YEREMIA 10 - PIPÏLIA

¹ Akwa pipö Israel! Atere ngölyon nyo mwowekwa ECHOTYON! Lentöy,

² “Marïp ortïna pipö punton, amomïghyö ato asïwa cho sisinchö ompö yïmwöy. Nya kimïghyö pipö punton opïn atosïwa tïkuchoni,

³ ompöwölo kwïle akï pö putintön ortïna pïchoni. Lïtöy chi wuw akïtör ket, kïnam tïngana oywenyi akupat,

⁴ atolapay kïmina silpa nko koltin kumemer, akepartegha chumaris kïyam lö kïng mörul.

⁵ Karkegh körkeyïntinekwa choni nko tïkuchay kimugho törit ompö para marakwen. Memuköcha kokay kïngalan, kïsïtotoy ompöwölo memuköcha kïpesta. Maway körkeyïntenechoni, medonekwanye kïgh amöminye köromnyö nyo muköy kwighwekwa.”

⁶ Möminye anka nyo karkegh nko nyi we ECHOTYON, ichinyi Kimuktoghin, wow kaynatengu akïtïngetö owesyö nyo wow.

⁷ Ngo nyo mewöghinyi nyo ichï Pöytoghinto koros? Mïchini kekonyïtinyi lenyoni, möminye nyo karkegh nko nyi ompö kwenu pich cho ngöghomöch ompö koros löwïr nko ompö paytaghtinekwa löwïr.

⁸ Sölwöy akïtïsyote löwïr, mi so kïgh nyo muköy kunet chi körkeyïntinechay kikipata ket?

⁹ Kikïmina körkeyïntinechoni silpa cho kikipunö koro Tarsis, akemina kotin cho kikipunö koro Upas, choni löwïr kï ighisyewut pö chi nyo le tïngan. Kikilokyï körkeyïntinechoni sïro cho lata akwa lamay nko cho pïröch, sïro cho kinap tïngan.

¹⁰ Wölo ECHOTYON kï Tororöt pö man. Tororöt nyinte nyo söpöy, Pöytoghin nyo pö kokay. Otini kanarek kurïngring ngwïnya. Kor ne nyo köngöy nörkyengu nya?

¹¹ Kïlenyona olenchinekwa pïchoni, “Wonyot lömïs körkeyïntinö cho melö kigh yïm nko ngwïny. Potyot lö weng ompö ngwïny nko ompö muyo yïm.”

Tum nyo kïsölo Tororöt

¹² Nyinte ECHOTYON nyo kigh ngwïny ompö owesyenyi. Kipintit kor ompö ngöghomnyenyi akukarkar yïmwöy ompö chïreryenyi.

¹³ Nyini kangalan, kughum pögh cho mi yïm akusupunö kegh poltoy söremwok pö ngwïny. Ighöy kiryal kulïwï lö chwat ato ropönöy akïyotï yomat kungwïna töpotinechi.

¹⁴ Sölwö ptangengmöt akï kwöngön, nömöy arasï pïchay ighöy körkeyïntin, ompöwölo pö putintön tororötinechï le körkeyïntin amötïngcha söpon.

¹⁵ Kwïle körkeyïntinechoni akï pö lïs, wonyot lömïs ato tomtö ato nyoröy ECHOTYON chane.

¹⁶ Wölo melö karkegh tïkuchoni nko Tororöt pö Yakopo, ompöwölo nyinte nyo kigh tïkwïn löwïr, akïkïl pipö Israel kïlïkwï chechi. Kïkuro kaynenyi ECHOTYON Kimuktoghin.

Pïnotön nyo ngwïnöy

¹⁷ Akwa pipö Yerusalem, kikurikekwa pung! Aghamïta tïkukwo löwïr.

¹⁸ Ompöwölo lentöy ECHOTYON, “Otulenokwa osiswechoni koronï, otyorchinokwa nyarïl ntowonyö lökïr.”

¹⁹ Riröy nyu Yerusalem kïlentöy, “Wechï kowongwan! Mölöghocha moyoköchan, kïrkegh sakïtye! Kyolenchinan kegh omuköy akamagh sitononi.

²⁰ Kikewur emenichan, akengötigh angwokö cho kïrötoy. Köpïstanïn monechan akïpechï kegh. Möminye nyu chi nyo pörtewanïn eme amöminye nyo rötwanïn anankisko tïrisyen.”

²¹ Amwaghan ante Yeremia lö, “Wechï kalïkwï kintöghoghicha sölwöy! Mötepönye ECHOTYON atökeporchï or. Nka nyoni nyu kïgh nyo kichunta chane, aketoytoyö pikökwa löwïr.

²² Atere! Achï lökoy cho ketï! Köchögh kighumötö nyo ngwïno okumpö löt. Achona pung, pkonöy kuwuröy kanastina Yuda kïlïkwï kïratis, lïku köponoti chepkonöw.”

²³ Onkïtön we ECHOTYON lö, möminye chi nyo kimukta kegh onkït amöminye nyo muköy kïsötyï kegh söpontanyi.

²⁴ Mungecha we ECHOTYON ato kïtosonchecha, wölo melö ompö sitöt nyo ngwan tya amelö ompö nörekyengu, tömökiwonyecha lökïr.

²⁵ Nya kutang nörekyengu punton cho melö soghinyi nko pich cho melö yonginyi. Ompöwölo kipar kuwany pipö ara Yakopo akuwur korenyi kïlïkwï kïratyan.