YEREMIA 13 - PIPÏLIA

¹ Kïlenchanïn ECHOTYON, “Wïyö ala ananka kitani aikörmönchï muyengu amelut pögh.”

² Owan al anankanay akörmönön lenyini kimwowanïn ECHOTYON,

³ atolapay kïlenchanïn ECHOTYON ngat,

⁴ “Chenga anankanoni kyalanyi aikörmönchï muyengu aiwö iwïnchï koghi lalwa Yuparet.”

⁵ Owan owïnchï ato lekïto lalwa Yuparet lenyini kimwowanïn ECHOTYON.

⁶ Nyo kewer osiswö cho te, kïlenchanïn ECHOTYON, “Wïyö Yuparet aichengwï anankanay kyomwowunyi lö wïnchinö wölini.”

⁷ Owan lenyini lalwa Yuparet, angwïsuna anankanay wölay kyowïnchan. Wölo kyopentan kiwïr kemötö amelö kitökïtïng tösunöt nyonikïny.

⁸ Atoni kïlenchanïn ECHOTYON,

⁹ “Lenye nyoni wölo owurtenan pipö Yuda nko pipö Yerusalem ompö menötengwa nyo wow tya.

¹⁰ Kighachitu chane amökïterwanïnye. Köpïrchï tya kïrïp ngala mïkuliskökwa kegh. Kasagh akïpöghisyechï tororötin walaka. Lïku nyu pïchoni kwïle le anankanay kiwïr kimötö, amötïng tösunöt.

¹¹ Kïle wölo nömöy chi mu ananka nyo kïkörmönöy, kyomökan kïnömanïn lenyoni pipö Israel nko Yuda. Kyaghan lenyoni tökïlïkwï chane piköchan cho ipkanïn salat nko ororyö, wölo melö kïterwanïn.” Mwoghöy ECHOTYON.

Somonki dipay*

¹² Kilenchanïn ECHOTYON, Tororöt pö Israel, “Yeremia, mwochinö pipö Israel lö mïchini kenyïghit dipay somonkin löwïr. Wölo otini wöghokunyi chane lö, ‘Kelentenyi so mökinkïtöchanye lö kinyïghitöy dipay somonkin?’

¹³ Imwochinenyi nyu chane lö, lentöy ECHOTYON, ‘Arosa! Owirenan tamasa pipö koronï löwïr, pöytoghï cho mi ngacharu Daudi nko tïsï nko werkoy nko pipö Yerusalem löwïr.

¹⁴ Atolapay aghan kïwir kegh chane, cho echön nko cho mïnkech amesyonanïnye amotukanye. Owongan chane lökïr.’ ”

Kirirchï Yeremia menot

¹⁵ Akwa pipö Israel, kangalan ECHOTYON! Atera lasiny, amomen ompö tawunyi.

¹⁶ Akusa ECHOTYON Tororötïngwo, kïtomö kwipkokwa tuwïn, akunöghokwa koghïn kelyön ompö komos. Asala nyinte kïtomö kïwaghach löpoyïn nyo kokönekwa kïlïkwï tuwïn nyo wow.

¹⁷ Wölo ato materanïkwanye, kïriröy mïkulöwunyan ompö sison akwompö menötenkwa. Olokan ompö ngwonïn kïtörengu lok, ompöwölo kakïrang pipö ECHOTYON le naman.

¹⁸ Kiyontanïn ECHOTYON omwochï pöytoghin nko kame lö, “Orökunenö ngöcherwekwo pö paytagh, ompöwölo köchïntoy krauninekwa chay pïchighöch.

¹⁹ Kikurik pung kanastina Nekep* amöminye chi nyo muköy kïyotï chane. Kakïrang pipö Yuda kïpa pïnotön.”

²⁰ Syole konyiku we Yerusalem! Rose! Achona pungköku, cho pkono okumpö löt. Mi onö piköku chay ripinyi, piköku chay ikwolonenyi kegh nya?

²¹ Imwoghenyi ne ato parinyi akïpaytinyi pich cho kikinetanyi kïlïkwï kongotiku? Mechirenyinye le korka nyo lusïyi?

²² Itepeyi kegh lö, “Ompö ne tökïnamanïn ngala cho le chï?” Ay, kakïngaghinyi sïro akelölosinyi, ompö ngokiku cho echön nyoman cho keghanyi.

²³ Ayo, muköy so chi pö Etopya kïwaghach tuwïnto portanyi? Akumuköy möril kïngongoghta sömughïntanyi? Kötomukekwa nyu oghe man cho kanaghta agh ngokï.

²⁴ Kutïtonekwa ECHOTYON le morïr cho kutöy yomöt nyo ngïno surkwen.

²⁵ “Nka choni ngal cho nyorwokwa. Mwoghöy ECHOTYON. Ompöwölo kowutyeghanïkwa, atwaytekwa kegh tororötino putintön.

²⁶ Ongöghan ante ECHOTYON sïrokökwa, tökïrumtö arastönkwa.

²⁷ Kasïwan oghekwa tïkwïn cho töghöy konyichan, karïpatakwa tororötino putintön ompö kutïngkot nko tömköy le wölo ripotoy kegh cheporestin. Ochech nyi we Yerusalem! Oyï ato itïlilitunenyi nya?”