YEREMIA 49 - PIPÏLIA

Kirwoköto ECHOTYON ompö Amon

¹ Kingalana ECHOTYON pipö Amon kïlentöy “Ayo, möyïnye so Israel, ntömökïmi nyo le mïlin? Atï köpïsï pïchay soghöy Molek, kïpka kïmïl koro pipö ara Kad akïmang kanastinechi?

² Kïlenyona, kamwaghan ante ECHOTYON lö, itïtoy nyo mötïny, ato oghan pipö kanasyanta Rapa, nyo mi koro Amon, kïlïm chöghöto poryot. Kiwuröy Rapa kïlïkwï kïratyan kïpelo ma keston cho lekïtinö chengöy nyu atoni pipö Israel korengwa ngat, chengo mori pïchanye kisara chane. Kamwaghan ante ECHOTYON lenyoni.

³ “Akwa pipö Espon, osönönchenö! Ompöwölo kikewur kanasyanta Ai! Akwa tipö Rapa, okörmönchinö kegh sarankwachtin ariryö, otïpökpokö olïtöy köser. Ompöwölo kikewï tororötïnkwa Milkom, kikewï nko tïsichi nko mötworichi.

⁴ Ayo, akwa chona motïng kighanat, ompö ne tokwolenokwa kegh tömköy cho mi korenkwa nya? Katwaytekwa kegh mökosyengwo, amen lö, ‘Ekï ngo nyini lentöy oporyeghenecha nya?’

⁵ Kïlenyona, kamwaghan ante Echotyon, TORORÖT Kimuktoghin lö, opkokwa otyogh kuwerï koros löwïr cho kiwitekwa. Otoyenokwa nyu kïwö chi anka tïkwïl arenyi. Akï puryö chi nyo muköy kïghamït pïchoni.

⁶ Wölo itïtoy ato oyokyinan pipö Amon tïkukwa le nyo kipö tagh. Kamwaghan ante ECHOTYON lenyoni.”

Kirwoköto ECHOTYON ompö Edom

⁷ Kilö ECHOTYON Kimuktoghin paraku Edom, “Ayo, tökïmi ngöghomnyö ompö kanasyanta Teman? Kepotö so ngöghomnyö pich cho le kirurï?

⁸ Akwa cho omöngöy Dedan, arye, amïlisyö amang wölo wïngate! Ompöwölo owetan owurokwa cho opo ara Esau, Ompöwölo kikwit ato omungan chane

⁹ Ato kïpït sapipun olentan mi cho ngötu ketït. Ato pka chorï oghö olentan chengchini kegh tïkwïn cho kömököy opïn.

¹⁰ Wölo osörenan pipö ara Esau kïgh anka tïkwïl. Owönchölan wölo wïngo kegh chane nyo melö tökumuköy kïwïny kegh ngat owuran tïkwïl pöroriskachi. Möminye ompö akong nyo ngötu.

¹¹ Opïswanïn monekwa cho le pönon, oripan chane. Opïsinö mïsïktinekwo kutwaytanïn kegh.”

¹² Lentöy ECHOTYON, “Ato kinyorï sitöt pich cho kimelö kimïchini kemuny, ilenchinenyi kegh ichïwïtöy lö ne? Mechïwïtenyinye kokay! Inyorunenyi sitengu nyo mötïny.

¹³ Ompöwölo kaman muma* ompö kaynenyan lö kiwuröy kanasyanta Posra kemïghyö akeroröchï akepöghisyeghö kaynenyi ompö chïpö. Lïku kanastinechi kïratis kokay. Kamwaghan ante ECHOTYON lenyoni.”

¹⁴ Amwaghan ante Yeremia lö “Ketwanïn lökoyo ECHOTYON. Kökonï kut kemwochï koros lö ‘Aghamïta kegh atolapay apkan agham oporyeghö koro Edom.’

¹⁵ Kamwaghan ante ECHOTYON lö, oghinyi we Edom lïkuna kïgh nyo le kite ompö kwenu koros pö ngwïny. Sösinyi ngwïnya kïmïkul.

¹⁶ Kalïsinyi ngaleku chay iotyeghonyi koros walaka nko menötengu, nyi wey nyo imöngöy köpönoti koghïn cho mi kutïng parak! Kïrkegh kemang renkeröy le sich, ongwïnan otyoruneninyi wöloni imi. Kamwaghan ante ECHOTYON lenyoni.

¹⁷ “Omwoghan ngat lö owurinyi nyoman we Edom ntökwotyö akïmïgh anka tïkwïl nyo rikinyi.

¹⁸ Onyorinyi le wölo kyanyartan Sodoma nko Komora nko kanastin walaka cho kilekïtinö. Puryö chi nyo ngötu kïmang Edom. Kamwaghan ante ECHOTYON lenyoni.

