YOANA 6 - PIPÏLIA

¹ Ato mi lötuto ngalechoni, kwoghyö Yeso nanampa Kalilaya, akekuro ngat nanampa Tiperya.

² Kïrïp nyinte söpïch nyo wow, ompöwölo kökikïsïwa kiporut cho kighchï nyinte pich cho kichirsot.

³ Kïwö Yeso kïpus kutïng akumpur atoni nko kinetankachi.

⁴ Kökikïrikï asispa pipö Yaudi nyo wow nyo pö Pasaka.*

⁵ Kïtopöntö nyu Yeso, kïsïwa tuyot nyo wow kutöngu wölo kimi nyinte, kïlenchï Pilipo, “Kyolo onö omisyö nyo mïchini kepagha pïchï nya?”

⁶ (Kimwa nyinte lenyoni atökïtyam Pilipo, wölo kinkït nyinte kïgh nyo kighöy.)

⁷ Kuyokyï Pilipo lö, “Ato kïlentöy tökïsïch chi ompö nyo le kite, kemököy makatin cho pö ropïyeni silpa cho le 200.”

⁸ Kïlenchï kinetanenyi akong nyo kikuro Andrea, werto ompö Simon Petro,

⁹ “Mi yi karöchïnin nyo tïng makatina matay mut nko kaghagh odeny. Wölo mïchini ngo chete ompö pïchï kïmïkul?”

¹⁰ Kïlenchï Yeso chane, “Akanya kumpur pikö ngwïny.” (Kimi atoni suswö cho chang.) Kïlenyona, kumpur pïchay löwïr ngwïny, ki ngata chane mïrön 5,000.

¹¹ Kïcheng Yeso makatinechay akuyokyï Tororöt sörö, akuporchï pïchoni kimpuröy ngwïny. Kwigh lenyoni tïkwïl nko kaghaghe kïsïch chane lapay cho teno cho kimököy.

¹² Otini kipïghyö chane lapay, kïlenchï kinetankachi, “Aghamïta rarakanka cho köngötï atömepot kïgh.”

¹³ Kïghamït nyu kinetankachi rarakan cho kinyïghï köröpon taman nko odeny cho kingötunö makatinechay le mut cho kingötunö pïchoni kyam.

¹⁴ Otini kisïwa pïchoni kiporunötononi kigh Yeso, kïlö, “Anyï nyu nyoman werkoyontonay kikïngor lö ngwïnöy!”

¹⁵ Kinkïtï Yeso lö kirich kïpa chane kïnam nyinte ompö owesyö atökwigh pöytoghin, kïwö ngat kutang kutïng nyinte onkït.

Köwestegho Yeso pögh parak

¹⁶ Otini kimön, kïröytö kinetankachi akïpa ntökwit nanam,

¹⁷ kïpus meli akwoghyö nanam kutang Kapernaum. Kikikïtuwit atoni akitomönye kwitï Yeso wölini kimi chane.

¹⁸ Kutor nanamoni kïwasawas kegh ompöwölo kikut yomöt nyo wow.

¹⁹ Otini kökikïpegha chane nanam ntökwit ato teno kilomiten mut anta mut nko akonga, kïsïwa Yeso kïwestegho pögh parak akökikïrich nyinte melinoni, kuwöghisyö chane nyoman.

²⁰ Kïlenchï Yeso, “Mowöghisïyi, ani nyete!”

²¹ Atolapay kïcham chane kïtak nyinte ompö melinoni, akïtökïnyini lawel kurel melinay koronini kïpetöy chane.

Yöröy pich Yeso

²² Kïmi asista nyo kirïpöy kïsïwa söpïch pö pich nyo kingötï nanamay antakwagh lö kimömicha meline walaka kïpoto akonga, kunkïtï lö kimölïtnye Yeso meli nko kinetankachi, wölo kipïstö chane nyinte.

²³ Kwituna meline walaka Tiperya ato lekïto atanye kyama pïchanya makatin cho kisoyön Echotyon atökïpagha chane.

²⁴ Otini kipköchï pich lö kimöminye Yeso atoni anta kinetankachi, kïlany melin akïpa kutang Kapernaum kïmarata nyinte.

Yeso kï makatyanta söpon

²⁵ Otini kinyorï pïchay Yeso ompö nanamay antakwagh kïlenchï, “Konetin, kengwïnanyi oyï wöl nya?”

