YEREMIA 25 - PIPÏLIA

Punyon nyo ngwïno okumpö löt

¹ Kingwïchanïn ngölyonto ECHOTYON ompö paraku pipö Yuda ompö könyi angwan nyo pö paytaghpa Yeoyakim, pöytoghinto Yuda, wero Yosia. Könyinoni kï könyi tagh nyo pö paytaghpa Nepukadnesa, pöytoghinto Papilon.

² Kïlenyona olenchan pipö Yuda nko Yerusalem löwïr,

³ “Kyomwowokwa kïnomnyö ngölyonto ECHOTYON lenyini kimwowanïn nyinte ompö könyis 23, kïngeta könyi taman nko sömök nyo pö paytaghpa Yosia wero Amon, pöytoghinto Yuda nko nyete le ye, wölo materakwanye.

⁴ Melö kyalïmakwa amaterakwanye nyonikïny kïrkegh kiyokwokwa ECHOTYON mötworichi cho le werkoy kïnomnyö.

⁵ Kipkonöy werkoychoni kïmwowokwa lö, ‘Pïstenö chi anka tïkwïl orengu nyo gha nko ighisyewut cho ghach. Ato aghakwa lenyoni, omöngekwa koronï kikonokwa ECHOTYON nko papotïnekwa kingeta kösnyisyok.

⁶ Kyomwowokwa lö okïr kegh masagh anta opöghisyechï tïkwïn walaka amasagh tïkwïn cho kyapatekwa morikwo. Tïkuchoni oghekwa cho ighanïn anarek nyoman. Kyamwaghan lö, ato okïrökwa kegh tïkuchoni ighanïn anarek, kïmöminye kïgh nyo omokwa.’

⁷ Wölo melö kyateranïkwa angetakwa aghanïn anarek ompöwölo kyasaghakwa tïkwïn cho kaghekwa morikwo. Akwompö choni onyorukwa nyu sitenyan.

⁸ “Kïlenyona kamwaghan ante ECHOTYON Kimuktoghin lö, ompöwölo melö kyaterakwa ngalechan,

⁹ okurunan punton kïpkana koros cho mi okumpö löt nko mötworintenyan Nepukadnesa, pöytoghinto Papilon. Okurunan kïpka kïporyeghö pipö Yuda nko pöröriskachi. Owongan chane lömïs, aghan chane kïlïkwï cho mïghyot akwotyö akïroröchï pich kokay cho sïwïyi.

¹⁰ Oköran makïlïma kwenungwa turönö nko roröt nyo pö ngörekyö nko kilïliyöt nyo pö ichontino kensyewut. Mökelïmönye ngosyo pagh amökïminye mwagh tatïnekwa.

¹¹ Lïku koronï kïratyan nyo möchömönye chi kong kuros. Pöghisyechini puntonichoni löwïr pöytoghinto Papilon ompö könyis 70.

¹² Kïkany kuwonyö könyiswechoni le 70 ongwïnan omungöy pöytoghinto Papilon nko koro Papilonia akwompö ngokikwa, aghan kore kïlïkwï kïratyan kokay.

¹³ Nyoru pipö koronï nyörilwok löwïr kïle wölo kyamaghan ompö kuti Yeremia lö nyoru koroswö löwïr akekirchï kitapunï.

¹⁴ Lïku pipö Papilon tïkwïl sekey pö koros nko pöytoghi walaka. Nyoru chane sitengwa kïrïp kegh nko otöptinekwa nko ighisyewukökwa cho ghach.”

Kirwoko Tororöt ompö pipö koros

¹⁵ Kilenchanïn ECHOTYON Tororöt pö Israel, “Chengena ewunyan kikomponï pö dipay* pö nörekyenyan atolapay itö pipö koros löwïr cho oyoktoninyi kïgha.

¹⁶ Gheghöy akïtömesyö kïkwongkwongisyö kelyön akupilyö akwompö poryot nyo opchinan chane.”

¹⁷ Kïlenyona achengan ewu ECHOTYON kikomponay, atö pipö koros cho kiyoktanïn nyinte kïgha.

¹⁸ Cho pö tagh kïgha kï kanasyanta Yerusalem nko kanastina Yuda nko pöytoghikwa nko kintöghoghikwa. Lïku nyu koroschoni surkwen akï nyo atosïwa pich kwotyö. Kïpöghisyegho kaynengwa ompö chïpö nko nyete le ye.

