YEREMIA 41 - PIPÏLIA

¹ Ompö arawa mut nko odeny nyo pö könyinoni, kïwö Ismael, wero Netania, kuköto Elisyama nyo pö ara pöytoghï akï akonga ompö yetïntino pöytoghin nko pich taman Mispa wölo mi Kedalia. Akwotini kimi kwomisïyi tïkwïl ompö Mispa,

² kïnget Ismael wero Netania nko pïchay le taman kipka tïkwïl atolapay kïporyeghö Kedalia, wero Aikam kuköto Syapan ompö chokon ntökïpar. Kedalia nyinte nyaye kikïl pöytoghinto Papilon kïlïkwï kintöghoghinto kor.

³ Kitïgh tïkwïl pipö Yaudi löwïr cho kimi nko Kedalia ompö Mispa nko lïko Papilonia cho mi atoni.

⁴ Ompö asis nyo kirïpöy asisoni kikïpar Kedalia, akwotini tomönye kenkïtï lö kikepar,

⁵ kwitï pich cho le 80 cho kipkono Syekem nko Syilo nko Samaria. Kirwach pïchoni tamughayikwa akulak siro cho kipolpolisyö akïwatawat porwöyikwa. Kipu chane ropöwo pagh nko tïkwïn cho ngutoy cho onyïn Kö pö Tororöt.*

⁶ Kilïtï Ismael sanypa kanasyanta Mispa kïlokotoy. Kïkany kuryam nko pïchay kipu ropöwekwa Kö pö Tororöt, kïlenchï, “Ochikwa tokote kayï pö Kedalia wero Aikam.”

⁷ Nyini kisïwa lö kikïlïtï kanasyan kïpar chane Ismael nko pïchay le taman kimi tïkwïl atolapay kïwirchï porwöyikwa kö pö pögh.

⁸ Wölo kimi pich cho le taman ompö pïchay kipu ropöwekwa cho kisagh Ismael kïlentöy, “Kaykay metïghecha ompöwölo kipuchanyi tïkwïn cho chang. Kïtïngetecha nkanun nko matay nko mwaghpa orolwö nko kumat cho kökïwïnchicha paren yïna.” Kïlenyona kïpïstö Ismael chane amelö kipar.

⁹ Köyay pö pögh kiwirchï Ismael porwöyi pïchay kipar nyinte kï kö pö pögh nyo wow nyo kiwas köny pöytoghin Asa atökïwïnga kegh ato kiporyot nko Paasya pöytoghinto Israel. Kiwirchï nyu Ismael porwöyi pïchay kipar nyinte köyay pö pögh kïnyïghï.

¹⁰ Otini kimuchö, kïnam Ismael tipö pöytoghin nko pich löwïr cho kimi kanasyanta Mispa akïrang le ratan kïpa kutang koro Amon. Pïchoni kikïrang kï cho kimwochï Nepusaradan, wowïn pö ripi pöytoghinto Papilon, Kedalia kuntöghoghchï.

¹¹ Kïlïm Yoanan wero Karea nko yetïntino lïkos pö Yuda cho kimi tïkwïl, ngalechoni ghach kigh Ismael.

¹² Kïlenyona kïnap kegh Yoanan nko pikachi löwïr akïrïp Ismael tökïporyeghö kirïp nyu lenyoni ntökïnyorchï atolekïto ngarpïl nyo mi Kipyon.

¹³ Nyini kisïwa pïchay kirongöy Ismael le ratan Yoanan wero Karea kungwïnöy nko yetïntino lïkos pö Yuda, kïngörekyö nyoman

¹⁴ akuyokwï kegh kïsor Yoanan.

¹⁵ Wölo kïchïwït Ismael ntömanam Yoanan akurïpchï koro Amon nko pikachi cho le mut nko sömök.

¹⁶ Kumïtï nyu Yoanan nko yetïntinechay pö lïkos pö Yuda pïchay löwïr kiranga Ismael kanasyanta Mispa le ratan, kïtenö kïpar Kedalia wero Aikam. Pïchoni kimïtuna Yoanan Kipyon kï askarin nko kor nko monïng nko latan* cho kipöghisyechini pöytoghin.

¹⁷ Kipa lenyoni ntökwit kanasyanta Kerut Kimam nyo kilekïto Petleem akïpïrchï kïpa koro Misri,

¹⁸ ompöwölo kiwagh pipö Papilonia kïngata kïpar Ismael Kedalia wero Aikam nyo kikïl pöytoghinto Papilon kughyongchï korononi.