YEREMIA 15 - PIPÏLIA

Kiwonyogh pö pipö Yuda

¹ Atolapay kïlenchanïn ECHOTYON, “Kirkegh kungwïn Musa nko Samwel akughyongo tawunyan akïsaghanïn, mosyonchinanye pïchete kokay. Mwochinö kïpegha tawunyan, mochömanye osïwïye chane.

² Akwato tepinyi lö kïpetecha onö, ilenchï kamwaghan ante ECHOTYON lö, ‘Chona kikemwa lö wongöy sömewö, kwomöy sömewö! Chona kikemwa lö wongöy ngot, kwomöy ngot! Chona kikemwa lö wongöy kömöy, kuwongöy kömöy! Chona kikemwa lö kïrongöy pïnotön, kerongöy kïpa pïnotön!’

³ “Kamwaghan ante ECHOTYON lö otyorunan tïkwïn angwan cho ipu kinyarat. Otyorunan ngot nyo pörokwa nko kukïdin cho chutöy porwöyikwa nko töritwo yïm cho omöy porwöyikwa nko tïpö wudïn cho pkonöy kuwontoy panye cho köngötï.

⁴ Oghan chane kïlïkwï pich ighöy paytaghtina ngwïny kïmïkul kwotyö ompö ngal cho kigh Manase wero Esekia ompö Yerusalem ato ki pöytoghinto Yuda.”

⁵ Lentöy ECHOTYON, “Ayo, pïchï pö Yerusalem, ngo nyo syonchinekwa, akï ngo nyo ngwïnöy kïloköy ompö parakunkwa? Ngo nyo yongöy kïtepokwa pöghisyö nya?

⁶ Kataghanïkwa. Mwoghöy ECHOTYON. Kopörchanïkwa patagh. Nka nyoni nyu kosyolön ewunyu, amungokwa, ompöwölo kyaghakan osyonchekwa kïtenö osis.

⁷ Kakutïtekwa le morïro pagh, ompö kanastin cho mi koronete. Kotïghön monekwa awangakwa pikachu, ompöwölo mopïstekwanye ortïnekwo cho ghach.

⁸ Kaghan kïchangit mïsïktina korenkwa, kïtïlöy ngayam cho mi nanam. Kyotïghön mïrön cho tökïle chumwak, kïyetï tya nyarïl nyo kinyorï yotïnekwa.

⁹ Kiryalta yoto monïng mut nko odeny, ompöwölo kikïpar monïnge lömïs. Röytoy asistanyi kïrkegh kötökïpöghet. Arasï nko ngwonïn nyo tya ompö kokononi nya wey! Opïsinan pungkökwa kïpka kïparakwa, akwa chona tosöpsone.” Mwoghöy ECHOTYON.

Kingwïrngwïrönchï Yeremia ECHOTYON

¹⁰ Nyarïl nyete nyo tya nya wey! Ompö ne tökïyichanïn yonyan ngwïnyi nyarïl nyo teno nyï? Kalïkwan chi nyo karïpata syala nko riri ompö kore kïmïkul. Kalïkwï ne tökïchïpanïn pich löwïr akwanyï puryö chi nyo kopösönan ropïyen akï puryö nyo kopösön ropïyenichan?

¹¹ Nya kwamanïn chïpötengwa, we ECHOTYON ato melö kyopöghisyewunyi nyo karam nko ato melö kyasaghinyi lö ngaraka pungköchan ato kinam chane nyarïl.

¹² Ayo, muköy chi kuriy karïn, nyo ngwïno koros cho mi okumpö löt, akï nyo kikikulkulyö nko tay?

¹³ Kïlenchanïn ECHOTYON, “Oyonunan pung cho pkonöy kïngötöröy tïkukwa nko ropïyenikwa. Lïku nyoni sitenyan ompö ngokï cho kyaghakwa ompö kore kïmïkul.

¹⁴ Oghokwa opöghisyechinö punkökwo ompö kor nyo monkïtökwanye, ompöwölo lata nörekyenyan ma nyo nöghöy kokay.”

¹⁵ Inkïtönyi kïgh anka tïkwïl, we ECHOTYON! Nanante aingaraka, aitökwo pich cho kechopanïn kong. Memïkukönchï chane nyo kogh, tömönyorï pöroyïn kuwanyanïn. Inkïtönyi tïkwïl lö mwoghanïn pich ompöwölo opöghisyewunyi.

¹⁶ Kyanïkughan ngaleku otini kyalïman, kwipkanïn ngalechoni ngörekyö akïturön mïkulöwunyan. Ompöwölo nkïtanïn pich ompö kaynengu, we ECHOTYON Kimuktoghin.

¹⁷ Melö kyonomnyotan nko pich cho omisïyi kïsamta amelö kyororotan nko chane. Wölo kyotöpchan kegh onkït ompöwölo kinyïghitaninyi nörekyengu.

¹⁸ Ompö ne tömöngötöy nyarïl nyo otïngetan? Ompö ne tömölöghöy moyenyan amachömöy kesöröröy? Kechamanyi so lïsanïn le lalwa nyo wetöy ntökïteny?

¹⁹ Kuyokwanïn nyu ECHOTYON lö, “Ato imïlenyi wölo omitan, otokinyi lïkuna nyinyan ngat aipöghisyewanïn le tagh. Ato ipïstenyi ngal nyo mötïng tösunöt aimwagh cho tïng kinyiwut, oghinyi lïkuna ngölonintenyan ngat. Sorunyi pich wölo melö nyi nyo isoröy chane.

²⁰ Oghinyi aghïghituna le nayat nyo kikïteka taghoy ompö kwenu pïchoni. Kïrkegh kïporyegheninyi pung lö ne, memukönye kïlotinyi kokay. Ompöwölo omitan nko nyi tosörunyi aripinyi. Mwoghöy ECHOTYON.

²¹ Osöruneninyi mori mwokïyis, ongwïsuneninyi sighoy pö rïmï.”