YOANA 7 - PIPÏLIA

¹ Otini kiwany ngalechoni, kïwö Yeso kutang Kalilaya. Melö kicham nyinte kuwerata koro Yudea, ompöwölo kimi pipö Yaudi kïmöröy nyinte ompö wöloni atökïpar.

² Kikikïlekïtit otoni asispa pipö Yaudi nyo kikuro Ichon pö Tunkun,

³ kimi nyu werko ompö Yeso kïlenchini nyinte, “Ngetena yi aiwö itang Yudea atökumï kinetanköku kïsïwa ighisyewutchï ighenyi.

⁴ Meghönye chi tïkwïn ompö wïnyat akïmököy nyinte lö tökunkïtwon pich. Ato ighenyi tïkuchete, ikany kunkïtun ngwïnya kïmïkul!”

⁵ (Kimeghancha nyinte chini le ompö werkökwa!)

⁶ Kuyokyï Yeso chane lö, “Tomönye kwitïta asistanyan. Tomönye kwitïta asistanyan nyo mïchini, wölo mïchinokwa osiswekwo kïtenö osis.

⁷ Memukönye ngwïnya kïyutonokwa, wölo yutonanïn, ompöwölo omwochinan nyinte kïnomnyö lö ghach ortinechi.

⁸ Apekwa cho le akwa wölini kyomisyegho. Mowetanye wölini mi omisyononi, ompöwölo tomönye kwitïta sayenyan nyo mïchinote.”

⁹ Otini kiwany kïmwa ngalechoni, kïmökïngetanye nyinte Kalilaya.

Yeso ompö Ichon pö Tunkun

¹⁰ Otini kïpa werkökwa wölini kimi Ichon pö Tunkun, kïnap kegh Yeso tïkwïl kïwö, wölo kïwïngata kegh.

¹¹ Kimito pipö Yaudi kïmöröy nyinte ompö wölini kikyomisyegho. Kimi kïtepöy kegh lö, “Mi onö nyinte?”

¹² Kimito nyu chamata nyo wow söpïchay kwen. Kilentöy pikö walaka ompö kwenungwa, “Wechï chi nyo karam nyete,” kïmï walaka kïlentöy, “Ewo, lisöy pich nyinte.”

¹³ Wölo kimöminye chi nyo kisïch nyakanat kïngalana nyinte, ompöwölo kiwagh chane kintöghoghi pipö Yaudi.

¹⁴ Otini kitïta kwenuto ichonay, kïwö Yeso kutang Kö pö Tororöt* akutor kunetisyö.

¹⁵ Kïtangany nyoman pipö Yaudi akïtep kegh lö, “Kenkïtunö onö chichï ngalechï tïkwïl akwanyï tomönye kusomön?”

¹⁶ Kuyokyï Yeso chane lö, “Melö chichan kinetutchï, wölo pkono wölo mi nyo kiyokwanïn.

¹⁷ Ato cham chi kwigh tïkwïn cho mököy Tororöt nyinte kwighöy, kunkïtu lö ekapkana ngalechï onetan wölo mi Tororöt anta ongölonan ngalechan kegh.

¹⁸ Chi nyo mwoghöy ngalechi kegh, kïyöröy kïkwolöy kegh, wölo chi nyo yöröy kwolöteto nyinte nyo kiyonï nyinte, kï pö nyinte man akï möminye putintön orinyi.

¹⁹ Kimökonokwanye so Musa Kirurut. Kï kölö ne tomökekwa opöranïn?”

²⁰ Kïlenchï tuyonay, “Ipotinyi so oy! Ngo mököy kïtïghinyi nya?”

²¹ Kïlenchï Yeso chane, “Kyaghan kïgh akonga nyo kyotöngönchikwa.

²² Kiporwokwa Musa ngala mutat (kïrkegh kimelö Musa nyini kitor wölo poyikwa), omutekwa worö asispa Sapato.*

²³ Akwato kïmutöy monïng asispa Sapato, atömökïlel Kirurut pö Musa, kwompö ne nyu tonörekyinanikwa, ompöwölo kosopön chi otï le asispa Sapato?

²⁴ Opïstene kirwok nyo rïpöy ngala sany, wölo orwokyinö ompö otöptino ngala man.”

Kristo* so nyete?

²⁵ Kïtepsyö pikö walaka cho pö Yerusalem lö, “Mö chichete nye so nyaye kömököy pich kïtïghöy?

²⁶ Arose köny, nkwanyï mi kunetisyegho söpïch kwen akï puryö chi nyo ngölonchini nyinte ngölyon nyonikïny! Kikunkïtï so kintöghoghï nyoman lö, Kristo nyinte?

²⁷ Wölo otini ketï Kristo kïmenkïtunye chi wölini ngwïno nyinte. Akwanyï kinkïtöcha löwïr wölini ngwïno chichï.”

