YOANA 10 - PIPÏLIA

¹ “Omwowokwa nyoman lö chi anka tïkwïl nyo mölïtönye kwegho kechir kuweröy kukat, wölo longöy are anka kï chorin chichoni akï mosin.

² Wölo chi nyo lïtöy kuweröy kukat kï mösöwonto kechir nyinte.

³ Yotini nyinte ripinto kukat akïlïmöy kechiryechi kutinyi, kuröy nyinte kaynötutkökwa kwakonga akonga akuntöghoghchï chane.

⁴ Otini kayat kechiryechi kïpka sany, kuntöghoghchï, akïrïpöy kechirye nyinte, ompöwölo nkït kutinyi.

⁵ Mörïpöcha chi nyo le ton, nyinö kötörïpöy, kupertegho nyinte, ompöwölo menkïtcha chane kuti ton.”

⁶ Kimwochï Yeso chane körkeyïnoni, wölo kimöpköchïcha ngalechoni kimwochini nyinte chane.

Yeso kï mösöwon nyo karam

⁷ Kïlenyona kïmwochï Yeso chane ngat lö, “Omwowokwa nyoman lö ochan kuka kechir.

⁸ Chane tïkwïl cho kipka tawunyan kï chorï akï mosï, amelö kilïm kechiryechoni kutingwa.

⁹ Ochan kukat. Ato lït chi anka tïkwïl kuweranïn kesöru, lïtöy nyinte kö akïwetöy sany akïnyoru aketagh.

¹⁰ Ngwïnöy chorin pat atökïchor akïtïgh, akunyar. Kyangwïnan atömanyïl osïkökwa söpon, asïch nyoni kïmïchï.

¹¹ “Ochan mösöwon nyo karam. Tötoy mösöwontö nyo karam söpontanyi ompö kechiryechi.

¹² Ato sïwa chi suyon kungwïnöy nyo melö mösöwon amelö chechi kyaki, kïpïstoy kechiryechoni akuperta. Kungwïn nyu suyontononi kïnam akutoyö kechirye.

¹³ Pertoy chichoni atökïsugh söpontanyi, ompöwölo kakikir amelö nyinte yongöy kechir.

¹⁴ Ochan mösöwon nyo karam, ankïtön pikachu kunkïtanïn chane

¹⁵ le wölini nkïtanïn Paponyan ankïtön nyinte, amitan kïpsach amegha chane.

¹⁶ Mito kechirye chichan walaka cho mömicha kweghonete! Mïchinanïn orongwï chane atökïlïm chane tïkwïl kutinyan akïlïkwï okwot akonga nko mösöwon akonga.

¹⁷ “Chömanïn Paponyu ompöwölo otötonan söpontanyu atamuk acheng ngat.

¹⁸ Möminye chi nyo sörenanïn söpontanyu. Otötonan ante ompö machatenyu. Otïngetan owesyö nyo otötoy, atïngetan owesyö nyo ochengo ngat, kimwowanïn Paponyu lenyoni.”

¹⁹ Kïpesyö ngat pïchay pö Yaudi ompö ngalechoni.

²⁰ Kïmwa cho chang lö, “Tïngeto chichï oy akï chepoyï! Kwompö ne toterekwa ngalechi?”

²¹ Wölo kïlö walaka, “Melö ngala chi nyo ipote oy chï. Muköy lö ne chi nyo ipote oy ntökïyotï chi nyo karote konyïn?”

Katagh pipö Yaudi Yeso

²² Kitïta asis nyo Wow nyo pö kisoyönoto kanasyanta Yerusalem, ki osiswo kaghïtan atoni.

²³ Kimito Yeso kïwestegho körköru Solomon nyo kimi Kö pö Tororöt,*

²⁴ Otini kïtuyechï pipö Yaudi ato kimi nyinte kuwit, kïlenchï, “Kölö ne teluklukenyi pich nya? Ato ichï Kristo,* kïne memwowecha lasiny.”

²⁵ Kuyokyï Yeso chane lö, “Komwowokwa wölo maghananïkwanye. Söwintönchinanïn ighisyewutchoni oghan ompö kaynata Paponyan.

²⁶ Wölo moghönekwanye, ompöwölo mochikwanye kechiryechan.

²⁷ Teröy kechiryechan kutinyan, ankïtön chane akïrïpanïn chane.

²⁸ Otönan chane söpon pö kokay amelö meghsot chane kokay akï möminye chi nyo sörenanïn chane.

²⁹ Wow Paponyan nyo kikonanïn chane kïsir löwïr akï möminye chi nyo muköy ntökïsara chane moriko Paponyan.

³⁰ Ochan akonga nko Paponyu.”

³¹ Kïkwagh pïchay pö Yaudi köghïn lö tökewira nyinte.

³² Kïlenchï Yeso, “Koporwokwa ighisyewut cho chang cho karamach cho kikonanïn Paponyu agha tawunkwa. Chono nyu ompö choni cho keghakwa awirenanïn koghïn?”

³³ Kuyokyï pïchay pö Yaudi lö, “Möminye chi nyo wirinyi ompö ighisyewut cho karamach, poto ompöwölo kechïpönyi Tororöt! Ompöwölo keghanyi kegh lïkuna Tororöt akwanyï ichinyi ptangengmöt pat.”

³⁴ Kïwöghökyï Yeso lö, “Mekiratenye sö ompö Kirurutkökwa lö, ‘Kyamwaghan lö, ochikwa tororötin?’

³⁵ Kikurö Tororöt tororötin pichoni kipkonchï lökoyechï akenkïtöcha lö mwoghöy Kikirut cho Tïlilöch man kokay.

³⁶ Kikïlanïn Paponyu akuyokwanïn angwïn ngwïny, kwompö ne tolentekwa ochïpan Tororöt, ompöwölo kolan, ‘Ochan Wero Tororöt?’

³⁷ Maghananïn ato moghanye ighisyewutko Paponyan.

³⁸ Kwato choni cho oghan akï kïrkegh kömaghananïkwanye, aghan ighisyewutköchan atonkïtunö lö mi Paponyan orinyan, amitan orito Paponyu.”

³⁹ Kumukyï ngat lö tökïnam, wölo kïchïwïta nyinte morikwa.

⁴⁰ Kïwö Yeso ngat kwoghyö lalwa Yordan atanya kipötisöno Yoana pich tagh akitöpö wöloni.

⁴¹ Kïpkonchï pich cho chang akïlö, “Kimeghnye Yoana kiporut chonikïny, wölo kilïkwï man kïgh anka tïkwïl nyo kimwa nyinte ompö chichete.”

⁴² Kughan nyu pich cho chang Yeso ompö wölo.