YEREMIA 1 - PIPÏLIA

Yeremia

¹ Achï ngal cho kipkonchanïn Yeremia, wero Ilkia ato kyochan tïsin ompö kanasyanta Anatot nyo mi koro Penchamen.

² Kingwïnchanïn ngölyonto ECHOTYON ompö könyi taman nko sömök nyo pö paytaghpa Yosia, wero Amon nyo pö Yuda

³ akungwïnchanïn tïkwïl ato ki pöytoghinto Yuda Yeoyakim wero Yosia. Kingwïnchanïn ngölyonto ECHOTYON lenyoni ntökïtenö könyi taman nko akonga nyo pö paytaghpa Sedekia wero Yosia pöytoghinto Yuda. Kikïrang pipö Yerusalem arawa mut nyo pö könyinoni kïpa pïnotön.

Kuröto Yeremia

⁴ Kingwïnchanïn ngölyonto ECHOTYON kilenchanïn,

⁵ “Kyonkïtunyi tagh kïtomö aghinyi ompö muyeto yongu akïlchinyi kegh kïtomö keyiyinyi aghinyi lïkuna werkoyon ompö pipö punton.”

⁶ Oyokyan nyinte lö, “Muko lö ne nya we Echotyon TORORÖT ngölyontononi? Monkïtönye ongölonöy ompöwölo tochan monïng.”

⁷ Wölo kïlenchanïn, “Melentöy tochï monïng. Iwetenyi kor anka tïkwïl wölo koyoktinyi wïyö. Aiwetenyi imwoghöy ngölyon anka tïkwïl nyo komwowunyi mwatïtena.

⁸ Amewagh pïchoni, ompöwölo omitan nko nyi melö ominyi kïgh.” Mwoghöy ECHOTYON.

⁹ Atolapay kughïtö ECHOTYON ewunyi akïswany kutinyan akïlenchanïn, “Rosa yenyu lö kotönön ngalechan kutingu.

¹⁰ Kokoninyi ye owesyö paraku punton nko pöyunötin. Owesyö nyo imukenyi ikalang airultö, Owesyö nyo imukenyi iwur ainyar, Owesyö nyo imukenyi teka aikatkat.”

Sïwïyaghtin odeny

¹¹ Kingwïnchanïn ngölyonto ECHOTYON kïlenchanïn, “Yeremia, isïwïyenyi ne?” Olenchan, “Osïwïyan morno ket pö mlosi.”

¹² Kïlenchanïn, “Kesïwenyi nyoman, ompöwölo omitan kïpsach opuntö kwigha ngölyontenyan lenyini kamwaghan.”

¹³ Atolapay kungwïnchanïn ngat ngölyonto ECHOTYON panta nyo pö odeny kilenchanïn, “Isïwïyenyi ne?” Olenchan, “Osïwïyan tör nyo mi okumpö löt nyo wïchöy akïpöru kuti wölï omitan.”

¹⁴ Kïlenchanïn nyu ECHOTYON, “Chumuno onkunoni kinyarata nyo chumchini pipö koronete,

¹⁵ ompöwölo okurunan pipö punton nko pöytoghikwa löwïr cho mi onkunoni kïpka. Pkonöy pöytoghikwa kïtïpiyot ngöcherwekwa cho pö paytagh ompö tawu kukoti kanasyanta Yerusalem akuwit nïyetko kanasyantanoni nko cho pö kanastin löwïr ompö koro Yuda.

¹⁶ Ongwïnan nyu orwokyini pipö Israel ompö ghöyin nyo kigh otini kipïstanïn akïpechï kïpelchï tïkwïn cho ngutoy cho onyïn tororötine walaka akïsagh körkeyïntin cho kigha morikwa.

¹⁷ Wölo nyi ye Yeremia, napa kegh lasiny. Wïyö mwochinö chane ngalechï löwïr omwowunyi ye. Amewagh chane, tömawirenin potana ompö tawungwa.

¹⁸ Kachïchiminyi asisete le kanasyan nyo wakate lasiny. Kaghinyi aghïghituna le pchöri karïn, aiaghïghitï le nayatu tay atömedinyi kïgh pöytoghi Yuda nko yetïntinechi nko tïsichi nko pikachi löwïr.

¹⁹ Poryegheninyi chane, wölo mörïntoninyinye ompöwölo omitan nko nyi tosörunyi.” Mwoghöy ECHOTYON.