YEREMIA 36 - PIPÏLIA

Kisomön Paruk kitapï ompö Kö pö Tororöt

¹ Ompö könyi angwan nyo pö paytaghpa Yeoyakim wero Yosia, pöytoghinto Yuda, kilenchanïn ECHOTYON,

² “Chenga kitapï tekirchinö ngalechï löwïr komwowunyi paraku pipö Israel nko Yuda nko koros löwïr. Kira ngal cho komwowunyi kïngata osiswo paytaghpa Yosia nko ye.

³ Töptoy ana, atolïm pipö Yuda ngala kiwurat nyo kyamwaghan lö opchini chane kïwöghökisyö akïpïstö ortïnekwa cho ghach atolöstoghchï nko ngokikwa.”

⁴ Kïlenyona, okurön Paruk wero Nerya amwochan kukir ngal löwïr cho kimwowanïn ECHOTYON. Kukir nyu Paruk kitapunay kïrïp kegh nko ngalechini kyamwaghan kutinyu.

⁵ Atolapay olenchan Paruk, “Melö tökechömwanïn ngat olït Kö pö Tororöt.

⁶ Kïlenyona, omökan wïyönyi Kö pö Tororöt asis nyo toröy pich kïrura tesomönchinö pich ngal löwïr cho mi kitapunay kyomwowunyi lö kira lenyini kyamwaghan kutinyu. Isomönchï kïlïm tïkwïl pipö Yuda cho kapkana kanastinekwa.

⁷ Töptoy ana lïmöy Tororöt sowutkökwa akïwöghökisyö akïpïstö ortïnekwa cho ghach ompöwölo ngwonöch lakat ngala cho kamwa ECHOTYON lö owetöy oghchini pïchete ompö nörekyenyi.”

⁸ Atolapay kïwö Paruk wero Nerya kusomönchï pich ngala ECHOTYON lenyini kyomwochan ompö Kö pö Tororöt.

⁹ Ompö arawa mut nko angwan nyo pö könyi mut nyo pö paytaghpa Yeoyakim wero Yosia, pöytoghinto Yuda, kïmwa pipö Yerusalem nko Yuda löwïr cho kipka Yerusalem lö kïruröy chi anka tïkwïl ompö tawu ECHOTYON.

¹⁰ Kisomönchï Paruk pich kitapunay mi ngalechay löwïr kyamwaghan kekir. Kisomönchï chane ompö opis pö Kemaria wero Syapan nyo le kikirin ompö Kukat nyo Rel ompö Kö pö Tororöt.

Kikisomönchï kintöghoghï kitapï

¹¹ Otini kilïm Mikaya, wero Kemaria, kuköto Syapan, ngalechoni pö ECHOTYON kisomönchini pich Paruk ompö kitapï,

¹² kïwö ka pöytoghin akïlït opis pö kikirin wölo kimi kintöghoghï löwïr tuyot. Kimi tuyononi Elisyama nyini le kikirin nko Delaya wero Syemayan nko Elnatan wero Akpor nko Kemaria wero Syapan nko Sedekia wero Anania nko kintöghoghi walaka löwïr.

¹³ Atolapay kïmwochï Mikaya kintöghoghichay ngalechay löwïr kilïma Paruk kusomönchini pich.

¹⁴ Otini kimuchö, kuyoktö kintöghoghichay Yeudi wero Netania, kuköto Syelemia akï möchököryonto Kusyi, kïwö kïmwochï Paruk kwipchï chane kitapunay kisomönchï pich. Kïlenyona kwipchï Paruk wero Nerya kitapunay.

¹⁵ Atolapay kïlenchï kintöghoghichay Paruk, “Töpenö ngwïny, aisomönwecha kitapunï.” Kusomönchï nyu Paruk chane kitapunay.

¹⁶ Nyini kiter ngalechay löwïr kumuchö, kura kegh konyïn ompö otyogh atolapay kïlenchï Paruk, “Mïchini kïnyorï pöytoghin ngalechete.”