^19-26 Chï kï pikö walaka cho kighegha kikompononi pö nörekyo ECHOTYON: pöytoghinto Misri nko mötworichi nko yetïntinechi pipö Misri löwïr nko to cho mi Misri pöytoghi löwïr cho pö koro Us pöytoghi löwïr cho pö kanastina Pilisti cho kïkuro Askelon nko Kasa nko Ekron nko nyo kingötunö Asdod pich löwïr cho mi Edom nko Moap nko Amon pöytoghï löwïr cho pö koro Tiro nko Sidon pöytoghï löwïr cho pö koros pö nanampa Kwen kanastina Dedan nko Tema nko Pus pich löwïr cho mutöy puto möt kïtöngoghöchitu pöytoghï löwïr cho pö Arapia pöytoghi löwïr cho pö pich cho möngöy surkwen pöytoghï löwïr cho pö koros pö Simri nko Elam nko Mede pöytoghï löwïr cho pö koros cho mi okumpö löt, cho lowöch nko cho lekïtöch, kïrïp kegh Kigha lenyoni pipö ngwïny atomi söröm kïgha pöytoghinto Papilon.

²⁷ Atolapay kïlenchanïn ECHOTYON, “Lenchinö pïchoni kamwaghan ante ECHOTYON Kimuktoghin, Tororöt pö Israel lö, ‘Aghegha dipay choni, atömesyö, anguntoy, apïtyö nyo momuke ongetyenö, ompöwölo opkokwa poryot.’

²⁸ Ato tagh kïchenga ewungu kikompe tökïgha, ilenchï kolan ante nyo ochï ECHOTYON Kimuktoghin, ‘Aghegha lenyini kamwaghan!

²⁹ Arosakwa! Opchinan meghat kanasyantanï kïkurtegho kaynenyan. Olentekwa so kïchïwïtyot monyorï sitenyan? Ompöwölo omitan opu ngot nyo wongöy pipö ngwïny löwïr!’ Mwoghöy ECHOTYON Kimuktoghin.

³⁰ “Kïlenyona, Yeremia, wïyö mwochinö chane lö, ‘Pororo ECHOTYON yïm, kïlïmöy kutinyi nyo ngwïno möngenyi wölo tïlil. Köpororchï pikachi ompö kut nyo wow, nyo lata kiteghata pich cho työkotyököy sapipun, ompö pich cho mi ngwïny kïmïkul.

³¹ Kïlïmo chöghötononi sörömu ngwïny ompöwölo mi kïgh nyo gha nyo kisïwechï ECHOTYON kwenungwa. Rwokyini nyinte pïchoni atolapay kïpara ngot mwokïyis!’ ” Mwoghöy ECHOTYON.

³² Lentöy ECHOTYON Kimuktoghin, “Arosa! Pusu meghat nyo wongöy koros. Itu chepkiriri, nyo kaghamïtuna kegh söremwok pö ngwïny!

³³ “Ruyot pich kïrïkïsus cho pöröy ECHOTYON asison. Kïghömï ngwïny kïmïkul. Mörirönye chi chane amöminye chi nyo wetöy kïtïpöy porwöyikwa. Köposisyegho sany atoni le pures.

³⁴ Akwa mösöw, osönönienö, ariryö! Akwa kintöghoghi okwotïn, omelmelö aryon. Ketïta ato kïyengekwa nko ato kitoytoyonekwa kïmutekwa sïghiny le makal nyo kikekïl lö lïku peny.

³⁵ Möminye wölo muköy mösöwö kïsor amöminye wölo muköy kintöghoghi okwotïn kïchïwïtyeghchï.

³⁶ Atere sönönöt nyo pö mösöw nko rira nyo pö kintöghoghi okwotïn! Ompöwölo kenyar ECHOTYON suswon nyo kömöy kyaki.

³⁷ Kïryöghsetö okwotinö cho koketïyi tagh ompö kalya, ompö nörekyo ECHOTYON nyo ngwan

³⁸ köpïstö ECHOTYON pikachi le wölo pïstoy ngötïny nyo wetöy sakas köpönenyi. Kalïkwï korö surkwen ompö ngot pö punyon nko nörekyo ECHOTYON nyo ngwan lakat.”