YEREMIA 32 - PIPÏLIA

Kyal Yeremia par

¹ Mi ngölyon nyo kimwowanïn ECHOTYON ompö könyi taman nyo pö paytaghpa Sedekia, pöytoghinto Yuda. Könyinini tïkwïl kï ki nyo pö 18 nyo pö paytaghpa Nepukadnesa.

² Kikikurik atoni lïko pöytoghinto Papilon kanasyanta Yerusalem, akikakekörchanïn kö pö rïpï ompö ka pöytoghinto Yuda.

³ Kitorchanïn chela Sedekia pöytoghinto Yuda ompöwölo kyomwochan pich lö, “Lentöy ECHOTYON kotönön kanasyantanï mori pöytoghinto Papilon.

⁴ Möchïwïtonye Sedekia pöytoghinto Yuda, mori pipö Papilonia. Nömöy nyinte nyo mötïny akwipchï pöytoghinto Papilon akïngalan tïkwïl kurosöy kegh konyïn.

⁵ Atolapay kumït pöyoghinto Papilon Sedekia kïwö Papilon. Töpo Sedekia wölini ntökïtenö amwaghan ante. Kïrkegh oporyeghenö pipö Papilonia mokönyekwanye.” Mwoghöy ECHOTYON.

⁶ Kilenchanïn ECHOTYON,

⁷ “Ngwïnöy werïnkwa Anamel, nyo pö Syalum, papongu nyo mïnïng akïlenchini, ‘Ala parenyan nyo mi Anatot koro Penchamen ompöwölo ichinyi werïncha nyo lekït tya aitïngetenyi man ialenanïn.’ ”

⁸ Nyini kimwa ECHOTYON ngalechoni kumuchö, kwitï Anamel kö pö ripï wölini kyomitan akïlenchanïn, “Ala parenyan nyo mi Anatot koro Penchamen ompöwölo itïngetenyi man ialenanïn akïpöyitu tösunöt ompö nyi.” Nyini kimwa Anamel ngalechoni, osöwan lö kikïngölonwanïn nyoman ECHOTYON.

⁹ Atolapay alan werïncha paranay mi Anatot ompö ropïyeni silpa cho le 17.

¹⁰ Kyokurön söwï, apimchï Anamel ropïyenichi ompö ratili. Atomuchö otökönön kö pö nyo kikepïrchï muri tökuporï lö kikïlïkwï nyinyan.

¹¹ Atolapay achengan köpöyichan kwodeny, nyo kikepïrchï muri akï nyo kikikirchï tötut pö olyot nko nyinö anka tomönye kepïrchï muri,

¹² apchan Paruk, wero Nerya, kuköto Maaseya. Kyotönön nyinte ompö tawu Anamel nko söwichay kitökön köpo olyot nko pipö Yaudi walaka cho kikïmicha tïkwïl kö pö ripï.

¹³ Atolapay omwochan Paruk ompö tawu pïchay lö,

¹⁴ “Lentöy ECHOTYON Kimuktoghin, Tororöt pö Israel, ‘Chenga köpenichï pö olyo par kwodeny, nyï kikepïrchï muri nko nyona tomönye kepïrchï muri airorchï tör atökïripisyö nyo kogh.’

¹⁵ Ompöwölo lentöy ECHOTYON Kimuktoghin, Tororöt pö Israel, ‘Tökyolöy ngat korïn nko paren, ompö pareni sapipun ompö koronete.’ ”

Saghata Yeremia

¹⁶ Otini kyotönön Paruk wero Nerya köpenichay pö olyo par, asaghan Tororöt lö,

¹⁷ “Nyi we Echotyon TORORÖT, nyo kigh möminye kïgh nyo pölinyi!

¹⁸ Iporchinenyi chomnyengu pich elpun cho chang wölo imungenyi chane akwompö ngokï cho kigh yiyikwa. Ichinyi Tororöt nyo wow aichï awes! Kïkuroninyi ECHOTYON Kimuktoghin.

¹⁹ Itötenyi ngaleku ompö ngöghomnyö aighenyi tïkwïn cho pö töngönchin. Isïwïyenyi lötok ortïn nko ighisyewut pö ptangengmöt airopchinenyi anka tïkwïl kïrïp kegh nko ortïnechi nko ighisyewutkachi.

²⁰ Kighanyi tïpö töngönchin köny ompö koro Misri ateghenyi lenyoni nko ompö nyete le ye ompö koro Israel nko koros walaka. Kïlenyona, kikenkïtunyi ompö wop anka tïkwïl.

²¹ Kimïtunenyi piköku koro Misri ompö töngönchin cho kighanyi ompö owesyengu nyo wow

²² airopchinyi chane koronï akwagh nyoman lenyini kiyomisyinyi papotïnekwa.

