YOANA 14 - PIPÏLIA

¹ Kïlenchï Yeso chane, “Makany kusus kegh mïkuliskökwo, aghanakwa Tororöt, aghananïn tïkwïl.

² Mi korïn cho chang kato Paponyan, ntökömökïlenye nyoni kötomwowokwa. Owetan ye oghwokwa wölo omöngöy.

³ Ato owan aghwakwa wölo omöngöy, amïlan nyu ngat atamïtakwa wölini omitan atamukakwa nyu omitenö wöloni omitan.

⁴ Onkïtökwa ore nyo wetöy wölini owetan.”

⁵ Kïlenchï Tomas, “Echotyon, mökinkïtöchanye wölini iwetenyi. Kimukecha lö ne kenkïtune ore?”

⁶ Kïlenchï Yeso, “Ochan ore nko man nko söpon, möminye chi nyo wetöy wölo mi Papo kïpoto ato werwanïn.

⁷ Ntökyonkïtwanïkwa kötökyonkïtukwa Paponyan tïkwïl, wölo kïngeta ye, kyonkïtukwa asïwa nyinte.”

⁸ Kïlenchï Pilipo, “Echotyon, porwecha Papongu, nyoni onkït nyo kïmökecha.”

⁹ Kuyokyï Yeso lö, “Pilipo, kotöpan nko akwa osis cho chang akïtomönye so nkïtwaninyi? Anka tïkwïl nyo kakïsïwanïn kïkakïsïwa Paponyan, imukenyi nyu lö ne mwoghe lö, ‘Porwecha Papongu?’

¹⁰ Meghönenyinye so lö omitan orito Paponyu, orinyan? Melö omwoghan ngalechï omwowokwa löwïr ompö owesyenyan kegh, wölo Paponyan nyo mi orinyan nyo ighöy ighisyenyi.

¹¹ Aghana lö omitan orito Paponyu, kïmi Paponyan orinyan. Anta mölenye nyona, aghan chini le ighisyewutkö oghan.

¹² Omwowokwa nyoman lö chi nyo ghönanïn, kwighöy ighisyewutchï oghan, akwighöy ompö cho echön kïsir choni, ompöwölo owetan wölo mi Paponyu.

¹³ Oghwokwa kïgh anka tïkwïl nyo osomekwa ompö kaynatenyan, atökïrumtö oröryeto Paponyan ompö Werïnyi.

¹⁴ Ato osomökwa kïgh anka tïkwïl ompö kaynenyan, oghwokwa.

Kakiyomisï Mïkulögh nyo Tïlil

¹⁵ “Akwato achamanïkwa, orïpekwa kirurutköchan.

¹⁶ Osoman Paponyu kïkonokwa Kingörokinte nyo töpo nko akwa kokay.

¹⁷ Nyinte kï Mïkulöwu man akïmemukönye ngwïnya kïtoköy ompöwölo mösïwïyinye nyinte anta nkïtï. Wölo onkïtökwa nyinte, ompöwölo mi nyinte nko akwa akïmi orinkwa.

¹⁸ “Mopïstonokwanye le pönon, omïlonan wölo omitekwa.

¹⁹ Melö tökïsïwïyanïn ngwïnyinï ngat ato lekït, wölo osïwïyanïkwa, akwompöwölo ochan satate, osöpchokwa tïkwïl.

²⁰ Otini ketï asisoni, onkïtukwa nyu lö omitan orito Paponyu, omitekwa orinyan, le wölini omitan orinkwa.

²¹ “Chi anka tïkwïl nyo toköy kirurutköchan akïrïp, kï chichoni nyo chömanïn. Akï nyinte nyo chömanïn, kïchömöy Paponyan tïkwïl, achöman angongchï kegh nyinte.”

²² Kïlö Yudas (melö Yudas Iskariote), “Echotyon, muko lö ne ngongwechanyi kegh, amengongchï kegh ngwïny?”

²³ Kuyokyï Yeso nyinte lö, “Chi anka tïkwïl nyo chömanïn kïrïpöy ngölyontenyan akïchömöy nyinte Paponyan akepkonecha wölo mi nyinte aketïpïyö nko nyinte.

²⁴ Mörïpönye ngalechan chi nyo möchamanïnye. Melö nyinyan ngölyontononi kyalïmakwa, wölo pö Paponyan nyo kiyokwanïn.

²⁵ “Komwowokwa ngalechï kïtomitan nko akwa

²⁶ wölo ato itï Kingörokintö, nyinte kï Mïkulögh nyo Tïlil nyo yonu Paponyan ompö kaynenyan, kunetakwa kïgh anka tïkwïl akunonwokwa ngalechoni löwïr kökomwowokwa.

²⁷ “Kopïswokwa kalya, okonokwa kalyenyu. Mokonunanye le wölo konu ngwïnya. Makany kusus kegh mïkuliskökwo, amonyökoröchitu.

²⁸ Kyalïmakwa atanya kyomwowokwa lö, ‘Owetan, wölo tomïlonan wöloni omitekwa.’ Ato achamanïkwa, ongörechokwa ompöwölo owetan wölo mi Paponyu, ompöwölo wow nyinte kïsiranïn.

²⁹ Kanyaghan omwowokwa ye ngalechoni kïtomö kwighisyö, tö ato itï amukakwa nyu aghan.

³⁰ Melö tongölonan nko akwa ngat nyo kogh, ompöwölo mi pöytoghinto ngwïnyinï kungwïnöy, akïmötïngnye nyinte owesyö ompö ani,

³¹ wölo mïchini kunkïtï ngwïnya lö ochöman Paponyu, nka nyete oghan kïgh anka tïkwïl kïrïp kegh nko wölo kömwowanïn nyinte. “Angeta kepeghena yeteyi.