¹⁹ Le ngötïny nyo lepuno kegh wuw pö lalwa Yordan akuchumchï kechir cho oketïyi, ochumchinan lenyoni pipö Edom atulan korengwa kïtoyö. Atolapay otönön ante kintöghoghin nyo kachaman kïpayta korononi. Ompöwölo, ngo nyo lentöy okongityo kegh nko ani nya? Akï ngo nyo lentöy orwokyinanïn? Pöytoghin ngo nyo muköy kughyong akïtagh ngalechan nya?

²⁰ Kïlenyona atera ngalechan chï kamwaghan lö ighisyot ompö koro Edom nko chï kamwaghan lö owetan oghchchini pipö Teman. Kichïto kat nyo mötïny, monïngo kanasyantanoni akemït kïpa lö weng. Wechï mïghsot pïchoni ompö ngalechoni keghisyö!

²¹ Kïrïntoy Edom kuta kutimtimö koro! Riröy kelïma Nanam nyo Pïrir.

²² Poryegho punyon Posra le sich nyo kirïchul köpepoy ato pilöy. Mïghsot asisoni nyökon pö lïko Edom le korka nyo kïghöy.”

Kirwoköto ECHOTYON ompö Damaska

²³ Kilö ECHOTYON paraku Damaska, “Köwöngisyö pipö kanastina Amat nko Arpad, ompöwölo kalïm lökoy cho ghach. Kinyïghï chane pögh mu ompö mïghö, karkegh nko mirtino nanam cho mösisyot.

²⁴ Kötïgh kïgh ko pipö Damaska, keyoda kegh löt akupertoy. Kinam chane mïghöto nyo mamïnïng! Kölïmchï kegh ngwonïn nko nyarïl, le korka nyo kïghöy.

²⁵ Töngönchin nyo tya kepïstö kanasyan nyo kirumunote ororyenyi, kanasyan nyo kinyïghitat ngörekyö!

²⁶ Kïpörchini asisoni chumwakakwa ortïna kanasyan, wonyot tïkwïl pikökwa cho pö lïk. Mwoghöy ECHOTYON Kimuktoghin.

²⁷ Otorenan ma nöyet pö kanasyanta Damaska Nöghöy mayoni ntökïpel kö pö paytagh nyo pö pöytoghin Pen Adad.”

Kirwoköto ECHOTYON ompö Kedar nko kanasyanta Asori

²⁸ Kimwa ECHOTYON paraku pipö Kedar nko pipö kanasyanta Asor cho kiporyegho akïrïnta Nepukadnesa, pöytoghinto Papilon lö “Anapa kegh ape oporyeghenö pipö Kedar! Anyarnyara pipö kongasis!

²⁹ Achengena Emeni nko kechirye Achengena tïkwïl pasyeniko emen nko tïku löwïr Aranga tamasayikwa chögho nyu rira korononi nyo lentöy, ‘Nyarïl ompö wop tïkwïl!’

³⁰ Akwa pipö kanasyanta Asor, Arye apa wölo low, Ape owïnchinö kegh köpönot! Karirwakwa ante ECHOTYON lenyoni ompöwölo kikïtötwokwa Nepukadnesa pöytoghinto Papilon pörchö.

³¹ “Anapa kegh nyu apa poryot, apara kor nyo mi payasa, nyo lïmchini kegh lö omi kalya. Mötïngnye kanastinechi kukot anta miröw cho pö körin. Töpo korononi onkït.

³² Achengena tamasayi nko tuka! Otoyechinan wop tïkwïl, pïchoni mutöy put kïtöngoghöchitu, apchan chane nyarïl nyo ngwïno wop tïkwïl. Mwoghöy ECHOTYON.

³³ Lïku kanasyanta Asor kïratyan nyo möngöy chepkonöw. Möminye chi nyo möngöy orinyi kokay.”

Kirwoköto ECHOTYON ompö Elam

³⁴ Otini kitor Sedekia kïpayta koro Yuda, kïngölonwanïn ECHOTYON paraku koro Elam.

³⁵ Kilenchanïn, “Rosa! Oriyan kwanti pïchona köromöch ompö poryo kotï chï kegh Elam kïsïch owesyö nyo wow.

³⁶ Atolapay akutwan yomot kungwïna woptino yïm löwïr. Okutïtenan pipö Elam kïtoyechï koros cho mi ngwïny. Möminye korö ompö akong nyo monyorchïninye chi pich cho kiperunö koro Elam.

³⁷ Owirenan mïghö pipö Elam ompö tawu pungkökwa chini mököy kïtïghöy chane. Opchinan chane kiwurat akwompö nörekyenyan nyo wow nyoman. Kïlenyona oyonchinan lïkos cho pkonöy kïpöröy chane ntökuwonyö lömïs.

³⁸ Otïghan kintöghoghï nko pöytoghinto Elam atolapay otönön ngacharunyan nyo pö paytagh korononi. Kamwaghan ate ECHOTYON lenyoni.

³⁹ “Wölo ompö osis cho pkonöy ongwïnan oyokyini Elam tïkuchi lenyini kimi tagh. Kamwaghan ante ECHOTYON lenyoni.”