YEREMIA 39 - PIPÏLIA

Kikïrïnta kanasyanta Yerusalem

¹ Kiset akurik Yerusalem lïko Nepukadnesa, pöytoghinto Papilon ompö arawa taman nyo pö könyi mut nko angwan nyo pö paytaghpa Sedekia pöytoghinto Yuda.

² Ato mi asispa mut nko angwan arawa angwan nyo pö könyi taman nko akonga nyo pö paytaghpa Sedekia, kewir kïrul nayatu kanasyanta Yerusalem.

³ Otini kikïrïnta akenam kanasyanta Yerusalem, kipka kintöghoghi pöytoghinto Papilon akïtïpï kukat nyo kïkuro Kuka Kwen. Kintöghoghichoni pö Papilon kï ompö Nerkal Syareser nko Samkar Nepo nko Sarsekim nko Nerkal Syareser nko nyu walaka.

⁴ Kïkany kïsïwa Sedekia, pöytoghinto Yuda nko lïkenyi tïkuchoni löwïr kwighisyot, kïyar or nyo pertegho oghö. Kïrïp or nyo weröy para pöytoghin akïlït kukat nyo mi kwenu nïyet odeny akurel sany akïpa kutang okumpö Arapa.

⁵ Wölo kirïp lïko Papilonia ntökïnömchï Sedekia ompölyonto Yeriko atolapay kemïtyï nyinte Nepukadnesa, pöytoghinto Papilon atökerwokyï ompö kanasyanta Ripla, koro Amati.

⁶ Kïtïgh nyu pöytoghinto Papilon werpö Sedekia ompö Ripla kurosöy kwanta akïtïgh tïkwïl kintöghoghi Yuda kurosöy Sedekia.

⁷ Otini kimuchö, kïmwa keködöt konyi Sedekia atolapay kerat akep koro Papilon.

⁸ Ataye kokay, kimi pipö Papilonia kïpelöy kö pö pöytoghin nko kori pich walaka akurultö nïyet pö kanasyanta Yerusalem.

⁹ Söromunyi kungwïn Nepusaradan, wowïn pö ripi pöytoghinto Papilon akïrang pich cho kingötï kanasyan nko cho kichamta kegh kenam kïpa Papilon.

¹⁰ Kitukyï Nepusaradan Yuda pich cho le mey akï cho mötïngcha tïkwïn atolapay kïchöghchï chane pareni sapipun nko pareni walaka cho kïngoröy.

Kakityak Yeremia

¹¹ Kimwochï Nepukadnesa, pöytoghintö Papilon Nepusaradan, wowïn pö ripichi lö,

¹² “Wïyö yara Yeremia ntenyorï ameswany wölo irip aighchï nyinte lenyini mököy.”

¹³ Kïlenyona kïyonï pich Nepusaradan nko Nepusyaspan nko Nerkal Syareser nko yetïntino pöytoghinto Papilon,

¹⁴ kïpka kutyakanïn ompö kö pö ripï atolapay kïmwochï Kedalia wero Aikam, kuköto Syapan kumïtanïn katanyi atö kukamananïn. Kïlenyona nyu omöngisyan kwenu pich ompö wölini.

Kikönöto sörunöt ompö Epedmelek

¹⁵ Otini kitomitan chela ompö kö pö ripï, kiyoktanïn ECHOTYON

¹⁶ owö omwochï Epedmelek nyo ngwïno Etopya lö, “Lentöy ECHOTYON Kimuktoghin, Tororöt pö Israel, arosa! Opuntonan ngal cho kyamwaghan kutinyu lö ighisyot ompö kanasyantanï amelö ngal cho karamach choni. Itupunyi kong kwighisyot ngalechoni.

¹⁷ Wölo osörunyi ante ECHOTYON asisoni amochömchinanye pich cho iwöghenyi kuwanginyi.

¹⁸ Osörunyi nyo mötïny, puryö chi nyo pörinyi. Kechïwitanyi söpontongu ompöwölo kitönönyi kighanatengu wölo omitan. Kamwaghan ante ECHOTYON lenyoni.”