²³ Kipka chane kïmang lenyoni akïcheng kïlïkwï nyingwa. Wölo nyu melö kiter ngaleku amelö kirïp kirurutköku. Melö ompö kigh lenyini kimwochinyi chane. Nka nyu nyoni kipïsinyi kïnyorï nyarïl nyo tenö nyï.

²⁴ “Rose ye lö kikutïkum nyïngwïny kuwit kanasyantanete lïko Papilonia atökïporyeghö. Kïloto kanasyantanï kömöy nko ngot nko sömew. Isïwïyenyi ye lö köpïntö ngalechay kingoranyi lö ighisyot.

²⁵ Wölo ye, we Echotyon TORORÖT, nyi nyini kimwowanïn lö ala par, akur söwï kïtökön köpo olyot kïrkegh kikikïrich kïlot akïnam lïko Papilonia kanasyantanete.”

²⁶ Atolapay kïlenchanïn ECHOTYON,

²⁷ “Ochan ECHOTYON, Tororöt pö pipö ngwïny kïmïkul. Möminye kïgh nyo pölanïn.

²⁸ Kïlenyona omwoghan ante ECHOTYON lö, otöninan kanasyantanï mori pipö Papilonia nko Nepukadnesa, pöytoghinto Papilon.

²⁹ Pkonöy pipö Papilonia cho poryegho kanasyantanï akïpela ma. Metukönye mayoni korichay kipetöy piköchan pörkö tökïpelchi amöros akïsagh tororötïngwa Paal* akï pighchï dipay* tororötinekwa walaka, tïkwïn cho kighanïn anarek.

³⁰ Möminye kïgh nyo kigh pipö Israel nko Yuda ompö tawunyan kïpoto ghöyityö kïngata kïmïnkech. Kighanïn ighisyewutkökwa choni ghach anarek. Mwoghöy ECHOTYON.

³¹ Kighanïn anarek nyoman pïchete pö kanasyantanï kïngata asisini kikitor ketek nyo ye. Kïlenyona omwoghan lö otïpan kanasyantanete lökïr

³² akwompö ngokï cho kigh pipö Israel nko Yuda kïmi tïkwïl pöytoghï nko kintöghoghï nko tïsï nko werkoykökwa.

³³ Köpörchanïn pïchete patagh akï kïrkegh kyanetan kïnyïl cho chang, melö kiter akïyang kinetutköchan.

³⁴ Kipï ompö körkeyïntinekwa cho töghanïn kisön, Kö pö Tororöt* nyo kïkurtegho kaynenyan akusïmnyon.

³⁵ Kitekï ato kïpelo amörostino Paal* ompö Mpöghoghyo wero Inom atökïpelchï tororötïngwa Molek monekwa cho le wor nko tipïn le amöros kïrkegh melö kyomwochan kwigh tïkwïn cho lata choni, ntökwanyï ye kegh pipö Yuda kwigh ngokï!”

Ayomis pö kikönot

³⁶ Kilenchanïn ECHOTYON, Tororöt pö Israel, “Yeremia, olentan kölö pïchï lotöy pöytoghinto Papilon kanasyantanï ompö kömöy nko ngot nko sömew nya? Wölo tera nyu kitö anka nyo omwoghan.

³⁷ Oghömïtunan piköchan kïpkana woptin tïkwïl cho kyotoytoychan chane ompö nörekyenyan nko sïngiryenyan nyo wow. Oyokunan chane kïpka kïmang akïtïpï koronete ompö kalya.

³⁸ Lïku nyu chane piköchan alïkwan Tororötïngwa.

³⁹ Oghan chane kïsïch keröt akonga ompö möngengwa: Kïkonyïtanïn. Pöyitu nyu kerötononi kinyiwut nyo wow ompö chane nko monekwa.

⁴⁰ Oman muma* nko chane nyo pö kokay, alenchï mopïstonanye oghchï chane nyo karam kokay. Oghan chane tïkwïl kïkonyïtanïn tömakïpïstonanïn ngat.

⁴¹ Ongörökyinan oghchï chane tïkwïn cho karamach achïchimchan chane kïmang koronï ompö mantanyan.

⁴² “Kïlenyini kyopchan pïchï kinyarat nyo wow le nyï, owetan ye nyu oghchini tïkwïn cho karamach cho kyoyomisyan chane.

⁴³ Mwoghöy pich lö körökegh koronï nko kor nyo le surkwen nyo puryö chi anta tyompö wuw nyo möngöy ori akïmwoghöy tïkwïl lö kitöni mori pipö Papilonia.

⁴⁴ Wölo olöy pich ngat paren aketökön köpeni olyot ato kakesöwintönchï akepïr muri ompö koro Penchamen nko wölo lekïtinö kanasyanta Yerusalem nko kanastina Yuda nko cho mi wolnö le komos nko cho mi Syepela nko cho mi surkwen nyo kïkuro Nekep.* Oghan lenyoni ompöwölo oyokyinan chane tïkukwa nko korengwa.” Mwoghöy ECHOTYON.