²⁶ Kïlenchï Yeso, “Omwowokwa nyoman lö kamaratanïkwa amelö ompöwölo kyasïwekwa töngönchin, wölo ompöwölo kyamakwa makatinechanya ntopïghyö.

²⁷ Mosïngo omisyö nyo wonyot, wölo asïngena omisyö nyo ghyongtoy ntökwitïta söpon pö kokay. Konokwa omisyononi Wero Chi nyo kakukïniniö Paponyi Tororöt akutö nyinte macheyunyi nyo pö chamat.”

²⁸ Kïtep nyu chane nyinte lö, “Kighecha ne tökemuka kegha ighisyewut pö Tororöt nya?”

²⁹ Kuyokyï Yeso chane lö, “Anyï ighisyö nyo möchokwa Tororöt oghe: aghanakwa chichoni kiyokyï nyinte.”

³⁰ Kuyokyï chane nyu lö, “Ighenyi kiporunöy ne kesïwenacha akeghan? Ighenyi kïgh ne?

³¹ Kyama papotïnecha mana surkwen kïle wölo kikikirta ompö kirurut lö, ‘Kitö nyinte chane makatyan nyo kingwïna yïm kwam.’ ”

³² Kïlenchï Yeso, “Omwowokwa nyoman lö melö Musa nyo kikonokwa makatyan nyo kingwïna yïm. Paponyan nyo konokwa makatyan nyo pö man nyo ngwïno yïm.

³³ Ompöwölo makatyan nyo konu Tororöt kï nyinte nyini körökunö yïm atökutö ngwïny söpon.”

³⁴ Kïlenchï nyu pïchay Yeso, “Kwato lenyona, Echotyon, ikonech osis löwïr makatyantanoni.”

³⁵ Kïlenchï Yeso chane, “Ochan makatyanta söpon. Momönye kömöy chi nyo ngwïnöy wölo omitan akï momönye maral chi nyo ghönanïn.

³⁶ Komwowokwa lö kasïwanïkwa wölo moghönekwanye.

³⁷ Chi anka tïkwïl nyo konanïn Paponyan, kungwïnöy wölo omitan, amoyonchinanye sany chi anka tïkwïl nyo ngwïnchinanïn.

³⁸ Ompöwölo korökunan yïm angwïn ngwïny atagh machata Tororöt nyo kiyokwanïn, melö machatenyan.

³⁹ Nyinte nyini kiyokwanïn nyo mököy lö tömopïstan ompö nyo le akonga ompö pïchoni kakïkonanïn nyinte, wölo taghan chane kututu lapay asispa söröm.

⁴⁰ Ompöwölo mököy Paponyan lö tösïch pich löwïr söpon pö kokay cho sïwïyi Wero Tororöt akughan nyinte ataghan chane kututu asispa söröm.”

⁴¹ Kutor nyu pipö Yaudi kïngwïrngwïronchï nyinte, ompöwölo kimwa lö, “Ochan makatyanta söpon nyo kirökunö yïm.”

⁴² Kïtep kegh chane lö, “Mö Yeso so nyete nyaye le wero Yosep? Kumuko lö ne kïlentöy, ‘Korökunan yïm?’ Kinkïtöcha kwanta nko kame!”

⁴³ Kïlenchï Yeso chane, “Opïstenö ngwïrngwïrönöt akwane nko akwane.

⁴⁴ Memuchönye chi kungwïnöy wölo omitan kïpoto ato nokunö Paponyan nyinte nyo kiyokwanïn kutöngwï wölo omitan ataghan nyinte kututï asispa söröm.

⁴⁵ Kikir werkoyï lö, ‘Netöy Tororöt pich löwïr.’ Ngwïnöy chi anka tïkwïl wölo omitan nyo lïmöy kinetutko Paponyan.

⁴⁶ Molenchï kegh mi chi nyo kikïsïwa Papo, kïpoto chichoni kingwïna wölo mi Tororöt, chichoni onkït nyo kakïsïwa Papo.

⁴⁷ Omwowokwa nyoman lö anka tïkwïl nyo ghönanïn, kïtïng söpon pö kokay.

⁴⁸ Ochan makatyanta söpon.

