YEREMIA 48 - PIPÏLIA

Kinyarata Moap

¹ Anyï ngölyon nyo kimwa ECHOTYON Kimuktoghin, Tororöt pö Israel paraku Moap, “Heywey akwa pipö Nepo! Ompöwölo kakinyar kanasyantenkwa kakïrïnta kanasyanta Kiryataim kïnam arasï. Kakïwir nayatu kiwakatenyi kïpïn lö pörös!

² Tökïmi onö pïchighyo Moap nyay kökwolo kegh su nya? Kikïtata kanasyanta Espon wölo kïpetöy kenyortoy Moap, ‘Apkana kepe kenyara nyinte tömökumuko keyit ngat lö kor!’ Kikany nyi we kanasyanta Madmeni, kighinyi sisa lasay. Ngot onkït nyo rïpotoninyi.

³ Atere köny! Kakïlïma rira Oronaim nyo lentöy, ‘Kinyarat nko meghat nyo wow!’

⁴ “Kikenyar atolenyete Moap kuwonyö kakïlïma rirenyi wölo low tenö Soar,

⁵ kipa kïpus Luit kïriryotoy, akïröytö kutang Oronaim kïlokyotoy ompöwölo kikinyar korengwa.

⁶ Cheröy kegh kïlentöy ‘Keryöghö kesörunö kegh lawel! Keryöghö le sïkïröyi wuw cho mi surkwen.’

⁷ “Nyi we Moap, kemenönyi lö omi wölo wakate nyo momïnyinye kïgh. Kemenönyi tïkwïl lö ochï makos. Wölo ye kïrïntoninyi. Kiwuwo tororötïngu Kemos, wetöy nko tïsichi nko mötworichi.

⁸ Chumchini kinyorinto kanastin löwïr, puryö ompö akonga nyo chïwïtöy. Metukönye menyar kïgh nyo mi tömkö, ametukönye ato kömi komos. Kamwaghan ante ECHOTYON lenyoni.

⁹ Apala nyu pïrïm nyo kïtïpchini Moap ompöwölo kiwongöy nyinte nyo mötïny. Lïku kanastinechi kïratis, puryö ompö chi ompö akonga nyo möngöy oringwa.

¹⁰ “Chïpote chi nyo nyïrtighchini pöghisyo ECHOTYON! Chïpote nyo lokyini ngotïnyi malyan lö tömamïlta kisön!

Kinyarata kanasyanta Moap

¹¹ “Kömöngisïyi su Moap ompö kalya, kitöpchï kegh ngwïny lö nyöm le kumïn cho mi ptarka, kumi cho tomönye kemïlchï kitö anka. Tomönye kerang pipö Moap kïpa pïnotnön, kïlenyona tökïchömtoy le nyo pö tagh atökïngutoy lenyini pö tagh.

¹² “Wölo ye nyu, omwoghan ante ECHOTYON lö itïtoy ato oyonunan pich cho pkonöy kuyintoy pipö Moap le dipay.* Kiyintegho chane ptarkenikwa aketïghotïgh ptarkeni.

¹³ Nömöy nyu arasï pipö Moap ompö tororötïngwa Kemos le wölo kinamta asistanka arasï pipö Israel ompö Petel tororötïngwa nyo kitwayta kegh.

¹⁴ Ayo, akwa pipö Moap, omukekwa lö ne omenöy lö kïchï nyökon, amwagh lö, kïchï köromöch ompö poryot nya?

¹⁵ Kikwitï kinyorintö nyo ngwïnöy kunyoröy Moap nko kanastinechi pkonöy kïpöröy chumwak cho tigho kegh ompö poryot. Kamwaghan ante lenyoni nyo ochï Pöytoghin akelentöy kaynenyan ECHOTYON Kimuktoghin.

¹⁶ Kikïrik nyoman kuwonyö Moap kisusuwï kegh nyörilwoktino kïsorï nyinte

¹⁷ Kïkany akwa pöröris pö Moap, olokyenö akwompö parakunyi. Akwa cho konkït lö nyoman ororyenyi. Nama chi kegh kut aimwagh lö, ‘Wechï kichïnta paytagh nyo awes! Kepot nyu ororyenyi lö poy.’

¹⁸ Akwa pipö Dipon, orökunenö ngöcherwekwo cho pö ororyö apkana otïpino ngwïny terïtyon. Ompöwölo kikwitï kinyorinto Moap Wuröy wölo oryoghchinekwa tawïngena kegh

¹⁹ Akwa chona omöngöy Aroer! Oghyongene or kamas, arosïta! Tepe pïchona ryöghöy kuchïwitöy kegh lö, ‘Ne kitö nyï kegha nya?’

²⁰ Kikeryew Moap kïnam arasï Oriryenö akwompö parakunyi Amwatïtena ompö lalwa Arnon lö, kikenyar koro Moap.

²¹ “Kikwitïta ato kirwokyini kanastinechï mi okumpö mösop: Olon nko Yaasa nko Mepat nko

²² Dipon nko Nepo nko Pet Dilataim

²³ nko Kiryataim nko Pekamuli nko Petmeon

²⁴ nko Kerioti nko Posra. Möminye kanasyanta Moap nyo ngotu mökirwokï cho lekïtöch nko cho lowöch.

