YONA 1 - PIPÏLIA

Kötighintönchï Yona ECHOTYON

¹ Kïlenchï nyu ECHOTYON Yona wero Amitay,

² “Ngeta, wïyö Ninawi kanasyantanay wow airirchï, ompöwölo kikwitwanïn ngokikwa.”

³ Wölo kuperta Yona kutang Tarsis ompö tawu ECHOTYON, akïwö kïröytö Yopa, akinyorï meli nyo kiwetöy Tarsis. Kilït melinay akutötö ropïyen cho kiweghö, akïwö nko chane kutang Tarsis kurïpö ECHOTYON.

⁴ Wölo kïyonta ECHOTYON chepkïrïri nyo mi pïchpïch ompö nanam akïnam melinay kïmach kïwalyang.

⁵ Kimïghyö nyu piko melinay nyoman akïrirchï chi anka tïkwïl tororötïnyi. Atolapay kïwirchï tïkwïn cho kipöy meli nanam ori lö tökïkwïskwïsit melinay. Wölo kökikïwö Yona kïröytö toyo melinay akïrï rïwön nyo nïkis.

⁶ Kïlenyona kïwö wowïn pö meli kïlenchï, “Ayo, ne nyï ighenyi nya rïwintonï? Ngeta aisagh tororötïngu. Tömö ana kïkonecha nyinte kingörokut tömökiwonyö.”

⁷ Atolapay kïlenchï kegh ipichay, “Apkana kepara kwegh, tökenkïtunö lö ngo nyo kepï ngokichï kanamecha.” Kïlenyona kïpar kweghchay, kïnam ngala Yona.

⁸ Kïlenchï nyu pïchay Yona, “Mwowecha lö ompö ne tökïpkonchecha ngala cho ghach le nyï. Akïne pöghisyengu nya? Aingwïnonyi onö? Onö korengu nya? Aiponyi pich ne?”

⁹ Kïlenchï Yona chane, “Opoyan pipö Eprania, atechan ECHOTYON, Tororöt nyo pö yïm, nyo kigh nanam nko kor wölo tïyame.”

¹⁰ Atolapay kïmwochï chane Yona ngalechi, kunkïtï nyu pïchay lö kirïpö Yona ECHOTYON. Kimïghyö nyoman pïchay, atolapay kïlenchï Yona, “Wechï gha kïyoni keghanyi!”

¹¹ Kïlenchï pïchay Yona, “Kidocha ne nyi ye tökïsisyö mirtinechi pö nanam?” Kïtösisyö mirtino nanam kïpa yïm.

¹² Kïlenchï Yona chane, “Anamanïn awirchanïn nanam, atökïkalyan nanam ompö akwa, ompöwölo onkïtön lö kengwïnchokwa chepkiriri pö nanam akwompö ani.”

¹³ Wölo kumukyï pïchay keyoda meli kïmïla kor wölo tïyame, wölo kimemïcha ompöwölo kiyetu mirtino nanam ompö chane.

¹⁴ Kïlenyona kïrirchï chane ECHOTYON lö, “Kïsoghecha nyi, we ECHOTYON lö, mekany kewonyenöcha ompö chichï, amekany kwamecha kisön pö chi nyo motïny lelut. Wölo keghanyi lenyini kemökenyi, we ECHOTYON.”

¹⁵ Kïlenyona kïnam pïchay Yona akutyorchï nanam. Kïsï nanamay lenyini lawel.

¹⁶ Kuwagh pïchay ECHOTYON nyoman, akïropchï nyinte amöros akuwalwal kegh lö kïpöghisyechini nyinte.

¹⁷ Atolapay kïyonta ECHOTYON koghoghwö nyo wow nyoman nyo kinyïkwïda Yona. Kitöpö nyu Yona muyo koghoghwö osis sömök nko nöngötuskökwa.