⁴⁹ Kyama papotïnekwa mana wölnö le surkwen, wölo kïrkegh kyam, kïmeghö chane.

⁵⁰ Wölo ato am chi anka tïkwïl makatyantanoni rökuno yïm, kïmömeghönye.

⁵¹ Ochan makatyan nyo satate nyo kirökunö yïm. Ato töp chi anka tïkwïl ntökwam makatyantanoni, kïsöpöy kokay. Akï makatyan nyo otöninan nyinte kï portönyan nyo okonunan atökïsöpö ngwïnya.”

⁵² Kutor nyu pïchay pö Yaudi kïtep kegh lö, “Muköy chichï kïkonecha portanyi kyome lö ne?”

⁵³ Kïlenchï Yeso pïchay, “Omwowokwa nyoman lö ato mamakwanye por pö Wero Chi, aghegh kisönkachi, kïmosïkekwanye söpon ompö oringwo.

⁵⁴ Anka tïkwïl nyo omöy portönyan akïgha kisönköchan kïtïng söpon pö kokay, aghan nyinte kututu asispa söröm.

⁵⁵ Ompöwölo omisyo man portönyan akï gheghsyo man kisönköchan,

⁵⁶ chi anka tïkwïl nyo omöy portönyan akïgha kisönköchan kïtöpo orinyan atöponan orinyi.

⁵⁷ Kiyokwanïn Paponyu nyo satate, achan satate ompö nyinte. Kïlenyoni tïkwïl, anka nyo omanïn, kïsöpöy ompö ani.

⁵⁸ Nyete nyu makatyantanoni kirökunö yïm. Melö karkegh nko makatyantananya kyam papotïnekwa akïmeghö. Söpöy kokay nyo omöy makatyantanete.”

⁵⁹ Kimwa Yeso ngalechoni otini kimi kunetisyegho kö pö saghat* ompö Kapernaum.

Ngala söpon pö kokay

⁶⁰ Kïlïm nyu kinetankachi cho chang ngalechoni, kïlö, “Oghïghe ngalechï tya! Ekï ngo nyu nyo muköy kïteröy?”

⁶¹ Kipköchï Yeso akimöminye chi nyo kimwochï nyinte lö kingwïrngwïronchö kinetankachi ompö ngölyontononi. Kïtep nyinte chane lö, “Köghöchokwa so ngölyontononi?

⁶² Ekïlïku nyu ne köny ato asïwekwa Wero Chi kïwetöy yïm wölini kingwïna otini le tagh?

⁶³ Kïgh nyo konu söpon kï Mïkulöwu Tororöt, menyiwunye kïgh ptangengmöt onkït. Ngalechoni komwowokwa kï Mïkulögh akï söpon.

⁶⁴ Wölo mi kwenunkwa cho meghönöcha.” Kimwa Yeso lenyoni, ompöwölo kinkït nyinte kïngeta otini le towunöt lö ki ngo cho ki puryö kighanat akinkït tïkwïl lö ki ngo nyo kiwïchtoy nyinte.

⁶⁵ Kïtas kïmwa lö, “Nka nyanya kyomwowokwa lö memuchönye chi kungwïnchanïn kïpoto ato chömchï Paponyan.”

⁶⁶ Kutor kinetankachi cho chang kïmïlonchö löt kïngeta atoni akimökïpacha nko nyinte ngat.

⁶⁷ Kïlenchï Yeso kinetankachi chay le taman nko odeny, “Echo le akwa köny, omökekwa opechine kegh tïkwïlï?”

⁶⁸ Kuyokyï Simon Petro lö, “Kïpetecha wölo mi ngo nya Echotyon? Nyini itïngetenyi ngal cho konu söpon pö kokay.

⁶⁹ Akakeghanacha ye akenkït lö ichinyi Nyo Tïlil nyo pö Tororöt.”

⁷⁰ Kïlenchï Yeso chane, “Melö so kyakï akwa kï taman nko odeny? Wölo kïrkegh kïlenyoni, kïmito akong ompö akwa nyo le Onyöt!”

⁷¹ Kingölono nyinte kïpörtoy Yudas, wero Simon Iskariote. Ompöwölo ki nyinte nyo kiwïchtoy Yeso, kïrkegh ki akonga ompö pïchoni le taman nko odeny.