YOANA 5 - PIPÏLIA

¹ Ato wanta kegh kïwö Yeso kutang Yerusalem wölo kimi ichon pö pipö Yaudi nyo wow.

² Kimi ato lekïto atoni le Yerusalem ato lekïto Kuka Kechir ngarpïl nyo kitïng körkerwok mut nyo kikuro ompö Eprania Petesda.

³ Kimito tuyot nyo pö pich cho chang cho kichirsot cho kiruyot atoni: pich cho köryote, cho ngwolsot nko cho kimeyta porwöy. [Kimi chane kïköngöy otini kawïch kegh pögh,

⁴ ompöwölo kiröku malaykayan asistanka akwigh ngarpïlun kïwïch pögh. Tö ato lït chi nyo pö tagh pöghechoni otini kawïch, kesopö nyinte sömew anka tïkwïl nyo kötïng.]

⁵ Kimito chi atoni nyo kökikuchir könyis 38.

⁶ Otini kïsïwa Yeso nyinte kïrïwöy akunkïtï lö kökikuchir nyinte könyis cho chang, kïlenchï, “Imökenyi söpe nya?”

⁷ Kuyokyï chichay Yeso lö, “Möminye chi, Echotyon nyo tönanïn ngarpïl ori otini kawïchawich pögh, otini olentan omukyini olïtöy kïlït chitö anka ori kïnyaghanïn.”

⁸ Kïlenchï Yeso chichay, “Ngeta aicheng menyontengu aiwö.”

⁹ Otini lawel kïsöp chichay, kïcheng menyontenyi akïwö. Ki asispa Sapato* nyoni kighisyö ngalechoni.

¹⁰ Kïlenyona kïlenchï pïchay pö Yaudi chichay kakisop, “Asispa Sapato nyï, kïröy Kirurutköcho kepotoy menyon.”

¹¹ Kïlenchï chichay, “Kömwowanïn chichoni kesopanïn lö, chenga menyontengu aiwö.”

¹² Kïtep pïchay pö Yaudi lö, “Ngo chichoni kömwowunyi lö, ‘Chenga menyontengu aiwö?’ ”

¹³ Wölo kimenkïtnye chichoni kikisop lö ki ngo nyinte, ompöwölo kimito söpïch atoni akökikïwö Yeso.

¹⁴ Kïnyorchï Yeso chichay ato le soya Kö pö Tororöt,* kïlenchï, “Rose lö, kakesopinyi ye. Megha ngat ngokï tömengwïnchin kïgh anka nyo gha kïtïl nyoni.”

¹⁵ Atolapay kïnget chichay akïwö kïmwochï pïchay pö Yaudi lö kichï Yeso nyaye kisop nyinte.

¹⁶ Kutor nyu pipö Yaudi kurey Yeso ompö ngölyontononi, ompöwölo kisop nyinte chi asispa Sapato.

¹⁷ Kïlenchï Yeso chane, “Ighöy Paponyan pöghisyenyi kïtenö osis, apöghisïyan ante tïkwïl.”

¹⁸ Kïkany kïlïm pipö Yaudi lenyoni, kïnörekyö tya, akïmar or nyo tïgho nyinte, amelö ompöwölo kinyar kirurut pö asispa Sapato, wölo ompö wölini kimwa nyinte lö, Paponyi Tororöt, nyo poru lö kigh kegh kïkongityö nko Tororöt.

Wowïn pö Wero Tororöt

¹⁹ Kuyokyï Yeso chane lö, “Omwowokwa nyoman lö meghönye Weri kïgh onkït, poto nyo sïwïyi kwighöy Kwanta. Kïgh nyo ighöy Kwanta, kwighöy Weri tïkwïl.

²⁰ Ompöwölo chömöy Kwanta Werïnyi akuporchini nyinte kïyoni ighöy nyinte, akuporchini ngat kwighöy tïku walaka cho echön kïmolï chete atatanganyakwa.

²¹ Kïle wölini ighöy Paponyan cho kimeghö kututu akutö söpon, kïlenyoni tïkwïl, töni Werïnyi söpon pich cho chömöy nyinte.

²² Melö rwokyini Paponyan chi anka tïkwïl, kakutö nyinte Werïnyi owesyö kïmïkul nyo rwokyini pich,

²³ atökutö pich tïkwïl konyït Weri le wölini töni chane konyït Kwanta. Anka tïkwïl nyo mökonyïtönye Werïnyi, kïmökonyïtönye Kwanta nyo kiyonï nyinte.

