YOANA 12 - PIPÏLIA

¹ Kitïta nyu Yeso Petaniya kïtomö osis che le mut nko akonga ntökwitïta asis wow nyo pö Pasaka,* wölo kimöngöy Lasaro nyay kigh Yeso kututunö ngwen.

² Keghchï nyinte omisyo nangat ompö wöloni, kimi Marta kïpöghöy chane. Ki akonga Lasaro ompö pïchoni kyomisyegho mesa nko Yeso.

³ Kïcheng nyu Marya chupa mwagh nyo ngutoy nyo anyïn nyo pö nardo nyo pö olyot nyo wow akïmïlchï kelyo Yeso akïmisa putechi. Kïnguteghö köyoni mwaghay kïmïkul.

⁴ Kïlö kinetana Yeso akong nyo kikïkuro Yudas Iskariote, akï nyinte nyo wïchtoy Yeso ato le löt,

⁵ “Ompö ne nya tömökyaltegha mwaghï ropïyeni silpa cho le 300 atöketö mey?”

⁶ Kimwa lenyoni amelö ompöwölo kiyongöy nyinte mey, wölo ompöwölo ki chorin, akwompöwölo ki komöninto mïloto ropïyen, akimi kïchoro mïlotononi kïnomnyö.

⁷ Wölo kïlö Yeso, “Opïstenö kamanï! Akanya kïror kïyoni tïng ntökwitïta asisoni kïtïpanïn.

⁸ Omitekwa nko mey kïtenö osis, wölo momitanye nko akwa osis lapay.”

Kakïchïrerchï Lasaro atökepar

⁹ Kilïm söpïch pö pipö Yaudi lö kimi Yeso Petaniya, kïpa nyu wöloni, melö tökïsïwa Yeso onkït, wölo tökïsïwa Lasaro tïkwïl nyo kigh Yeso kututï.

¹⁰ Kïlenyona, kïchïrerchï tïsï cho echön Lasaro tökïtïgh nyinte tïkwïl,

¹¹ ompöwölo kipeny pipö Yaudi cho chang ngala kintöghoghikwa paraku Lasaro akïpa kughan Yeso.

Kölït Yeso Yerusalem nko salat nyo wow

¹² Otini kïyech, kïlïm tuyonay wow pö pich kipka kïtuyechï omisyonay pö Pasaka lö pïnï Yeso arawet kungwïnöy kutöngu Yerusalem.

¹³ Kïlenyona kïtör sos akïpa kïtaroch nyinte akuteghyotoy lö, “Osana soyönote nyinte nyo ngwïnöy ompö kaynata Echotyon! Nya kusoyönö pöytoghinto Israel!”

¹⁴ Kïnyorï Yeso wawa sïkïryö, kïpus parakunyi le ato kikikir lö,

¹⁵ “Mewöghisyö we kanasyanta Sayon,* Isïwa ya lö ngwïno pöytoghintengu paraku wawa sïkïryö.”

¹⁶ Kimöpköchicha kinetankachi ngalechoni osiswechoni, wölo otini kitutï Yeso akwororit, kunan nyu chane lö kikir lenyoni ompö nyinte akwighchï pich nyinte lenyoni.

¹⁷ Kisöwintönchï nyu tuyononi wow kimi nko Yeso ngal cho kighisyö atanye kigh Yeso Lasaro kututunö pïrïm.

¹⁸ Nka nyoni kipka pïchoni kïtaroch nyinte, ompöwölo kökikïlïm lö kigh nyinte kiporunötononi wow.

¹⁹ Kïmwochinchö Parisaytin* lö, “Kasïwa ye nyu? Möketïngetenöchanye kinyiwut nyonikïny! Arose köny lö karïp nyinte kore kïmïkul.”

Kamar pipö Krik Yeso

²⁰ Kimi pipö Krik kwenu pïchoni kipa kïsagha Yerusalem asisoni Wow.

²¹ Kïpa chane wölo mi Pilipo (kipö Petsayda nyo mi okumpö Kalilaya) akïlenchï, “Echotyon, kïmökecha kesïwïye Yeso.”

²² Kïwö Pilipo kïmwochï Andrea, kïpa nyu chane kwodeny kïmwochï Yeso.

²³ Kuyokyï Yeso chane lö, “Kakwitïta ye nyu asis nyo kitöni Wero Chi ororyö.

²⁴ Omwowokwa nyoman lö, ato möchïnchïnye kösïghyonto nkanun nyïngwïtyan akïma, kïtökï nyinte onkït, wölo ato ma, kuyinu pakan cho chang.

²⁵ Chi anka tïkwïl nyo chömöy söpontanyi, kïwighöy kupotöy wölo chi nyo ghöchini söpontanyi ompö ngwïnyinete, kïkomönöy ntökwit söpon pö kokay.

