YOANA 20 - PIPÏLIA

¹ Ompö asispa Chumapili kiwasan, otini kitökïtuw, kïwö Marya Makdalena kutang pïrïmponay akïsïwa lö kikengeta koghay kukanay pö pïrïm.

² Kurïp wölo mi Simon Petro nko kinetane nyanya anka kichomöy Yeso akïlenchï, “Kikechenga Echotyon pïrïm amökinkïtöchanye wölo kipa chane kutö.”

³ Kïnget nyu Petro nko kinetane nyanya anka kïpa kutang pïrïmpononi.

⁴ Kiryagh chane kwodeny, wölo kurïp tya kinetananay anka akïtïl Petro, kïnya kwitïta pïrïmpononi tagh.

⁵ Kungïrukö akïsïwa anankischay pö katani, wölo kimölïtnye ori.

⁶ Kimi Simon Petro lötunyi kungwïnöy, kungwïn akïlït pïrïmpononi. Kïsïwa anankïschay pö katani kikighïtochï atoni

⁷ nko ananka nyo kikïnonoghchï mötïnyi. Kimelö kikighïtö nko anankischay pö katani wölo kikïnanagh nyinte onkït.

⁸ Atolapay kïlït ori kinetananay anka kinya pïrïm tïkwïl, kïsïwa akughan.

⁹ (Kitomöcha kïpköchï ngala cho mi Kikirut cho mwoghöy lö, tutu nyinte nyo mötïny.)

¹⁰ Atolapay kimïlonchö kinetanchay katangwa.

Kechumchï Yeso Marya Makdalena

¹¹ Kimi Marya kughyongöy akïloko pïrïmpononi sany. Akwotini kitökïloköy, kungïrukö akuros pïrïmpononi,

¹² kïsöchï wöloni malayken odeny cho kiloköy sïro cho relach, kimi kumpuröy atanye kimi por pö Yeso, kimi anka möt kïmi nyo pö kelyön.

¹³ Kïtep malaykenichoni nyinte lö, “Ilochonyi ne nya we yo?” Kuyokyï lö, “Kösït pich Echotyontenyan, amonkïtönye wölini ketö chane!”

¹⁴ Nyini kiwany nyinte kïmwa ngalechoni, kïwaghaka akïsïwa Yeso mi kughyongo atoni, wölo kimenkïtnye lö ki Yeso nyinte.

¹⁵ Kïtep Yeso lö, “Ilokonyi ne? Ngo nyini imörenyi?” Kunonchï kegh Marya lö töptoy ki ripinto paranoni, kïlenchï, “Ato nyi nyo kesït nyinte, we echotyon, iporwante wölini ketönönyi nyinte, towan osït.”

¹⁶ Kïlenchï Yeso, “Marya!” Kïwaghaka Marya akïlenchï ompö Eprania, “Rapi!” (Ato kïwaghach kelentöy, “Konetin.”)

¹⁷ Kïlenchï Yeso, “Menömanïn, ompöwölo tomönye owan wölo mi Paponyu.” Wölo wïyö wölo mi werköcha aimwochï chane lö, “Owetan yïm wölo mi Paponyu akï Paponkwa, Tororötïnyan akï Tororötïnkwa.”

¹⁸ Kïwö nyu Marya Makdalena akïmwochï kinetankachi lö kakïsïwa nyinte Echotyon akï nyinte nyo kömwochï nyinte ngalechoni.

Kechumchï Yeso kinetankachi

¹⁹ Kïkany kwimön asisoni pö Chumapili akimi kinetanchoni korïn ori cho kikelökön kukot, ompöwölo kiwagh chane kintöghoghi pipö Yaudi, kungwïn Yeso akughyongö kwenungwa akïlö, “Pöghisyö akwa.”

²⁰ Otini kiwany kïmwa lenyoni, kuporchï chane ewunechi nko karastanyi. Kïngörekyö kinetanchay pö Yeso nyoman otini kisïwa chane Echotyon.

²¹ Atolapay kïlenchï Yeso chane ngat, “Nya kïtöpö kalya nko akwa. Kïle wölini kiyonwanïn Paponyan, oyontonokwa lenyoni.”

²² Kikany kïmwa lenyoni, kumunchï chane akïlö, “Atacha Mïkulögh nyo Tïlil.

²³ Ato olöstoghchikwa pich ngokikwa, kelöstoghchini. Kwato molöstoghchikwanye chane, kïmelö kïlöstoghchini.”

Yeso nko Tomas

²⁴ Kimöminye Tomas (nyo kïkuro Sölowö), nyo kile akonga ompö kinetankachi chay le taman nko odeny nko chane atoni kingwïn Yeso.

²⁵ Kïmwochï nyu kinetanka walaka lö, “Kakïsïwecha Echotyon!” Kilenchï Tomas chane, “Ato masïwanye perutöyi mïsumaris ompö morichi, atatapan morïchu perutöyichoni, atatap perut nyo mi karasunyi, kïmoghönanye.”

²⁶ Kïkany kuwonyö wiki akong, otini kimi kinetanpa Yeso korïn ori ngat akimi nyu Tomas nko chane. Ki lökönote kukotï, wölo kungwïn Yeso akughyongö kwenungwa akïlö, “Nya kïtöpo kalya nko akwa.”

²⁷ Atolapay kïlenchï Tomas, “Tönö morïku yi airos morichan aighïtö ewungu aitatap karasunyan. Pïstenö tomtomönöt, aighan!”

²⁸ Kuyokyï Tomas nyinte lö, “Echotyontenyu aichï Tororötïnyu!”

²⁹ Kïlenchï Yeso, “Keghananyi, so ompöwölo kesïwaninyi? Soyönote pich cho ghönöy akïtomöcha kïsïwa chane!”

Keröto kitapunï

³⁰ Kigh Yeso kiporutkö walaka cho chang ompö tawuto kinetankachi cho melö kikikir kitapunï.

³¹ Wölo kakikir ngalechete atamukakwa aghana lö, Yeso kï Kristo* Wero Tororöt, akwoto aghanakwa, osïkekwa söpon ompö kaynenyi.