YOANA 16 - PIPÏLIA

¹ “Komwowokwa ngalechï atömopïstö kighanatengwo.

² Yonenokwa chane kori saghat. Atökïpkonöy osiswö cho nonöy chi nyo pörokwa lö pöghisyechini nyinte Tororöt.

³ Ighwokwa chane ngalechoni, ompöwölo tomöcha kunkïtï Paponyan anta nkïtwanïn.

⁴ Kanyaghan omwowokwa ngalechoni tö ato itï sayanoni ighöy chane tïkuchoni ananakwa nyu lö kökomwowokwa. “Kimanyaghanye omwowokwa ngalechï otini le towunöt, ompöwölo kitomitan nko akwa.

Ighisyo Mïkulögh nyo Tïlil

⁵ Wölo kowan ye wölini mi nyinte, nyini kiyonwanïn akï möminye akong ompö akwa nyo tepanïn lö, ‘Iwetenyi onö?’

⁶ Kïkany otï komwowokwa ye ngalechï, mïkulöwekwa kïsïköy nyarïl.

⁷ Wölo omwowokwa ngölyonto man lö, karam ompö akwa ato owan, ompöwölo ato mowanye, kïmengwïnchinokwanye Kingörokintö. Wölo ato owan, oyokwokwa nyinte.

⁸ Kïkany otini ketï, kukïniniechï nyinte pipö ngwïny lö lelate chane ompö ngala ngokï nko ompö ngala man nko ompö kirwoko Tororöt.

⁹ Lelate chane ompö ngala ngokï, ompöwölo meghananïcha,

¹⁰ akï lelate chane ompö ngala man, ompöwölo owetan wölo mi Paponyu amosïwïyanïkwanye ngat,

¹¹ kïkany ompö kirwok, kï ompöwölo kikerwokyï pöytoghinto ngwïnyinï.

¹² “Otïngetan ngal cho chang cho kötötomwowokwa, wölo nïkisöchitu tya ompö akwa.

¹³ Wölo otini ketï Mïkulöwunoni pö man, kuntöghowokwa wölo mi man kïmïkul, ompöwölo möngölononye ngalechi kegh, wölo mwowokwa ngal löwïr cho lïmöy nyinte akïngongwokwa ngal cho tökïpkonöy.

¹⁴ Töroritanïn nyinte, ompöwölo mwowokwa ngal cho nyorunenanïn.

¹⁵ Chichan tïkwïn tïkwïl cho tïng Paponyan, nka nyay kolan mwowokwa Mïkulöwunoni Tïlil, ngalechoni nyorunenanïn nyinte.

Nyarïl nko ngörekyö

¹⁶ “Mosïwïyanïkwanye ato lekït, akïtomönye kite ngat asïwanïkwa.”

¹⁷ Kïtep kegh kinetankachi walaka lö, “Möchöy kïmwoghöy ne otï lenchinecha, ‘Mosïwïyanïkwanye ato lekït, akïtomönye kite ngat asïwanïkwa,’ akïmwa ngat lö, ‘Ompöwölo owetan wölo mi Paponyan.’

¹⁸ Kömököy kïmwoghöy ne otï lentöy, ‘Tomönye kite?’ Mökinkïtöchanye kini ngölono nyinte.”

¹⁹ Kunkïtï nyu Yeso lö kimököy chane kïtepöy nyinte, kïlenyona kïlenchï, “Kamwaghan lö, ‘Mosïwïyanïkwanye ato lekït, akïtomönye kite ngat asïwanïkwa.’ Nka nyoni kini otepekwa kegh akwane nya?

²⁰ Omwowokwa ngölyonto man lö, oloksokwa ariryö, wölo ngörököy ngwïnya. Onöreksokwa, wölo wöghöko nörekyenkwa kïlïku ngörekyö.

²¹ Otini mach korka kïlusyö kïtïng kichïr, ompöwölo ketïta sayenyi, wölo otini kakïlusyö nyinte, kïwutyeghö kichïrtanyi, ompöwölo ngörökyini nyinte monïng nyo kakeyïchï ngwïny.

²² Lïku nyoni ompö akwa tïkwïl: omitekwa nko nörekyö otï le ye, wölo osïwïyanïkwa ngat, atökïnyïghï ngörekyö mïkulöwekwa, ngörekyö nyo memuchönye chi ntökïchengenakwa.

²³ Otini ketï asisoni, kïmöminye nyu kïgh nyo otepanïkwa. Amwowokwa nyoman lö, konokwa Paponyan tïkwïn löwïr cho osomekwa nyinte ompö kaynenyan.

²⁴ Tomönye osomökwa kïgh ompö kaynenyan nko nyete le ye, osomö atosïkö atökwitïta ngörekyenkwa.

Kakïrïnta Yeso ngwïny

²⁵ “Komwowokwa ngalechï löwïr ompö ngötïnyö. Wölo itu osiswö cho mopöghisyeghonanye ngötïnyö ngat, wölo omwowokwa ngaleko Paponyan kïlöpo.

²⁶ Otini ketï asisoni, osomökwa nyinte möchutkökwo ompö kaynenyan amelö omwowokwa lö osoghan Paponyan ompö akwa,

²⁷ ompöwölo chömokwa nyinte Paponyan, ompöwölo kachamanïkwa, aghanakwa lö kyangwïnan wölo mi Tororöt.

²⁸ Kyangwïnan wölo mi Paponyan angwïn ngwïny apökoktenan ye ngwïnyinete, amïla wölo mi Paponyan.”

²⁹ Atolapay kïlenchï kinetankachi, “Rose nyu köny lö, kengalananyi ye kïlöpo amelö ompö ngötïnyö!

³⁰ Köpköchecha ye nyu lö, inkïtönyi kïgh anka tïkwïl amelö itïngetenyi machat lö, tötepinyi chi anka tïkwïl teput. Kïlenyona kakighanacha lö, kingwïnenyi wölo mi Tororöt.”

³¹ Kuyokyï Yeso chane lö, “Kaghanakwa ye nyu so?

³² Itu asis akikwitï ye yeteyi, ato otoyokwa löwïr atökïwö chi tïkwïl katanyi, atökepïstanïn onkït. Wölo momitanye onkït, ompöwölo mi Paponyan nko ani.

³³ Kanyaghan omwowokwa ngalechete atamukakwa osïkenö orinyan kalya. Onyorunekwa nyarïl ompö ngwïny. Wölo onyökönitu! Karïntan ngwïny!”