²⁶ Akwanka tïkwïl nyo pöghisyewanïn, kïmötïnye kïrïpanïn, atökumï mötworintenyan kïmi nko ani ompö wop anka tïkwïl wölo omitan. Ato pöghisyewanïn chi kutöni Paponyan nyinte konyït.

Kangalana Yeso meghenyi

²⁷ “Wongunote mïkulöwunyan. Omwoghan ne nyo ye nyu? Amwaghan lö, ‘Paponyu sörunenante sayanete?’ Ewo, ompöwölo nyoni nyo kyongwïnchan atawer sayanoni pö kichopat.

²⁸ Paponyu, kanya kïsïch kaynengu ororyö!” Kungwïna nyu kut yïm nyo kilö, “Kyaghan kïsïch ororyö, atoliman ngat.”

²⁹ Kïlïm söpïch nyo kighyongo atoni kutinay. Mi cho kïlö, “Kötïl,” kïlö walaka, “Köngölonchï malaykayan nyinte!”

³⁰ Kïlenchï Yeso chane, “Melö kengwïn kutinoni ompö parakunyan, wölo ompö parakunkwa.

³¹ Ketïta ye nyu kirwoko ngwïnyinï, kïwirchini ye nyu sany wowïnto ngwïnyinete.

³² Otini kakïsyolenanïn ngwïny owö parak, oghömïtyan kegh pich lapay.”

³³ (Kimwa Yeso ngalechoni atökuporï lö megh nyinte meghat nyo nen.)

³⁴ Kuyokyï tuyonay lö, “Mwowecha kirurut lö söpöy Kristo* kokay. Kwompö ne nyu telentenyi mïchini kesyol Wero Chi parak? Ngo nyu nyo le Wero Chi nya?”

³⁵ Kïlenchï Yeso, “Tökïmi kwenunkwa löpoyïn ompö osis cho ngörï. Apestena otini totïngetenö löpoyïnoni atömelumak tuwïn, ompöwölo menkïtnye chi nyo westegho tuwïn wölo töngöy.

³⁶ Otinö tökïmi löpoyïnoni nko akwa, aghan atamuka alïkuna pipö löpoyïn.” Otini kiwany Yeso kïmwa ngalechoni, kïwechï kegh akïwïnya kegh chane.

Pich cho melö tïng kighanat

³⁷ Kïmeghancha nyinte, kïrkegh kigha nyinte töngönchin cho chang ompö tawungwa,

³⁸ atökïpïntö ngala werkoyon Isaya cho kilö, “Echotyon, ngo nyo keghan ngalecha? Akï ngo nyo kakeporchï owesyo Echotyon?”

³⁹ Kimökumïcha nyu kughan, ompöwölo kimwa Isaya ngat lö,

⁴⁰ “Kimolul Tororöt konyikwa akwigh mïkulöwekwa kwoghïghitu atömasïwegha konyikwa anta sïkunö mïkulöwekwa, akïwöghökisyö wölo omitan, atosopön osop chane.”

⁴¹ Kimwa Isaya ngalechoni, ompöwölo kisïwa ororyo Yeso akïngalana nyinte.

⁴² Kïrkegh kïlenyoni, kughan kintöghoghi pipö Yaudi cho chang Yeso, wölo ompöwölo kiwagh Parisaytin, kïmökupartacha nyinte ompö tawu pich atömökitulö chane kö pö saghat.*

⁴³ Ompöwölo kicham chane salata pich kïsir salata Tororöt.

Rwokyini pich ngölyonto Yeso

⁴⁴ Kuta Yeso lö, “Chi anka tïkwïl nyo ghönanïn, kïmeghönanïnye onkït, wölo ghönöy nyinte nyo kiyokwanïn.

⁴⁵ Akwanka tïkwïl nyo sïwïyanïn, kïsïwïyi nyinte nyini kiyokwanïn.

⁴⁶ Ochan löpoyïn nyo kingwïn ngwïny, atömökïtöpo tuwïn chi anka tïkwïl nyo ghönanïn.

⁴⁷ Akwoto lïm chi anka tïkwïl ngalechan akïmörïpönye kïmorwokyinanye nyinte ompöwölo kimangwïnanye orwokyï ngwïny, wölo kyangwïnan osop.

⁴⁸ Chi anka tïkwïl nyo töghanïn akïtagh ngalechan, kïtïng chi nyo rwokyini nyinte. Rwokyini nyinte asispa Söröm ngölyontononi komwowan.

⁴⁹ Ompöwölo mongölonanye ante onkït, wölo kimwowanïn Paponyu nyo kiyokwanïn angalana ngal cho mïchini amwaghan.

⁵⁰ Ankïtön lö ipu kichikötenyi söpon pö kokay. Kïlenyona nyu, ngalechoni omwoghan kï ngal cho kimwowanïn Paponyu amwagh lenyoni.”