YONA 2 - PIPÏLIA

¹ Atolapay kïsagh Yona ECHOTYON Tororötïnyi ompö muyo koghoghwö

² kilentöy, “Kyokurinyi we ECHOTYON ompö nyörilwoköchan, ingitönwaninyi. Kyorirchinyi otini kyomitan ngwen, iterwaninyi saghatenyu.

³ Ompöwölo kikityorchaninyi to, kwenu nanam ori. Kiwitwitanïn puseryonta, kilumanïn mirtinö cho owesöch.

⁴ Kyolentan kikeyonanïn oweghan tawungu, wölo melö tösiwuyan ngat Kongu nyo tïlil

⁵ Kitïpanïn nanam akuwitwitanïn pögh ompö kwenu nanam to. Kirataratanïn suswo nanam möt.

⁶ Kyowan oröytö wölo kipita ighin pö kutïng, ntatan kor nyo mökïsïwïyinye chi sany kokay, wölo kingwïsunyi söpontönyan kungwïna pïrïm, we ECHOTYON Tororötïnyu.

⁷ Otini kyasïwan lö karich kïweghenanïn söpon, akurinyi ECHOTYON, kïpka sowutköchan wölo ECHOTYON Kongu nyo tïlil.

⁸ Chane cho soghöy körkeyïntin, kïmelö tïngeninyi kïgh, akikïpïstö kïrïpinyi.

⁹ Wölo okoninyi amöros ompö sölut, aghokunyi kïgh nyo kawalwalan. Ngwïno sörunötö wölo mi ECHOTYON.”

¹⁰ Kimwochï ECHOTYON koghoghwö kïwö kungungchï Yona sany wölo tïyame.