Seper, oyilchinan cheptanyu Aksa.”

¹⁷ Kïwö Otniel wero Kenas werto ompö Kalep nyo mïnïng kïporyeghö akïrïnta kanasyantanay. Kuyilchï nyu Kalep nyinte cheptanyi.

¹⁸ Otini kikiyiltoy chepay, kïmwochï Otniel nyinte kïsom paponyi Kalep par. Kïkany kwit wölo mi kwanta, kirökunö sïkïryenyi atolapay kïtep kwanta nyinte lö, “Imökenyi ne?”

¹⁹ Kïlö, “Konante ropöwon, ompöwölo kekonaninyi koro Nekep* kono nyu koriko pöghon.” Atolapay kutö Kalep kori pöghon cho mi wölo toka nko wölo porö.

Kanastina Yuda

²⁰ Chï kï koroswo ara Yuda kïrïp kegh nko korikwa.

²¹ Kanastina söröm cho pö ara Yuda okumpö tagh cho kiparta rotyo Edom ompö koro Nekep, kï: Kapseel nko Eder nko Yakur

²² nko Kina nko Dimona nko Adada

²³ nko Kedes nko Asor nko Itnan

²⁴ nko Sip nko Telem nko Pealot

²⁵ nko Asor Adata nko Keriot Esron (anta Asor)

²⁶ nko Amam nko Syema nko Molada

²⁷ nko Asar Kada nko Esmon nko Pet Pelet

²⁸ nko Asar Syual nko Persyepa nko Pisyotiya

²⁹ nko Paala nko Im nko Esem

³⁰ nko Eltolad nko Yesil nko Orma

³¹ nko Siklak nko Madmana nko Sansana

³² nko Lepaot nko Syilim nko Ayin nko Rimon. Kanastinechoni löwïr kï 29, cho echön nko cho mïnkech.

³³ Ompö kelyo kamas kï: Estaol nko Sora nko Asna

³⁴ nko Sanoa nko Enkanim nko Tapua nko Enam

³⁵ nko Yarmut nko Adulam nko Soko nko Aseka

³⁶ nko Syaaraim nko Aditaim nko Kedera nko Kederotaim. Kanastin taman nko angwan cho echön nko cho mïnkech.

³⁷ Senan nko Adasya nko Mikdalkad

³⁸ nko Dilean nko Mispa nko Yokteel

³⁹ nko Lakis nko Poskat nko Eklon

⁴⁰ nko Kapon nko Lamam nko Yitlis,

⁴¹ nko Kederot nko Pet Dakon nko Naama nko Makeda. Choni kï kanastin 16 cho echön nko cho mïnkech.

⁴² Lipna nko Eter nko Asyan

⁴³ nko Ipta Asna nko Nesip

⁴⁴ nko Keila nko Aksip nko Maresya. Kanastin mut nko angwan cho echön nko cho mïnkech.

⁴⁵ Ekron nko kanastinechi cho echön nko cho mïnkech.

⁴⁶ Kïngata Ekron ntökwit nanampa Kwen nko kanastin löwïr cho echön nko cho mïnkech cho lekïto Asdod.

⁴⁷ Asdod nko Kasa kïmi nko kanastinekwa cho echön nko cho mïnkech, ntökwit champilwa Misri nko sörömu nanampa Kwen.

⁴⁸ Ompö koro kamas kï: Syamir nko Yatir nko Soko

⁴⁹ nko Dana nko Kiryat Sana, nyo kïlentöy Depir

⁵⁰ nko Anap nko Estemo nko Anim

⁵¹ nko Kosyen nko Olon nko Kilo. Choni kï kanastin taman nko akonga cho echön nko cho mïnkech.

⁵² Kikitö tïkwïl Arapu nko Duma nko Esyan,

⁵³ nko Yanim nko Pet Tapua nko Apeka

⁵⁴ nko Umta nko Kiryatarpa, nyo kïlentöy Epron nko Sior, kanastin mut nko angwan cho echön nko cho mïnkech.

⁵⁵ Maon nko Karmel nko Sip nko Yuta

⁵⁶ nko Yesrel nko Yokdeam nko Sanoa

⁵⁷ nko Kain nko Kipea nko Timna. Kanastin taman cho echön nko cho mïnkech.

⁵⁸ Alul nko Petsur nko Kedor

⁵⁹ nko Maarat nko Pet Anot nko Eltekon. Kanastin mut nko akonga cho echön nko cho mïnkech.

⁶⁰ Kiryat Paal, nyoni kï Kiryat Yearim nko Rapa, kanastin odeny cho echön nko cho mïnkech.

⁶¹ Ompö surkwen kï: Pet Arapa nko Midin nko Sekaka

⁶² nko Nipsyan kanasyanta Paryan nko Enkedi. Kanastin mut nko akonga cho echön nko cho mïnkech.

⁶³ Wölo kimemïcha pipö Yuda ntökïyon pipö Yepusi cho kimöngöy Yerusalem. Kïlenyona kïmang chane nko pipö Yuda Yerusalem nko ye.