²⁴ “Amwowokwa nyoman lö anka tïkwïl nyo lïmöy ngalechan akughan nyinte nyo kiyokwanïn, kïtïng söpon pö kokay. Melö kirwokyini nyinte, wölo kakïngetunö meghat akïlït söpon.

²⁵ Amwowokwa nyoman lö, ngwïnöy asis akikungwïn asisoni ato lïmöy pich cho kimeghö kuti Wero Tororöt, akïsöpchöt chane cho lïmöy kutinoni.

²⁶ Ompöwölo le wölini ngwïno Paponyan owesyo söpon kïmïkul, kï kegh nyinte Werïnyi kïsïch söpon ompö owesyeto Kwanta.

²⁷ Akakutö nyinte owesyö Werïnyi kurwokyï pich, ompöwölo Wero Chi nyinte.

²⁸ Motöngönchï ngölyontononi, ompöwölo pkonöy osiswö ato lïmöy pich tïkwïl cho mi pïrïmpot kutinyi

²⁹ akïngetunö chane lapay pïrïmpotikwa, ngetu pich cho kigh nyo karam akïsöpchö, kïngetï chane cho kigh nyo gha atökerwokyï.

Cho söwintönchini Yeso

³⁰ “Moghanye kïgh nyonikïny ompö owesyenyu kegh. Orwokyinan kïrïp kegh nko ngölyonteto Paponyan, kïlenyona kutenate kirwokötenyan, ompöwölo moghanye kïle wölini komöktonan ante, wölo oghan kïkarkegh nko machata nyinte nyo kiyokwanïn.

³¹ Akwato osöwintönchan kegh ante, kïmöpönye man söwintönenyan.

³² Wölo mi chitö anka nyo osöwintönchinan, ankïtön lö ngalechoni ngölono nyinte parakunyan kï ngala man.

³³ Kyayontekwa kinetankökwo wölo mi Yoana, kïsöwintönchï nyinte ngala man.

³⁴ Amelö, ompöwölo otwoytonan kegh söwintöno pich, wölo kamwaghan ngalechï atökemï kesörwokwa.

³⁵ Kikarkegh Yoana nko kitömöwön nyo kinoghöy akulïwu, achamakwa ongörekyeghenö löpoyïntanyi ompö osis cho ngörï.

³⁶ Wölo otïngetan söwintön nyo wow kïsir nyanya kipö Yoana. Ompöwölo ighisyewut cho kikonanïn Paponyu awany kï ighisyewut choni cho oghan, choni cho söwintönchini lö kiyokwanïn Paponyu.

³⁷ Akïsöwintönchinanïn Paponyu nyo kiyokwanïn. Tomönye alïmakwa kutinyi nyonikïny akïtomönye asïwenakwa kïtontanyi

³⁸ akï möminye ngölyontenyi nko akwa, ompöwölo melö kyaghanakwa chichoni kiyokï nyinte.

³⁹ Omitekwa osyoköy Kikirut, amitö olentöy kïsïko söpon pö kokay Kikirutchoni, wölo ngölonenanïn ngalechoni chane!

⁴⁰ Akwanyï mochömekwanye opkone wölo omitan atamuka osïkö söpon.

⁴¹ “Momöranye salata ompö pich.

⁴² Wölo onkïtokwa, lö möminye chamata Tororöt mïkulöwekwa.

⁴³ Kyangwïnan ompö owesyeto Paponyu, wölo tomönye atachanïkwa akwato töp ntökungwïn chitö anka ompö owesyenyi, otochekwa nyinte.

⁴⁴ Omukekwa oghöne lö ne akwanyï ochömekwa otoke salat nyo le nyingwo kegh akwanyï momörekwanye salata Tororöt?

⁴⁵ Molenchï kegh orwokyinokwa ompö tawu Paponyan. Chi nyo rwokinokwa kï Musa nyini okönekwa.

⁴⁶ Ntökyaghanakwa Kirurut pö Musa, kötö oghönekwa ngalechï omwowokwa, ompöwölo kikir nyinte ngalechan.

⁴⁷ Wölo otini ye moghönekwanye ngalechini kikir nyinte, omukekwa nyu oghöne lö ne ngalechï omwowokwa?”