YEREMIA 3 - PIPÏLIA

¹ “Ato tyak chi korkenyi, akïwö kokanay kwip chitö anka, etökuyokyini kegh chichay kokononi nya? Ntötöp kwigh lenyoni, mesïmnyononye korö kwararitï? Kïkany nyi ye Israel, keghanyi cheporesnan nko chamanköku cho chang. Ekechamanyi ye mïleghchanïn ngatï? Mwoghöy ECHOTYON.

² Syolö konyiku aitopön kutïngkot! Mi wölo tomönye ighenanyi cheporesnan nko chamanköku? Kikanganyi chane ompö or kamas, le wölo köngöy chi Marapyan ompö surkwen atökupulchï. Kesïmnyonönyi kor, ompö cheporesnanengu nyo kipölpolöy!

³ Nka nyï kipot rop lö weng, amakïminye ropay pö sarngatat. Kïrkegh choni löwïr, kiyomö nyi konyïn le chepores nyinte, metïngönyinye arasï ompö nyo le kite.

⁴ “Mölekïtnye so atay kötelenchinaninyi, ‘Ichinyi paponyan nyo kichamanïn kïngeta otini kyochan mïnïng?

⁵ Ayo, inörekyinaninyi so kokay alilinyi kokay?’ Onkïtön lö imwoghenyi lenyoni, we Israel, akwanyï nyu kighanyi löwïr ngalechoni ghach le wölo kimukanyi.”

Mïchini kïkötö Israel nko Yuda

⁶ Ompö osiswo paytaghpa pöytoghin Yosia, kilenchanïn ECHOTYON, “Ayo, kesïwenyi kïgh nyo kegh Israel nyo poru lö melö ghanate? Köpïstanïn akïwechï kwigh cheporesnan ompö komos nko ghïtwo pö ket cho nyörilöch sökö!

⁷ Kyolenchinan kegh atowany kwigh choni löwïr, kïmïlisyö wölo omitan, wölo melö kigh lenyoni. Kisöwintönchï cheptangwa Yuda, nyo le lïsin, ngalechoni löwïr.

⁸ Kisöwintönchï Yuda tïkwïl lö kyayonan Israel le korka nyo kakityak akwompö cheporesnanenyi, wölo melö kyotyö nyonikïny. Kilïkwï nyinte tïkwïl chepores!

⁹ Akwompöwölo kisïwa lö ki kïgh nyo mïnïng cheporesnan, kwipchï kor sïmnyontön nyo wow nyoman ompö cheporesnan otini kisoghöy koghïn nko ket.

¹⁰ Amelö ompö kitökïmïleghchanïn Yuda, cheptompö Israel nyo le lïsin ompö mïkulöwunyi kïmïkul wölo ompö lïs.” Mwoghöy ECHOTYON.

¹¹ Atolapay kïlenchanïn ECHOTYON, “Kaykay penyintonï le Israel kïtïl Yuda nyo le lïsin.

¹² Kïlenyona wïyö mwochinö Israel lö kamwaghan lö, Mïlena wölo omitan we Israel, nyi nyo mechï ghanate. Mwoghöy ECHOTYON. “Melö nyu torosinyi ngat ompö nörekyö, ompöwölo otïngetan kisyonchin. Mwoghöy ECHOTYON. “Amelö onörekan kokay.

¹³ Wölo chamanyi lö kyalel, akipörchinyi patagh ECHOTYON Tororötïngu, aicham lö, ompö ket anka tïkwïl nyo nyörilöch sökö, kitötenyi kegh icham tororötin walaka, aicham tïkwïl lö kimeterwanïnyinye. Mwoghöy ECHOTYON.

¹⁴ “ ‘Momïlisyö sonye akwa monechï mochï ghönote nya? Mwoghöy ECHOTYON. “Ompöwölo ochan Echotyontenkwa. Ochengan chi akonga ompö kanasyan achengan odeny ompö or anka tïkwïl nyo pö pipö Israel, atolapay amïtan kutïng pö Sayon.*

¹⁵ “Okonokwa nyu atoni mösöw cho chömanïn ompö mïkulögh akï pöghokwa ompö ngöghomnyö nko pköchin.

¹⁶ Akwato otösisyekwa achangitï ompö kor osiswechoni, makïngölonönye pich ngat kïlentöy, “Santuku Muma* ECHOTYON.” Puryö ompö nyo tökunonöy, kikewutyeghö amökwomönye pich emö, anta nyo lentöy opï kakigh Santuku Muma ECHOTYON anka.

¹⁷ Kïkuro osiswechoni Yerusalem, “Ngacharu paytaghpa ECHOTYON,” wölo ghömechini pipö koros löwïr ompö tawunyan kïsaghanïn amelö tökïpïrchini ngat kwighöy möchutko mïkuliskökwa cho ghach.

¹⁸ Ryomöy nyu osiswechoni pipö Yuda nko pipö Israel cho pkono koros cho mi okumpö löt akïmïlisyö kor nyo kyotönön köny papotïnekwa.

Kasagh pipö Tororöt körkeyïntin

¹⁹ “ ‘Kyononchan kegh lö, Israel, opï kechinyi akonga ompö monechan, akoninyi kor nyo karam nyoman, kor nyo pïchigh kïtïl koros löwïr. Kyolentan ikuraninyi lö, “Paponyu,” amelö kepïstonenyi rïpanïn kokay.

²⁰ Wölo, le wölo pïsto korka nyo melö ghanate santenyi, kipïstaninyi ompöwölo kimelïkunyinye nyo ghanat ompö ani.’ ” Mwoghöy ECHOTYON.

²¹ Kakïlïma kiteghat kutïngkot parak. Mi pipö Israel kïriryot akïsönönsot, ompöwölo kikïtosonchö ompö ortïnekwa, akiwutyeghö ECHOTYON Tororötïngwa.

²² “Omïlisyenö we pïchï mochï ghönote Osopekwa ngat alïkuna pich cho ghönote.” Atoni nyu ato omwoghekwa lö, “Arose, kökïmïlonchecha wölo imitenyi, ompöwölo ichinyi ECHOTYON Tororötïncha.

²³ Kitö kipotyecha nyoman, atanya kikïpusacha kutïngkot kesagh ompö ortïn cho meroko. Ompö man, ngwïno sörunöto Israel ECHOTYON Tororötïncha.

²⁴ “Kïngeta kechicha mïnkech nko ye, kiwangenecha tïkwïn cho kipïswecha papotïnecho ngölyontonï pö arasï. Kiwangenecha kyak nko monïng cho le wor nko tipïn.

²⁵ Kïlenyona mïchinecha kewirchinö kegh ngwïny ompö arasnï kanamecha. Nya kulumecha kiratatenyo ompöwölo, kïngeta kechicha mïnkech, kikighchicha nko papotïnecha ngokï ECHOTYON Tororötïncha, atökeghchinecha nko ompö nyete le ye. Melö ompö kitöketeracha kuti ECHOTYON Tororötïncha.”