YOSWÖ 14 - PIPÏLIA

¹ Kichöghchï Eleasar tïsin nko Yoswö wero Nun nko kintöghoghi pipö Israel koro Kanan lalwa Yordan okumpö ta.

² Kipegha chaghengwa nyo pö koros parata kwegh lenyini kimwochï ECHOTYON Musa kwighchï ortïn mut nko angwan nko kareranpa ara Manase nyo pö odeny.

³ Kökikutö Musa koros ortïn odeny nko kareranpa Manase Yordan okumpö kongasis wölo melö kikitö koros ara Lawi,

⁴ kïpoto kanastin wölo möngöy nko kor wölo oketïyi kyakikwa. Ki ortïn odeny pipö Yosep: Manase nko Epraim.

⁵ Kupar pipö Israel koros lenyini kimwochï ECHOTYON Musa.

Kakitö kanasyanta Epron Kalep

⁶ Kïpechï nyu pipö Yuda Yoswö ompö Kilkal, kïnget Kalep wero Yepune chi pö Kenis akïlenchï Yoswö, “Inkïtönyi kïgh nyo kimwochï ECHOTYON Musa nyo le chi pö Tororöt ompö Kades Parnea ompö parakungu nko ani.

⁷ Kyotïngetan könyis tömönut angwan otini kiyontanïn Musa mötworinto ECHOTYON ompö Kades Parnea aghot koronï, opchan nyinte ngölyonto man.

⁸ Wölo kigh werköcha cho kikïpecha tïkwïl pich kïmeghö mutïnö, wölo kyarïpan ECHOTYON Tororötïnyan ompö man.

⁹ Kuwalwal Musa asisoni lö, ‘Nyoman koronini työkotoy kelyeku kïlïku korengu nko moneku kokay, ompöwölo kirïpanyi ECHOTYON Tororötïnyan ompö man.’

¹⁰ Rosa ye nyu, kikïripanïn ECHOTYON könyis 45 kïtenö kimwochï nyinte Musa ngölyontononi, ato kitökïmi pipö Israel pan surkwen, anyï ye otïngön könyis 85!

¹¹ Akï tochan awes nko ye le atanye kiyontanïn Musa, owesyenyan ye kïkarkegh nko atanye ompö poryot anta kïgh anka tïkwïl.

¹² Kïlenyona nyu konanïn wölo le koro kamas lenyini kimwa ECHOTYON asisoni, ompöwölo kilïmanyi tïkwïl asisoni wölo kilata pipö Anakim cho kimöngöy kanastinekwa cho echön cho tekote nïyetwö. Töptoy ana mi ECHOTYON nko ani amukan ntayon chane le otini kimwa ECHOTYON.”

¹³ Atolapay kusoyön Yoswö Kalep wero Yepune akutö Epron kïcheng kïlïkwï nyenyi.

¹⁴ Kïlenyona kïlïkwï Epron koro Kalep wero Yepune chi pö Kenis nko ye, ompöwölo kirïp nyinte ECHOTYON Tororöt pö Israel.

¹⁵ Kikïkuro kaynata Epron tagh Kiryatarpa. Ki wow chichoni le Arpa kïtïl pich löwïr ompö pipö Anakim. Kumuny nyu koro ompö poryot.