YOSWÖ 13 - PIPÏLIA

¹ Kikikïyosit nyu Yoswö nyoman. Kïlenyona, kïlenchï ECHOTYON nyinte, “Kiyositunyi nyoman akwanyï tökïngötunote korö nyo wow nyo tökechengöy.

² Achï koros cho tökïlyöghöy: koroswo pipö Pilisti löwïr nko cho pö Kesyur

³ kingata lalwa Syior okumpö kongasispa koro Misri nko okumpö löt ntökwit rotyo Ekron, tökuyitote lö koro Kanan. Mi pöytoghï cho le mut cho pö pipö Pilisti, cho pö kanasyanta Kasa nko Asdod nko Askelon nko Kat nko Ekron nko cho pö Apim,

⁴ okumpö tagh nko koro Kanan löwïr nko Meara nyo pö Sidon nko Apek ntökwit rotyo koro pipö Amori

⁵ nko koro Kepal nko koro Lepanon löwïr okumpö kongasis, kïngata Paal Kad kutïng pö Ermon ta ntökwit ara Amat

⁶ nko pipö kamas löwïr kïngata Lepanon ntökwit Misrepot Maim ata pipö Sidon löwïr. Oyonan ante ompö tawu pipö Israel, chöghchinönyi kore pipö Israel kïcheng kïlïkwï nyingwa lenyini komwowunyi.

⁷ Chöghchinönyi nyu koronï ortïn mut nko angwan nko kareranpa ara Manase atökïcheng.”

Chaghata kor ompö Yordan okumpö kongasis

⁸ Kikikïcheng kareranpa ara Rupen nko Manase nko ara Kad koroswechï kitö Musa mötworinto ECHOTYON chane, ompö Yordan antakwagh okumpö kongasis:

⁹ Kïngata Aroer nyo mi sörömu mpöghoghyo Arnon nko kanasyantanay mi kwenu mpöghoghyononi nko tömko Medepa kïmïkul ntökwit Dipon

¹⁰ nko kanastin löwïr cho pö Sion pöytoghinto pipö Amori nyo kipöytoy ompö Espon ntökwit rotyo pipö Amon,

¹¹ nko Kiliad nko koro Kesyur nko Maaka nko kutïng pö Ermon löwïr nko Pasyan löwïr nko Saleka

¹² nko paytaghpa Ok kïmïkul nyo kimi Pasyan nyo kipayta Astarot* nko Edrey (nyinte onkït nyo kile ngötunöno Repaim). Pïchoni cho kirïnta Musa akïyon.

¹³ Amelö kiyon pipö Israel Kesyur anta Maaka wölo kimang chane kwenu pipö Israel nko ye.

¹⁴ Metönye Musa ara Lawi kor kïcheng. Wölo kikitö chane amörostin cho kïpelchini ECHOTYON Tororöt pö Israel kïcheng kïlïkwï karerantangwa, lenyini kimwochï ECHOTYON Musa.

Kor nyo kakitö Rupen

¹⁵ Kitö Musa ara Rupen koros kïrïp kegh nko korikwa.

¹⁶ Kingata rotyengwa Aroer sörömu mpöghoghyo Arnon nko kanasyan nyo mi kwenu mpöghoghyononi nko tömkö nyo lekïto Medepa

¹⁷ nko Espon nko kanastinechï löwïr mi rorok: Dipon nko Pamot Paal nko Pet Paal Meon

¹⁸ nko Yaas nko Kedemot nko Mepat

¹⁹ nko Kiryataim nko Sipma nko Seret Syaar ompö kutïng ompö mpöghogh

²⁰ nko Pet Peor nko nariytino Piska nko Pet Yesyimot.

²¹ Choni kï kanastin löwïr cho kimito rorok nko paytaghpa Sion pöytoghinto pipö Amori löwïr nyo kipayta ompö Espon. Kirïnta Musa nyinte nko kintöghoghichï pö Midyan tïkwïl: Epi nko Rekem nko Sur nko Ur nko Repa. Choni kï kintöghoghi Sion cho kimöngöy korononi.

²² Akonga ompö pich cho kipar Israel kï chemöwosyon Palaam wero Peor.

²³ Rotyo pipö Rupen kï lalwa Yordan. Chete kï kanastin cho mïnkech nko cho echön cho kikitö ara Rupen kïlïkwï chikwa kïrïp kegh nko korikwa.

Kor nyo kakitö Kad

²⁴ Kitö Musa ara Kad koros tïkwïl kïrïp kegh nko korikwa.

²⁵ Ki ngata rotyengwa Yaser nko kanastina Kiliad löwïr nko koro Amon kareran ntökwit Aroer okumpö kongasispa Rapa,

²⁶ akïngata Espon ntökwit Ramat Mispe nko Petonim akïngata Maanaim ntökwit koro Depir

²⁷ nko tömko Pet Aram nko Pet Nimra nko Sukot nko Sapon paytaghpa Sion kïmïkul pöytoghinto Espon, ki rotyengwa Yordan ntökwit nanampa Kalilaya sörömu wölo poro, Yordan antakwagh okumpö kongasis.

²⁸ Chete kï kanastin cho mïnkech nko cho echön cho kikitö ara Kad kïlïkwï chikwa kïrïp kegh nko korikwa.

Kor nyo kakitö kareranpa ara Manase nyo pö tagh

²⁹ Kitö Musa kareranpa ara Manase koros kïrïp kegh nko korikwa.

³⁰ Kingata rotyengwa Maanaim akurel koro Pasyan kïmïkul nyo kipöytoy Ok pöytoghinto Pasyan nko kanastin löwïr cho pö Yair cho mi Pasyan, kanastin 60

³¹ nko kareranpa Kiliad nko Astarot nko Edrey, kanastina Ok pöytoghinto Pasyan cho kikïchöghchï pipö Makir wero Manase, kïrïp kegh nko korikwa.

³² Chete kï koros cho kichaghta Musa ompö tömko Moap ntökwit Yordan antakwagh, okumpö kongasispa Yeriko.

³³ Wölo metönye Musa kïgh ara Lawi, lïku amörostino ECHOTYON Tororöt pö Israel nyingwa lenyini kimwochï nyinte chane.