YEREMIA 18 - PIPÏLIA

Yeremia ompö ka ighinto tören

¹ Kilenchanïn ECHOTYON,

² “Yeremia, ngeta wïyö ka ighinto töreni mönö wölo omwowuneninyi ngölyontenyan.”

³ Owan kayay, atomtö ighinto tören pöghisyegho kinyi nyo witwitöy nyo söto möno tören.

⁴ Kyasïwan lö, ato nyara kïgh nyo kighöy nyinte, kïnyapïran mönonay akutor ngat kwigh anka lenyini kimököy nyinte.

⁵ Atolapay kïlenchanïn ECHOTYON,

⁶ “Ayo, akwa pipö Israel, motïngetanye so man aghakwa lenyini keda ighinto tören mönenyi? Monkïtökwanye so lö omikwa morichan le mönö nyo mi mori ighinto tören?

⁷ Ato amwaghan lö, okölöngöy anyarnyar pipö koros nko paytagh anka tïkwïl,

⁸ wölo ato wöghökisyö chane akïpïstö ortïnekwa cho ghach, kï mowetanye oghöy lenyini kyamwaghan lö oghchini chane.

⁹ Kïkany amwaghan lö oteköy, achïchim kor anta paytagh anka tïkwïl,

¹⁰ atolapay kïtagh kïterwanïn akwigh cho ghach ompö tawunyan, kï melö oghchinan chane nyo karam lenyini kyamwaghan.

¹¹ Kïlenyona nyu, mwochinö pipö Yuda nko cho möngöy Yerusalem lö kamwaghan ante ECHOTYON lö, ‘Otötwokwa onyorunö nyarïl. Lïku nyoni sitenkwa atomopïstekwanye ortïnekwo cho ghach. Omïlisyenö apïstö ortïnekwa choni ghach. Mïchini asitakwa ortïnekwo nko ighisyewutkökwo kuten.’

¹² Wölo mwoghöy chane lö, ‘Wechï kwïle choni ngale! Kighecha lenyini kikemwagh, kïrïp kegh nko oghïghyö nko ghöyïn pö mïkulisköcha.’ ”

Kitagh pich ECHOTYON

¹³ Lentöy ECHOTYON, “Atepe pipö koros löwïr, ato kikwigha asistanka kïgh nyo lata nyï. Kegh pipö Israel kïgh nyo gha nyoman!

¹⁴ Ayo, mi ato mösïwechininye chi pöwöy walisayi kutïngkoti Lepanon? Akïmi ato tenyot lalwatïna cho yinuno pögh cho köghïte kutïngkotichoni?

¹⁵ Kwompö ne nyu tökïwutyeghanïn piköchan akïpelchï amöros tororötino putintön. Kikupotyö amökunkïtcha or nyo rïpöy. Mökïrïpöcha ortïnechay pö könyisyok. Kesam ortïn cho mörumucha, mökuwerönye ortïnechay pelote.

¹⁶ Kikwigh chane koronï kïlïkwï nyo kyotyeghchini, akesas kokay. Chïrïmchini chi anka tïkwïl koronete nyo wetöy pantanyi, pirpiröy mötöw ato sïwa kïgh nyo kigha ompö korenete.

¹⁷ Otoytoychinan piköchan chete tawu pungkökwa, le wölo kutïtoy yomat nyo ngwïno kongasis terïtyon. Opörchinan chane patagh, amelö tokochunyan, mongörokanye chane ato nyorï nyarïl.”

Kitat pich kepar Yeremia

¹⁸ Atolapay kïlö pïchay, “Apkana kechama wölo kïtïghtoy Yeremia! Mömicha so tïsï cho netecha anta pich cho ngöghomöch cho muköy kururecha anta werkoy cho mwowecha ngölyonto Tororöt? Keyara ngal cho kirwokyinegho Yeremia amaketera ngat ngalechi cho mwoghöy.”

¹⁹ Kïlenyona asaghan lö, Terwante we ECHOTYON ailïmwante soghutkachu.

²⁰ Ayo, kitökyini chi ghöyityö ato igh nyo karam? Wölo rose ye lö köpölwanïn pïrïm ochïnchan ori. Nane lö kyoghyongan tawungu osoghchï chane kïchïwïtyeghö nörekyengu.

²¹ Wölo ye we ECHOTYON, nya kuwany kömöy monekwa, nya kuwany chane ngot nya korukwa monïngö akïlïkwï mïsïktin. Nya kuwany sömewut mïrönkökwa akuwany chumwakökwa ngot.

²² Nya kelïma rira korikwa otini kemirönyi chane irongchï chelölos. Ompöwölo kapal pïrïm tochïnchan ori akulokenanïn ngöghöptin tökïchörchanïn kelyön.

²³ Wölo inkïtönyi we ECHOTYON, tötutkökwa cho yöröy kïpörenanïn. Melöstoghchï chane ngokikwa amengongoghtegha tawungu lelutkökwa. Nya kemïghitö chane ngwïny ompö tawungu aighchï kïrïp kegh nko nörekyengu.