YEREMIA 33 - PIPÏLIA

Ayomis anka nyo pö kikönöt

¹ Ato kitomitan chela ompö kö pö ripi pöytoghin, kïmwowanïn ECHOTYON ngölyontenyi ngat.

² Kilenchanïn ECHOTYON nyo kigh ngwïny akï kaynenyi kï ECHOTYON,

³ “Kuranïn tongitönun tomwowun ngal cho pö töngönchin cho wïngote cho tomönye nkïtunönyi.

⁴ Omwoghan ante ECHOTYON, Tororöt pö Israel lö, kïrkegh anganya korïn cho mi kanasyanta Yerusalem nko cho pö pöytoghi Yuda, alentöy tökenyorunö teköw cho oyeto kegh pung chona kikurikakwa,

⁵ wölo relu lïko Papilonia lö pöl. Nyïghitöy korichoni mïntïrichtino pich cho opöran ompö nörekyenyan nko sïngiryenyan akwompö ngokï cho kigh chane. Ngokikwa choni keghanïn achal kanasyantanï.

⁶ “Wölo kïrkeghnye so choni löwïr, itïtoy ato ongwïnan osopöy pipö kanasyantanete. Ongörokan chane tökulet nyo karam akïtïpï ompö kalya.

⁷ Oyokyinan ngat Israel nko Yuda tïkukwa, achïchim chane le wölo kilata tagh.

⁸ Otïlilan chane ompö ngokikwa löwïr, alöstoghchan ngokikwa nko penyatengwa.

⁹ Lïku nyu kanasyanta Yerusalem wölo onyorchinan ngörekyö nko ororyö nko konyït. Potonchot akïmïghyö pipö koros ato lïm ngal cho karamach cho owetan oghchini pipö Yerusalem nko kisoyönöt nyo opchinan kanasyante tïkwïl.”

¹⁰ Lentöy ECHOTYON, “Mwoghöy pich lö karkegh koronete nko surkwen nyo möminye pich anta tïpö wudïn cho möngöy ori. Mwoghöy pïchoni man ompöwölo puryö chi anta tyony nyo kïsïwïyi kïwestegho ortïna kanastina Yuda nko Yerusalem.

¹¹ Wölo tökïsis kelïma woptinechoni tïkwïl roröt nko kutïwa pich cho ngöreksot nko kïlïliyöto pich cho mi ichon pö kensyö. Kïlïmöy tïkwïl cho tumotoy ato ipöy Kö pö Tororöt* ropöwo kiyokyinogh pö sörö. Tumöy ato petöy kïlentöy, ‘Oyokyinö sörö ECHOTYON Kimuktoghin, ompöwölo karam nyinte akï chomnyenyi kïpö kokay nko kokay.’ Operuran korenete kïsïch tïkwïn le cho kitïng tagh. Mwoghöy ECHOTYON.

¹² Lentöy ECHOTYON Kimuktoghin, “Itïtoy ato pitöy suswon ntökïpka mösöwö kuyakwï kechiryekwa koronï körökegh nko surkwen nyo puryö chi anta tyompö wuw nyo möngöy.

¹³ Itïtöy tïkwïl ato yitöy pich kechiryekwa ngat ompö kanastin cho mi okumpö kutïngkot nko cho mi Syepela nko cho mi surkwen pö Nekep* nko koro Penchamen nko paren cho lekïtinö Yerusalem nko kanastina Yuda.” Mwoghöy ECHOTYON.

¹⁴ Lentöy ECHOTYON, “Itïtöy ato opuntenan ayomis nyo kyaman nko pipö Israel nko Yuda.

¹⁵ Ompö osiswechoni okïlan chi nyo le chumwak nyo ngwïno ara pöytoghin Daudi kïpayta kor. Ighöy nyinte man nko tïkwïn cho karamach ompö kore kïmïkul.

¹⁶ Kïsöru pipö Yuda nko Yerusalem kïtïpï ompö kalya akïsïköy kanasyantanoni kaynat nyo kïlentöy, ‘ECHOTYON nyo le sörunintencha.’

¹⁷ “Ompöwölo omwoghan ante ECHOTYON lö, möminye kokay ato potöy chi nyo pö ara Daudi nyo pöytoy Israel

¹⁸ amepotönye tïkwïl tïsin nyo pö ara Lawi nyo pöghisyechinanïn ompö ropöw cho kïpelöy nko ropöwo pagh akwighwanïn amörostin kokay.”

¹⁹ Kilenchanïn ECHOTYON,

²⁰ “Kïle otini momukekwanye ntawaghach muma* nyo kyaman nko pöghet, aman nko oghö lö, mi ato lïku pöghet akï mi ato lïku oghö,

²¹ kïmomukekwanye tïkwïl awaghach muma nyo kyaman nko mötworintenyan Daudi. Kyamwaghan lö möminye kokay ato potöy chi pö ara Daudi nyo töpo ngacharunyi pö paytagh. Kyamwaghan tïkwïl lö mepotönye tïsin nyo pö ara Lawi nyo pöghisyechinanïn.

²² Otösan pipö ara pöytoghin Daudi nko tïsï cho pö ara Lawi kïchangit nyoman nyo memukönye chi kuyit le kokel cho mi yïm anta ngayam cho mi sörömu nanam.”

²³ Kilenchanïn ECHOTYON,

²⁴ “Tomönye so lïmanyi pich kïlentöy, ‘Kiyon ECHOTYON Israel nko Yuda, pich odeny cho kikïlchï kegh nyinte?’ Nka nyï ye kasas chane piköchan ntömökuyitönye lö pich.

²⁵ Wölo kamwaghan ante ECHOTYON lö, kïle otini kyaman muma lö mï ato lïku pöghet nko ato lïku oghö, asatan wölo töptoy tïkwïn ompö yïm nko ngwïny,

²⁶ kïmopïstenanye kokay okonyït muma nyo kyaman nko monïngo Yakopo nko mötworintenyan Daudi nyo kyamaghan lö okïlan chi nyo pö ara Daudi kïpayta monïngo Apraam nko Isak nko Yakopo. Osyonchinan chane, asoyön kïnyorï mökosyengwa ngat.”