YOEL 2 - PIPÏLIA

¹ Akuta kontï ompö Sayon,* kutïngtönyan nyo tïlil. Nya kïpotonchö piko kore kïmïkul. Ompöwölo ngwïnöy asispa ECHOTYON lawel.

² Asispa tuwïn nko wurönöt, asispa kapuret nko tuwïn nyo wow. Lenye ighot nyo kakikörkorchï kutïngkot parak, söpïch pö pich cho köromöch nyoman. Möminye kïgh nyo lenye nyoni nyo kikwigha astanka. Amökwighonye ngat ompö könyis nko pïnwöy löwïr.

³ Omöy kor kïmïl le ato kapel ma. Karkegh korö nyo mi tawungwa para Eden, wölo tïryal lötungwa le surkwen. Möngötunye kïgh nyo mi tawungwa.

⁴ Lata angoletin ato kirosöy, akï pïrtït le angoletino poryot.

⁵ Lenye kighumötengwa kighumöto nkaritin, otini kenkor kunkorchï kutïngkot walisay, töltolöy le lyopöt nyo pelöy awawatyan lenye lïk nyo körom nyo kikïtïng.

⁶ Otini karikwï kïmeghyö pich löwïr akulisö chi anka tïkwïl.

⁷ Poktoy le nyökon longöy nayat le pipö lïk, Töntenöy anka tïkwïl kïwetöy tagh. Mömostocha ortïnekwa.

⁸ Möminye nyo wetöy tökïyumtö anka körtoy anka tïkwïl arenyi köreröy kwenu karïn cho ngötipöch amöminye kïgh nyo körtoy chane.

⁹ Nyökorchini kupokyï kanasyan, ryoghotegh nïyet, longotoy korïn pörko, akï lïtöy wölo pönkosöch le chorï.

¹⁰ Körtoy asis nko arawa melïwï akïlö kokel tïrmïs.

¹¹ Ngölono ECHOTYON lïkenyi, ompö kut nyo wow. Ompöwölo wow lïkenyi nyoman, meyitisyotcha chini rïpöy ngölyontenyi. Wow asispa ECHOTYON akï pö otyogh, ngo nyo lentöy oköngöy?

Kursyo kötogh

¹² Akwompö nyete le ye kïmwoghöy ECHOTYON lö, “Omïlisyenö wölo omitan ompö mïkuliskökwo löwïr, ompö kïrurat nko lok nko sönönöt.

¹³ Nyo kötö oköreröy sïrokökwo, akarer mïkuliskökwo. Omïlisyenö wölo mi ECHOTYON Tororötïngwo, nyo kinyïghï pöropchö nko kïsyonöt. Mönörekönye nyinte lawel akinyïghï kisyonötö akïlöstowecha ngokicho.

¹⁴ Ngo nyo nkït lö möwöghökönye wölo kenontoy akïpïswekwa perur totötenö ropöwo pagh nko dipay* ompö ECHOTYON Tororötïngwo?

¹⁵ Akutena kontï Sayon, amala asispa kïrurat okurö tuyot aghamïta pich omwochinö tuyot kutïlil kegh onyoryenö poy

¹⁶ aghamïta monïng nko cho rerïyot Nya kïlïtunö chi pö mïrar konyi, kïlïtunö mïrar tunkunyi.

¹⁷ Akanya kïlokyö tïsï cho pöghisyechini ECHOTYON ompö kwenu ato kïpelo amöros nko kuka Kö pö Tororöt* akïsagh lö, ‘Syonchinö piköku, we ECHOTYON. Mepïstö piköku kesas amekany kïroröchï puntonï. Pö ne kïmwa pich lö, “Mi onö tororötïngwa?’ ”

Kesoyön Tororöt kor

¹⁸ Kunan ECHOTYON korenyi akusyonchï pikachi.

¹⁹ Kïwöghökï kïlenchï pikachi, “Arosa nyu lö akonokwa pagh nko dipay nko mwagh opïghyenökwa amopïsyinanye ngat kïnyernyerekwa puntonï.

²⁰ Oyonan lïk nyo ngwïno okumpö löt kïlowit, ayonchan kor wölo le surkwen. Petöy cho mi tagh nanampa Paryan, kïpa cho mi löt nanampa Kwen. Nïniot porwöyikwa akïngutö nyo gha, ompöwölo keghunyi cho ghach nyoman.

²¹ “Ay, mewöghisyö ngwïnya, serönö aiturön, ompöwölo kakwigh ECHOTYON ighisyewut cho echön.

²² Mowöghisyö tïpö wudïn, kikukum suswö cho nyörilöch wölnö le achey, kikuyin ket akwechi, kirïr makany nko sapipun kurur.

²³ “Ay, oturönökwa werpö Sayon, oserönö ompö ECHOTYON Tororötïngwo, nyo kakonokwa pögho kitokot ompö chamatenyi, kakonokwa ilat nyo wow, ila sarngatat nko nyo pö pengat, le wölo kilenye tagh.

²⁴ Nyïghiti rökor kukaposa kïnyïghï dipay nko mwagh tokigh kukaryala.

²⁵ “Oghokwokwa könyiswechay kyam talamnya tïkwïn, akwam kïperwö nko ptölök akïlö nkutyan. Lïkenyan nyo wow nyo nyoni kyotorchokwa.

²⁶ “Onyorunekwa omisyö nyo wow nyo omekwa opïghyongöy. Asalakwa kaynata ECHOTYON Tororötïngwo, nyo keghwakwa ngal cho pö töngönchin. Amökïminye chi nyo tökutöni piköchan arasï.

²⁷ Onkïtunekwa lö omitan kwenu pipö Israel ankïtunkwa lö ani nyo ochï Tororötïnkwa nyo möminye anka, amöketöninye ngat piköchan arasï.

Asispa ECHOTYON

²⁸ “Kïkany ompö osis cho pkonöy, omïlchinan mïkulöwanyan pich löwïr ngorsïyi werkökwa nko tipikwa rwotïtoy poyikwa kirwotïtogh kïngonchini chumwakökwa ngongut.

²⁹ Ay, omïlchinan Mïkulöwunyan mötworï cho le mïrön nko kor.

³⁰ “Oporunan tïkwïn cho kïtöngönchini ompö yïmwöy nko ngwïny kïsïwïyi kisön nko ma nko wïryonto ighöt.

³¹ Wengo asis kïtuwitu pïrïritu arawa le kisön kïtomö kwitï asisoni pö ECHOTYON wow akï pö otyogh.

³² Wölo chïwïtöy chi anka tïkwïl nyo kuröy kaynata ECHOTYON, ompöwölo lentöy ECHOTYON, ‘Mi ngötunön cho kïsöru ompö kuntïng pö Sayon nko Yerusalem cho okuran ante.’ ”