¹⁷ Atolapay kïtep chane Paruk lö, “Mwowecha köny, kimukanyi lö ne tekira kitapunï nya? Kikiranyi so lenyini kimwowuneninyi Yeremia kutinyi?”

¹⁸ Kuyokyï chane lö, “Kyakiran lenyini kimwowunenanïn Yeremia kutinyi.”

¹⁹ Atolapay kïlenchï chane Paruk, “Mïchininyi nko Yeremia ape awïnga kegh amotöp tomwochï chi lö omikwa onö.”

Kipel pöytoghin kitapï

²⁰ Kirorchï kintöghoghichay kitapunay opis pö Elisyama, kikirinto pöytoghin akïpa kö pö kimpïr pö pöytoghin. Atolapay kïmwochï pöytoghin ngalechay löwïr.

²¹ Nyini kimuchö, kuyoktö pöytoghin Yeudi kïwö kwipunö kitapunay opis pö Elisyama. Kusomönchï nyu Yeudi kitapunay pöytoghin nko kintöghoghichi cho kighyongöy kuwit nyinte.

²² Kimi pöytoghin aisoni konyi nyo pö osiswo kaghïtan, ompöwölo ki asispa arawa mut nko angwan nyoni akimi kïyïwöy manyi.

²³ Kïkany kusomön Yeudi palaltin sömök anta angwan ompö kitapunay, kïmuta pöytoghintö rotwö palaltinechay kikesomön akïwirchï mayay kiyïwöy. Kigh nyu lenyoni pöytoghintö ntökïtenö kïnagh kitapunay lömïs.

²⁴ Kïrkegh kilïm pöytoghin nko kintöghoghichi ngalechoni löwïr, puryö ompö akonga nyo kiporï otyogh anta nyo kitökwï lok.

²⁵ Kisagh tagh Elnatan nko Delaya nko Kemaria pöytoghin tömöpel kitapunay, wölo kimöterchïnye chane.

²⁶ Atolapay kïmwa pöytoghintö lö, “Anama Yeremia nko kikirintenyi Paruk.” Kïlenyona kïyonta werïnyi Yeramel nko Seraya wero Asriel nko Syelemia wero Aptel atökïnanamecha wölo kiwïngecha ECHOTYON.

Kikir Yeremia kitapu anka

²⁷ Otini kipel pöytoghin Yeoyakin kitapunay kikir Paruk lenyini kyomwochan kïlenchanïn ECHOTYON,

²⁸ “Chenga palaltine walaka atekirchinö ngal löwïr kimi kitapunay pö tagh kipel Yeoyakim, pöytoghinto Yuda.

²⁹ Atolapay iwö imwochï Yeoyakim pöytoghinto Yuda lö kamwaghan ante ECHOTYON lö, kipelanyi kitapunay aitepanyi lö ompö ne tökukir Yeremia lö ngwïnöy pöytoghinto Papilon kunyoröy koronï akuwany pich nko tïpö wudïn ompö kore.

³⁰ Kïlenyona omwowunyi Yeoyakim pöytoghinto Yuda lö, möminye montöngu kokay nyo töpo ngacharu paytaghpa Daudi. Otini kemeghanyi kïwirchini portöngu sany wölo pelöy asis pöghet akïnam powöy oghö.

³¹ Omunginyi nko moneku nko kintöghoghiku akwompö ngokikwa. Opunyi nko pipö Yerusalem nko Yuda kiwurat nyo kyamwaghan kutinyu lö onyorunekwa ompöwölo melö kyayangakwa ater ngalechan ato kyorirchokwa.”

³² Atolapay achengan palaltin walaka, atö kikirintenyan Paruk wero Nerya, atökukir ngal löwïr lechini kyomwochïneghan kutinyu. Kukir nyu Paruk cho körökegh nko cho kimi kitapunay pö tagh kipel Yeoyakim, pöytoghinto Yuda. Kikïtöschï ngale walaka cho lata choni.