²⁵ Kikewany owesyo Moap lökïr mökïminye kïgh nyo muköy tökwigh.” Mwoghöy ECHOTYON.

Kimïnïngitöy Moap

²⁶ “Akemena Moap kumïn kïtamas ompöwölo kisyol kegh akïtagh kïrïp ngalechan. Melmelöy nyinte kanguntanichi akeroröchï.

²⁷ Ayo Moap, inonenyi lö kiroröchinenyi ompö sas pipö Israel nya? Kikïnam so nko chorï tökïlïku nyï iköntonenyi möt otini ingölononyi chane?

²⁸ Akwa pipö Moap! Opïstenö momönge kanastin. Ape amanga köpönoti koghïn. Agha le chepïrïmpen cho teköy korikwa renkeröy

²⁹ Kikelïmacha wölo syoltoy kegh Moap. Wechï kwolöy kegh nyoman! Kikelïmacha lö nisönöy akwip kegh yïm. Lïmchini kegh lö omi parak tya.

³⁰ “Onkïtön menötenyi. Mwoghöy ECHOTYON. Wölo kwïle anisa nyo tïng nyinte kï kwïle akï puryö kïgh nyo nyiwu ighisyewutkachi.

³¹ Kïlenyona osönönchinan Moap, oriran akwompö pipö Moap löwïr olokan akwompö pipö Kireres tïkwïl.

³² Olokan tya ompö akwa pipö Sipma kïtïl pipö Yaser. Ikörenyi kegh we Sipma nko morno mankuan, nyo kaset ntökwit nanampa Paryan antakwagh, akïset ntökurel Yaseri. Wölo ngwïnöy kinyorintö nyo nyoröy akweku cho pö osiswo pekat, nyoröy tïkwïl sapipuneku.

³³ Melö tökesöchini ngat ngörekyö amakïminye turönötö koro Moap, kor nyo pito tïkwïn nyoman ompö okwoghyö nyo tïng. Kakaran lasim dipay cho pkono akwa sapipun. Möminye nyo ryöku dipay ompö ngörekyö, akï kiteghat nyo kïlïmöy kïmelö pö turönö.

³⁴ “Kiriryö pipö Espon kelïma Eleale nko Yaas akïghömï kor, kïngata Soar ntökwit Oronaim nko Eklat Syelisyiya. Kikïteny ompö lalwa Nimrim.

³⁵ Amelö tochöman, ante ECHOTYON, chi anka tïkwïl ompö koro Moap nyo pusöy kutïngkot akïwö kïpelchï amöros tororötïnyi.

³⁶ Kïlenyona, sönönöy mïkulöwunyan ompö pipö Moap nko pipö Kireres le chi nyo kutoy pkureru tum nyo pö ato kïroröy chi ompöwölo kikuwonyeghö chane tïkwïn cho kitïng.

³⁷ Kingwïl pich löwïr mötöwöy akïrwak tamughay akiwatawat kegh morïn akulak sarankwachtin.

³⁸ Möminye kïgh nyo kïlïmo korïn anta kimpïrtino pipö Moap kïpoto sönönöt. Ompöwölo katyaran Moap le kïgh nyo melö tökeyongöy. Mwoghöy ECHOTYON.

³⁹ Arosa wölo kiwïrta Moap! Sönönöt nyo tya nyo mi koronï nya wey! Kawïr nyu Moap keroröchï! Roröchini koroswö cho kiwit nyinte!”

Möchïwïtönye Moap

⁴⁰ Lentöy ECHOTYON, “Arosa! Mi korö nyo pilu atökupokyï Moap, ngwïnöy le sich nyo kirïchul köpepokachi.

⁴¹ Ngwïnöy kïrïntoy kanastinechi, akurit teköwekwa mïghsot asisoni lïko Moap le korka nyo kïghöy.

⁴² Kinyoröy pipö Moap nyo mökeyitönye ngat lö pich. Ompöwölo kip kegh yïm ompö tawu Tororöt.

⁴³ Kamwaghan ante ECHOTYON lö, tapan nko pïrïmpot nko ngöghöptin cho köngöy pipö Moap.

⁴⁴ Anka tïkwïl nyo kachïwïta tapan kïchinchini pïrïm kïkany nyo kachïwïta pïrïm, kïnömöy ngöghöp. Ompöwölo kyatatatan ante ECHOTYON lö sito pipö Moap nyoni, otini ketïta ato omungan chane.

⁴⁵ “Köryögh pich kïsor kanasyanta Espon, kanasyan nyo kipöytoy köny pöytoghin Sion. Ryöghchini lö tökenyorchinö kalya wölo kichïnto ko chane, ompöwölo kitor kïnagh kanasyantanoni kuwany koro Moap kïmïkul kuwonyö nyu pipö Moap cho kichama kegh poryot.

⁴⁶ Ochech akwa pipö Moap! Kewonyö nyu pïchay soghöy tororöt nyo kighöy Kemos! Kikerang monekwa cho le wor le ratan akemït monekwa cho le tipïn kïpa pïnotnön.

⁴⁷ Wölo kamwaghan ante ECHOTYON lö ompö osis cho pkonöy, osoyönan Moap kïnyorï tïkwïn ngat le nyo kipö tagh.” Teno choni ngala kirwok nyo nyoru pipö Moap.