²⁸ Akwotini kimi Yeso kunetisyegho Kö pö Tororöt, kutegh tya lö, “Kolekwa so kinkïtanïn, ankïtökwa wölo kyangwïnan! Wölo kimangwïnanye ompö owesyenyu. Pö man nyinte nyo kiyokwanïn. Monkïtökwanye nyinte,

²⁹ wölo onkïtön nyinte, ompöwölo kyangwïnan wölini mi nyinte akï nyinte nyo kiyokwanïn.”

³⁰ Kïyar nyu chane or nyo nömöy nyinte, wölo kimöminye chi nyo kyonkoytö ewunyi lö onömöy nyinte, ompöwölo kitomönye kwitïta sayenyi.

³¹ Wölo kichang pich ompö söpïchoni cho kighan nyinte akïlö, “Eato itï Kristo, muköy kwighöy töngönchin cho chang kïtïl chï kegh chichï?”

Kakïyonta ripï kïpa kïnam Yeso

³² Kïlïm nyu Parisaytin* söpïchoni kïchomöy ngal paraku Yeso, kïlenyona kïchomnyö chane nko tïsï cho echön kïyonta ripï kïpa kïnam Yeso.

³³ Kïlö Yeso, “Tomitan kite nko akwa atowan wölo mi nyinte nyini kiyokwanïn.

³⁴ Omöranïkwa wölo monyorwanïkwanye, ompöwölo momuchekwanye otune wölini owetan.”

³⁵ Kïtep pipö Yaudi lö, “Wetöy kor ne nyo mökitechanye nya? Wetöy so wölay möngöy pipö Yaudi cho mi kanastina pipö Krik atökunet chane?

³⁶ Anyï lentöy, ‘Omöranïn wölo monyorwanïkwanye,’ akïlö ngat, ‘Momuchekwanye otune wölini owetan. Kötömököy kïmwoghöy ne nyinte nya?’ ”

Lalwatïn cho yintegho pögho söpon

³⁷ Ki asis nyo wow asis nyo pö söröm nyo kipö asisoni wow pö omisyö. Kïlenyona kughyö Yeso akutegh ompö kut nyo wow lö, “Chi anka tïkwïl nyo amatïn maral ingwïn wölo omitan ateghegha pögh.

³⁸ Kïle wölaye mwoytoy Kikirut lö, ‘Anka tïkwïl nyo ghönanïn, kuyintegho mïkulöwunyi pögh cho tïng söpon.’ ”

³⁹ Kimwa Yeso ngalechoni ompö ngala Mïkulögh nyo kitomönye kite kïtak pich cho ghönöy nyinte. Kitomönye atoni kekonï Mïkulögh ompöwölo kitomönye ketöror Yeso.

Kichagh kegh pich ompö Yeso

⁴⁰ Otini kilïm pich cho chang ompö söpïchoni nyinte kïmwoghöy ngalechoni, kïlö, “Werkoyontonaye kikönöy chichï nyo mötïny!”

⁴¹ Kïlö walaka, “Kristo nyinte.” Wölo kïlö walaka, “Ayo, muko lö ne kungwïna Kristo Kalilaya?

⁴² Mwoghöy Kikirut lö, ngwïno Masiya* ara Daudi, akeyichini nyinte Petleem, kanasyanta Daudi.”

⁴³ Kïlenyona kïchagh kegh pïchay ompö nyinte.

⁴⁴ Kïmach pikö walaka kïnam nyinte, wölo kimöminye chi nyo kimukyï.

Kintöghoghi pipö Yaudi cho mötïng kighanat

⁴⁵ Kïmïlonchö ripichay wölo mi tïsï cho echön nko Parisaytin akïtep chane lö, “Kölö ne tömamïtukwa nyinte?”

⁴⁶ Kuyokyï chane lö, “Möminye chi nyonikïny nyo kikïngalan le chichoni.”

⁴⁷ Kuyokyï Parisaytin ripichay lö, “Kichö kimï kïlïsekwa tïkwïl so?

⁴⁸ Kyasïwekwa so kintöghoghin nyo le ompö akonga anta chi pö Parisaytin nyo kakughan nyinte?

⁴⁹ Wölo menkïtcha söpïchete Kirurut pö Musa, kïlenyona chïpote chane!”

⁵⁰ Kïlenchï Nikodemo, akong ompö Parisaytin nyay kiwö asistanka kïnyorï Yeso pïchay,

⁵¹ “Möchömwechanye Kirurutköcho kerwokine chi kïtomö kelïm ngalechi akenkïtï kini kegh chichoni.”

⁵² Keyokyï nyinte lö, “Kengwïnenyi Kalilaya so tïkwïl? Yare ya ompö Kikirut atesïwena lö möminye werkoyon kokay nyo ngwïno Kalilaya!”