YEREMIA 14 - PIPÏLIA

Pekat nyo gha nyoman

¹ Kilenchanïn ECHOTYON paraku pekat,

² “Mi pipö Yuda lok, kitöpchï meghat kanastinechi akïlokyö kumelmel terït akïrir Yerusalem lö tökengarak!

³ Kiyoktö pich cho echön mötworikwa kïrömï pögh, kïpa akupentö puryö pögh kori pöghon, kïmïlisyö nko sötoni kwïle, kïmeghö mutïnö akuyenonï konyïn ompö arasï.

⁴ Kipot rop lö weng ompö kor, kïnam tapan ngorï cho kiyen konyikwa otini kisïwa lö kiyam korö lö haw.

⁵ Arose ompö ngömïgh nyo mi wudanyi, köpïstö wawenyi nyo kötökïyiyöy, ompöwölo könyorchï onö suswon?

⁶ Kughyongö sïkïröyi wuw kutïngkot cho kimïl, akïngany kutïw akulösyö le chepkonöw, akïchïnu konyïn, ompöwölo kam ne?

⁷ “Lokyinanïn nyu piköchan kïlentöy, ‘Ngarakecha, we ECHOTYON ompö konyït pö kaynengu, kïrkegh rwokyinecha ngokicho. Kikepenyacha ngaleku kïnyïl cho chang, kikeghacha ngokï ompö tawungu.

⁸ Nyi nyo ichï kikönöto Israel! Nyi okït nyo isörwecha ompö osiswo nyarïl. Ompö ne nya we ECHOTYON telïkuna ton ompö korencha? Kekaranyi kegh nko rutoghin nyo pöghönöy oghö akonga kwïle.

⁹ Ayo, kegha ne tekara kegh nko chi nyo le kwöngön, le nyakana lïk nyo kepöl kïsörï chi? Wölo iminyi kwenuncha we ECHOTYON, kïchicha piköku, mepïstecha!’ ”

¹⁰ Lentöy ECHOTYON ompö pïchete, “Wechï chömo kegh pïchete kïpegho wölo omitan, menkïtcha kïrip kegh. Kïlenyona mochömanye chane. Ononan ghöyïntöngwa, amungön chane ompö ngokikwa.”

¹¹ Kilenchanïn ECHOTYON, “Ikïr kegh mesoghchï pïchï kïnyorï köromnyö.

¹² Kïrkegh kïkïrur, moterchinanye sowutkökwa akï kirkegh kïpelwanïn amörostin anta ipkanïn ropöwo pagh, motokanye kokay. Wölo owongan chane ompö ngot nko kömöy nko sömew.”

¹³ Atolapay olenchan Echotyon TORORÖT, “Kölö ne nya we ECHOTYON Kimuktoghin! Rose lö kömwochï werkoy pïchete lö, ‘Metwokwanye ngot anta kömöy ompöwölo keyomiswecha ECHOTYON kalya ompö korencha.’ ”

¹⁴ Atolapay kuyokwanïn ECHOTYON lö, “Kamwa werkoyichoni putintön ompö kaynenyan. Moyonwanye chane kïpka kïmwa kïgh, amongölonchanye chane nyonikïny. Kïlenyona, pkono ngalechoni mwoghöy werkoy kinonutkökwa opïn akï ngorat nyo le kwïle nyo puryö tösunöt.

¹⁵ Kïlenyona omwowunyi ante ECHOTYON kïgh ompö werkoy cho ngoröy ngal ompö kaynenyan kïrkegh melö kyoyonwan chane kïmwochï pich lö metwokwanye ngot nko kömöy ompö korenkwa. Owongan chane ompö ngot nko kömöy.

¹⁶ Wonyot lenyoni tïkwïl pïchoni kïmwochï werkoyichoni ngalechoni. Kichoghchini porwöyikwa ortïna kanasyanta Yerusalem akï puryö chi nyo tïpöy chane. Sitöt nyoni nyo nyoru chane löwïr, koru nko monïnge cho le tipïn nko cho le wor. Oghan lenyoni akwompö ngokï cho kigh chane.”

¹⁷ Kimwowanïn ECHOTYON lö mwochinö pich lö, “Nya kïtörengwanïn lok kïyech kwimön, nya kïtörengu, amötos! Ompöwölo kikemung piköchan kïpa kisön, ompö sitöt nyo ngwan lakat.

¹⁸ Nyini kolïtön sany otuyeghan muntïruch, pich cho kikïpar ompö poryot. Akwato olïtön kanasyan ori, otuyeghan pich cho kimeghö ompö kömöy! Mi werkoy nko tïsï kïsïngo pöghisyewutkökwa wölo menkïtcha kokay lö mi kwighöy ne.”

Kilokyï pich ECHOTYON

¹⁹ Heywey we ECHOTYON, ketaghanyi so nyoman pipö Yuda? Kikulilinyi kïgh so pipö Sayon?* Ompö ne nyu temungechanyi ntökwanyï ye mökïlöghsocha moyoköcha kokay? Kikikönecha lö kïnyoru kalya, wölo kinyorï ngo ne nyo karam? Kikikonecha lö itu ato kïsöpchonecha, wölo kwitwecha otyogh nko nyarïl kwïle!

²⁰ Kikechamacha we ECHOTYON lö, kikeghacha ngokï. Löstoghwecha ngokicho nko ngoki papotïnecha, ompöwölo kikeghacha ngokï ompö tawungu.

²¹ Mepïstecha, we ECHOTYON, akwompö konyït pö kaynengu. Mekany kesas Yerusalem, nyo mi ngacharungu nyo pö paytagh nko ororyö Inan aikonyït muma* nyo kyamanyi nko acha.

²² Ayo, muköy tororötino putintön chay soghöy pipö punton kïkonï rop nya? Akumuköy yïmö onkït kïkonï pkopïson? Mönyinye onkït nya we ECHOTYON Tororötïncha nyo ighöy choni löwïr kumukisyö? Kïlenyona kiketönöcha kikönötencha moriku.