YEREMIA 17 - PIPÏLIA

Ngoki Yuda nko sitengwa

¹ “Kikikira ngoki pipö Yuda kalamu karïn, akekira koghpa almasi nyo ngatip kekirchï mïkuliskökwa, akekirchï luchtina atay kïpelo amörostinekwa.

² Soghöy pikökwa körkeyïn Asyera* ompö ket cho tïnkusöch nko kutïngkot

³ nko tömköy. Opïsyinan pungkökwa kïcheng tïkukwa nko ropïyeni atökutökï ngokichay kyaghakwa ompö korenkwa kïmïkul.

⁴ Wegho morikwa korö nyo kyokonokwa, atolapay aghakwa opöghisyechinö punkökwo ompö kor nyo monkïtökwanye, ompöwölo kinagh nörekyenyan le ma nyo memisonye kokay.”

Ngal cho sisinchö

⁵ Lentöy ECHOTYON, “Chïpote chi nyo twoytoy kegh chi akïtigho kegh ptangengmöt akïngwïsa mïkulöwunyi Tororöt.

⁶ Karkegh chichoni nko ket nyo mi surkwen, ket nyo pito wölo kiyam lö haw akï wölo le paryan nyo möpitonye kïgh kokay. Möminye kïgh nyo karam ompö ketoni.

⁷ “Wölo osoyönan chi nyo tighenanïn kegh, chi nyo twotyenanïn kegh.

⁸ Karkegh chi nyo lata nyoni nko ket nyo kipita lalwa kamas, nyo tortoy sikin kïröytö wölo mi pögh. Mewöghönye osiswo kilayat, ompöwölo nyörilöch sökechi kïtenö osis. Motyönye osiswo pekat akuyinöy akwa ompö osiswechi.

⁹ “Lïsin mïkulöwu ptangengmöt kïtïl kïgh anka tïkwïl, möminye wölo kisoptoy. Ekï ngo nyo muköy kunkïtu?

¹⁰ Osyokan ante ECHOTYON kinonut pö chi, okïtan mïkulöwunyi ori. Nka nyay oghchinan chi anka tïkwïl, kïrïp kegh nko ortïnechi nko ighisyewutkachi.”

¹¹ Karkegh chi nyo nyoru ropïyen ompö ara lïs nko tarit nyo lölongöy wara tarite anka. Pegho nyinte tïkuchoni lö weng otini tökïmïnïng. Söromunyi lïku chichoni sölwö.

¹² Karkegh Kö pö Tororöt* nyo kïsoghonecha nko ngacharu paytagh nyo pö ororyö, ngacharu paytagh nyo kikïsyol parak kïngeta otini le towunöt.

¹³ Nyi, we ECHOTYON, nyo ichï kikönöto Israel. Nömöy arasï chi anka tïkwïl nyo töghinyi. Potyot pich cho pïstoninyi le kaynötut cho kikikirchï terïtyon. Ompöwölo kïpïstinyi chane, we ECHOTYON, nyi nyo ichï kompö pögho söpon.

Kisom Yeremia kingörokut ompö ECHOTYON

¹⁴ Sopante, we ECHOTYON tosöpön lö chïkïl. Sörwante atonyorï sörunöt ompöwölo nyi onkït nyo osölan.

¹⁵ Kitepanïn pich ompö kïlentöy, “Kunko ngölyontonay kyotyeghenechanyi lö ipwecha ECHOTYON nyarïl nya? Kanya kungwïn!”

¹⁶ Wölo inkïtönyi we ECHOTYON lö, melö mi ato kyosominyi ipchinö pïchete nyarïl. Inkïtönyi nyinte ngölyon nyo kyamwaghan kutinyu.

¹⁷ Melïkwï wey nyo otyeghonan, nyi nyo osoran ato itwanïn nyarïl.

¹⁸ Kanya kïnyorï arasï pich cho chopanïn kong, wölo iripante monyorï arasï, we ECHOTYON. Wirena chane potana, wölo iripo monyorï potana. Ipchinö chane nyarïl aityakatyak chane kïlïkwï terït.

Ripöto asispa Sapato*

¹⁹ Kilenchanïn ECHOTYON, “Yeremia, wïyö mwatïtena ngölyontenyan ompö Kuka Pich, wölo weröy pöytoghi Yuda ato lïtöy akï lïtuno kanasyanta Yerusalem. Wïyö mwatïtena tïkwïl lenyoni ompö kukoti walaka cho pö kanasyante.

²⁰ Lenchinö chane, ‘Akwa pöytoghi Yuda nko pikö löwïr nko pich cho möngöy Yerusalem, cho weröy kukotichï! Atere ngölyonto ECHOTYON.’

²¹ Lenchinö kamwaghan ante ECHOTYON lö, ato köyongöy söpon, okïr makasan tïkwïn asispa Sapato, amop tïkwïn kïlït kukoti Yerusalem.

²² Mekösönunö tïkwïn korikwo asispa Sapato, amagh ighisyö anka tïkwïl asisoni. Okonyïtö asisoni le asis nyo tïlil kïle wölo kyomwochan papotïnekwa.

²³ Wölo melö kiter amelö kiyang papotïnekwa ngalechan. Kilïkwï pich cho oghïghe mötöwö, amakïternye ngalechan, amakïrïpnye le wölo kyomwochan chane.

²⁴ “Wölo ato ateranïkwa nyo ochï ECHOTYON, akïr kegh makasan kïgh anka tïkwïl kïlïtï kukoti kanasyantanï asispa Sapato, akonyït asisoni kïlïkwï asis nyo tïlil, akïr kegh magh ighisyö anka tïkwïl asisoni,

²⁵ kïlïtu, pöytoghï cho mïlöy ngacharu pöytoghin Daudi nko yetïntinekwa kukotï kanasyantanete kïpegho angoletin nko nkaritin. Lïtu chane nko pipö Yuda nko löwïr cho möngöy Yerusalem. Lïku nyu Yerusalem kanasyan nyo mangate kokay.

²⁶ Pkono pich kanastina Yuda löwïr nko koros cho lekïtinö kanasyanta Yerusalem, pkono walak koro Penchamen nko koro Syepela, kïpkana walaka kore wölo le komos nko kor nyo mi okumpö tagh nyo pö Yuda. Ipu chane ropöwo amöros Kö pö Tororöt, ropöwo pagh nko tïkuchay ngutoy cho onyïn nko ropöw cho kiyokyinegho Tororöt sörö.

²⁷ Wölo atomateranïkwanye, amokönyït asispa Sapato kïlïkwï nyo tïlil, amokïr akasan tïkwïn kïlïtöy kukoti Yerusalem asisoni, opelan kukoti Yerusalem. Nöghsot tïkwïl kori Yerusalem cho ororöch ompö ma nyo memukönye chi kumis.”