YEREMIA 6 - PIPÏLIA

¹ Akwa pipö Penchamen, arye osorunö kegh! Angetena Yerusalem tosöpchenö! Akuta kontï ompö kanasyanta Tekoa, anagha mapa kiporunogh ompö wölno le Pet Akerem. Ompöwölo ngwïno okumpö löt meghat nko kiwurat nyo mamïnïng.

² Yerusalem kï kanasyan nyo pïchigh nyoman ompö Sayon,* wölo kiwuröy kuwura.

³ Pkonchini Sayon lïkos pö koros le mösöw nko kyakikwa, akïtekyï kegh akoltinekwa le wölo komököy kuwit kanasyan,

⁴ atolapay kïkur kegh kïlentöy, “Agha kegh, kepokyïnö Sayon! Kepara chane pöghet kwen! Wölo, atï kemön lawel akikïpka rurwonoyï nya!

⁵ Wölo omöne köny, kipokyinecha oghö, akenyorecha kori pöytoghin tïkwïl.”

⁶ Lenchini ECHOTYON Kimuktoghin pöytoghi kiwurichoni, “Otöro keti Yerusalem, atïkum nyïngwïny kïpa yïm kuwit kanasyan. Kïmungöy kanasyantanï nyo mötïny, ompöwölo ghöyïn kwïle nyo kinyïghï orinyi!

⁷ Le kompa pögh nyo kosuno pögh cho karamach kïtenö osis, kïmïlu Yerusalem ghöyityö kïnomnyö. Kïlïmo orinyi riri nko kiwurat, osiwïyan moyokachi cho pö kïtenö osis.

⁸ Nya kïlïkwï ngalechoni löwïr, we Yerusalem kinetut ompö nyi tömelima, anta manyona ocholinyi nyoman, aghan kanasyantengu kïlïkwï surkwen nyo puryö chi nyo möngöy.”

Penyï pipö Israel

⁹ Lentöy ECHOTYON Kimuktoghin, “Aghamïtuna ngötunön pö Israel löwïr, le pich cho pïtöy sapipun cho kirïrö löwïr, agh le pïtinto sapipun nyo syoköy ngat akïpït atotökïmi akwe walaka keti.”

¹⁰ Angalan nko ngo nya wey atamuk orirchï nyinte atökïterwon? Arose köny lö kiminyö yitïn, memuköcha kïlïm ngölyontengu. Sösöy pïchete ngölyontengu, we ECHOTYON, möngörökyininye nyonikïny.

¹¹ Kinyïghitanïn nörekyo ECHOTYON ompö chane, amomukanye okörchini orinyan. Kïlenchanïn nyu ECHOTYON, “Mïlchinö nörekyononi monïng ompö kanasyan, mïlchinö tïkwïl tuyoghtino chumwak nko pich löwïr. Kïrongöy mïrön nko kor nko ompö poy cho kiyositu lö ngo.

¹² Kitöni korikwa pikö walaka kïcheng, kïcheng walaka pareni nko koru, ompöwölo omungan pipö koronete. Mwoghöy ECHOTYON.

¹³ Pïrchini chane löwïr, nyo mïnïng nko nyo wow, kïnyorï tïkwïn ompö or nyo merokonye. Kalïkwï chane löwïr lïsï, werkoy nko tïsï.

¹⁴ Meyitönye lö kïgh moyoko piköchan. Lenchini chane, ‘Kalya, kalya,’ akwanyï nyu puryö kalya!

¹⁵ Ayo, kisïwa chane arasï otini kighöy tïkuchete töghanïn kisön nya? Ewo! Kimanamnye arasï nyonikïny, ameporïnye ompö otyogh. Kïlenyona rulsot chane le walaka cho kirulyö, akuwonsot lömïs otini komungön chane.” Mwoghöy ECHOTYON.

Katagh pipö Israel ara Tororöt

¹⁶ Lentöy ECHOTYON, “Oghyongenö ato keryama ortïna, atopöntö, atepa keporwok ara könyisyok nyo karam. Arïpakwa nyu aranoni topöghisyenö ompö kalya. Wölo kölö chane, ‘Ewo, mökïrïpechanye aranoni.’

¹⁷ Atolapay oyokwokwa ripin amwowokwa lö ater kontï ato rirwokwa, wölo kïlö chane, ‘Mökïteröchanye.’

¹⁸ Kïlenyona, akwa pipö koros, atera! Nya kïpköchok kïgh nyo wetöy kwigho ompö piköchan.

¹⁹ Tera nyu ngwïnya kïmïkul! Opchinan kiwurat pïchete kïrïp kegh nko tötutkökwa cho ghach, ompöwölo melö kiyang chane ngalechan, amökïkonyïtcha kirurutköchan.

²⁰ Pö ne kepkanïn tïkuchay ngutoy cho onyïn ompö koro Syepa, nko mankoy cho ngwïrngwïr cho opunokwa kor nyo low nya? Kataghan ropöwekwa, amömïlanïcha amörostinekwa.

²¹ Kïlenyona kamwaghan ante ECHOTYON lö, ‘Otöninan kwötöw ara pïchete kïkwat chane. Wonyot papotïnö nko monekwa cho le wor, wonyot tïkwïl pöröris nko kongot.’ ”

Kipokunö pung okumpö löt

²² Lentöy ECHOTYON, “Arosa, kepokunö pung kor nyo mi okumpö löt, setu pich cho köromöch cho pkono kor nyo low.

²³ Kinap kegh ompö möronkit nko ngötwö, pich cho köromöch amesyonönye kïgh. Pegho chane angoletin otini pkonöy, akughumonu le pögho nanam, akïmi kïpsach kïporyegheninyi, we Sayon!”

²⁴ Lentöy nyu asisoni pipö Israel, “Kikelïmacha lö setu pung, akikemïghyecha lö chïrïm! Kïmicha kichïr le korka nyo kïghöy.

²⁵ Mökemukechanye kepete paren, anta kepestegha ortïna kanasyan, ompöwölo kikutö egh pungköcha karikwa cho pö poryot, akikuwitecha nyarïl wop tïkwïl.”

²⁶ Lentöy ECHOTYON, “Akwa pikachu, alaka nyu sarankwachtin, amelmel aryon. Oriryenö le chi nyo riröy megha werïnyi nyo le akonga kïpoto, ompöwölo chumwokwa lawel kiwurintö!

²⁷ Akï nyi we Yeremia, kaghinyi lïkuna kïtinto piköchan, kïtö atenkïtunö ortïnekwa.

²⁸ Ompöwölo penyï chane cho kiyomö mötöwö, pich cho swomöy pikö walaka, kï lata nko karïn nko tay, ighöy chane kïgh anka tïkwïl ompö asoya.

²⁹ Nöghöy mapa ngösöt nyo körom amemï kïpel tïkwïn cho sïmnyonöy karïn, pö kwïle tïkwïl ato kïlentöy kitïlilöy piköchan, ompöwölo memukonye kengongoghta ghöyitengwa.

³⁰ Kighöy chane, ‘Sipöpö karïn,’ ompöwölo kikïtagh ECHOTYON chane.”