YEREMIA 16 - PIPÏLIA

Machata ECHOTYON ompö Yeremia

¹ Atolapay kïlenchanïn ngat ECHOTYON,

² “Metöp ntekensyö anta isïch monïng ompö yete.

³ Ompöwölo omwowunyi ante ECHOTYON kïgh nyo igho ompö monïng cho le wor nko tipïn cho kïyichini yete nko kïgh nyo igho ompö yiyikwa tïkwïl.

⁴ Pöröy chane sömewo akï puryö nyo ngwïnöy kïloköy ompö meghengwa anta nyo tïpöy chane. Köposisyegho porwöyikwa ngwïny le pures. Wongöy chane ngot nko kömöy akïlïkwï porwöyikwa omisyo törit nko tïpö wudïn.

⁵ “Kïlenyona ye, kamwaghan ante ECHOTYON lö, metöp ntelït kö nyo mi pich loko meghat amewö ntelok aisönön nko chane. Ompöwölo melö toperurchinan piköchan kalya nko kisyonöt nko pöropchö.

⁶ Meghsot pich cho echön nko cho mïnkech ompö koronete akïpuryö nyo tïpöy chane. Puryö ompö nyo wötöy kegh anto nyo rwoköy kegh möt ompöwölo kama chi.

⁷ Möminye chi nyo omisïyi anta gheghsyö nko chi nyo kamegha chitangwa akï lentöy tonyorï saghsaghat. Möminye ompö nyo syonchini lö otöni kïgh nyo kïgheghöy kïsaghsagh chi nyo kamegha kwanta anta kame.

⁸ “Metöp ntelït kö nyo mi pich aketagh ametöpö ngwïny iomisyö aigheghsyö nko chane.

⁹ Ompöwölo kamwaghan ante ECHOTYON Kimuktoghin lö, oghan kupotö yi serönö nko ngalana lö weng. Mökelïmönye tïkwïl turönö nko kichïlïlighat nyo pö tum pö kensyö. Osïwïyekwa choni löwïr kwighisyot ompö osiswekwa.

¹⁰ “Akwoto imwochinyi pïchoni ngalechoni löwïr, tepinyi chane lö, ‘Ompö ne tökïmwa ECHOTYON lö, kïnyorunecha nyarïl nyo gha nyo teno nyï? Ne lelutyencha, anta ngokï ne cho kikighchicha ECHOTYON Tororötïncha?’

¹¹ Imwochinenyi chane lö, kamwaghan ante ECHOTYON lö, ‘Ompöwölo kipïstanïn papotïnekwa akïpechï kïsagh akïpeghisyechï tïkwïn walaka. Kipïstanïn chane amelö kitökïrïp kirurutköchan.

¹² Wölo ye kaghachitukwa tya kïtïl chane ompöwölo kalïkukwa pich cho oghïghe mötöwö akï cho ochömo kegh ghöyityö amoteranïkwanye.

¹³ Kïlenyona, oyonchinokwa kor nyo monkïtökwanye, akimenkïtnye papotïnekwa. Akwato omikwa korononi opöghisyechinekwa asagh tororötin walaka kïyech kwimön amelö osyonchinekwa nyonikïny.’

Kömïlisyeghö pich pïnotön

¹⁴ “Kïlenyona, omwoghan ante ECHOTYON lö, pkonöy osiswö cho melö tökuwolwolöy kegh pich kïlentöy, ‘Kïle ato söpöy ECHOTYON nyo kimïtuna pipö Israel koro Misri,’

¹⁵ wölo lö, ‘Kïle ato söpöy ECHOTYON nyo kimïtuna pipö Israel kor nyo mi okumpö löt nko ompö wop anka tïkwïl nyo kiyonchï nyinte chane.’ Kamwaghan lenyoni ompöwölo oyokunan chane kïmïlisyö korengwa nyo kyotönön papotïnekwa.”

Sitöt nyo tökungwïnöy

¹⁶ Lentöy ECHOTYON, “Arose! Kokurön nömï cho chang kïpka kïnam pïchete le nömi kaghagh. Atolapay okurön sökosï cho chang kïsakas chane ompö kutïngkot nko komos nko ghatoy nko köpönot.

¹⁷ Ompöwölo osïwïyan kïgh anka tïkwïl nyo ighöy chane. Puryö kïgh nyo wïngate ompö tawunyan.

¹⁸ Otökan chane kïnyorï ngwonïn kïnyïl odeny ompö ngokï nko lelutkökwa cho kesïmnyon korenyan kïghaghit otï kenyïghit tororötino putintön cho mötïng söpon, karkegh nko muntïruch.”

Saghata kikönöto Yeremia ompö ECHOTYON

¹⁹ Nyi we ECHOTYON, nyo ichï owesyenyan, owïngenan kegh wölo imitenyi asorunyi manamanïn nyarïl. Ghömïtyininyi puntoni ngwïny cho pkono wop anka tïkwïl. Pkonöy kïmwoghöy lö, “Kimötïngnye papotïnecha kïgh nyonikïny kïpoto tororötino putintön cho le kwïle.

²⁰ Ayo, muköy so pich kwighchï kegh tororötin cho söghöy? Ewo! Ntökemuköy, melö kötö tororötino man choni!”

²¹ Kïlenyona, lentöy ECHOTYON, “Oporchinan pïchete lö wow kïtya owesyenyan nko kimukatenyan, nyo molimanye ngat, tökïpköchï chane lö ochan ECHOTYON.”